Аниа гэж

Хань ижлээс мессеж ирэв ээ. Охидынхоо ээжийн эзгүйд хэрхэн тоглож байгааг, хэрхэн аашилж байгааг, ээжийгээ хэрхэн санагалзаж байгааг гээд тайлагнана.
Аниа нь дүүдээ үсэг зааж өгч байна гэнэ дээ. Дөнгөж 2хон настай дүүдээ шүү. Хэ хэ.
Ингэж томоор зураад, зааж хэлүүлсэн юм байх. Өнөөх нь тухайн үедээ дагаж хэлж байсан ч, одоогоор тогтоогоогүй л дээ мэдээж. 2 өдөр л ингэж багш шавь болцгоогоод, сүүлийн өдрүүдэд дүү нь энэ цаасаа гаргаж ирэхгүй байна гэнэ дээ. Бодвол аниа ширүүн багш байсан биз. Тэгээд ээж харьж ирсэн бүгд хуучин хэвэндээ орцгоосон. Ккк
Би бас багадаа дүү нартаа ингэж үсэг заагаад, өнөөдүүл нь тогтоохгүй болохоор уур хүрч байснаа санадаг юм. Аниа нар гэж бас дүрдээ их итгэлтэй улс байдаг юм байна шд.
Ингээд босоогоор орчихлоо.

Би тэвчихгүй

Олон л ийм тэвчихээргүй зүйл байх юм даа гэж. Үглээд, дуулаад байгаа хүмүүсийн нэг шүү дээ. Бидний өмнөөс.

Амарч байна

4 зүг 8 зовхист минь япон хэлээр эргэлдээд байхаар хааяа ингэж эх хэлээрээ дуу сонсох зүгээр шүү. Мэдээ сонсохоор жаахан нервтэх гээд байдаг болохоос хэхэ.

Дуу оруулна аа

Дуу хөгжимнөөс ч бүр холдож гүйцэх нь. Сонсоё доо энэ чинь...

Ойрд монголд хит болоод байгаа юмдаг уу даа.

Нээрээ

Их ажлын үеэр олимп болоод, би олигтой үзэж чадаагүй шд. Өглөө босоод л хальт мэдээ сонсдог гэж байгаа. Дэмжиж байсан тамирчид маань жаахан амжилт муутай байсөөн. Одоо яахав, дандаа амжилттай байна гэж юу байхав.
Тэгсэн нэг япон хүн " бид чинь цаанаасаа бие бялдрын хувьд арал муутай шд, нөр их хөдөлмөр зарж байж л ийм амжилтанд хүрч байгаам" гэсэн. Ёвропчуудыг хар, ямар их медаль авбаа, яг ямар ямар улс байлаа даа, санадаггүй ээ. Бүр нэг улсын 3 тамирчин эхний гурван байрт шалгараад ч байх шиг.
Хань ижил нээлтийн ажиллагааны үеэр төрийнхаа далбааг хараад, сэтгэл хөдлөөд гэсэн. Эзэлсэн байрыг нь сүүлд надад хэлж байсан. Жаахан дэмжээд, дээрээс нь өөрсдөө хөдөлмөрбөл манайхан ч үзүүлээд өгөх байх аа тэ.
Их сонин сонин спорт бас байна л гэнэ шүү. Тэр нэг шал зүлгээд л байдаг спорт байна хэхэ. Шал ч биш л дээ, хөөрхийс. Мөс биз дээ тэр одоо.

Монголоос дээр үед захиж байсан ном минь ирсэн, уншина даа зав гарахаараа. Зургийг нь оруулна аа эндээ.

Галзуу

хүний өдрийн тэмдэглэл хөтөллөө хэд хоног. Хэ хэ
Мэргэжлийн үг гэж нээрээ хэл ам сугалсан, орооцолдуулсан эд шүү. Монгол нь өөрөө наддаа гадаад хэл болчихоод байгаам чинь. Ядаж байхад хажуугаар нь орос үг хэрэглэх юм аа, би орос хэл пагийг хэлэх үү. Гэснээс орос хэл дээр зурагт үзэлгүй 10 жил болж байна.
Хэд хоног яваад ирсэн, бага зулзага салахаа байлаа. Эрх нь дэндээд байна. Намайг харахаараа хүнээ байдаг гэнэ шүү. Эзгүйд бол хачин дуулгавартай, хоолоо өөрөө иддэг л гэнэ, хүнийг үг сонсдог л гэнэ. Би нь одоо яалтай билээ. Байнга гадуур дотуур явж байдаг юм уу хаашаа юм.
Гадуур явах ч уг нь сайхан шүү. Шинэ газар үзэж, шинэ хүмүүстэй танилцаад л.
Баахан цаастай л боллоо, бага багаар нь дахин уншаад, өөрийн болгоод явчих санаатай. Энэ удаад бүр яс хийнэ ээ, хадгалахгүйгээр хэхэ. Өөртөө бүр амлалаа. Та нар бас хааяадаа сануулж байгаарай, амлалтыг минь.

Манай монголчууд наашаа их ирдэг болж, төрөл бүрийн салбарын сургалт, хурал цуглаанд оролцохоор. Буцахдаа ачаа нь хэтрээд буцдаг болжээ. Би ч ганц нэг муу аргаасаа хэллээ. Гар тээшээ тэг ингэ гэж хэхэ.

Өдөр бүр хий

Ер нь байж байгаад л ийш тийшээ ажлаар явж ирэхдээ "за энэ япон хэлэнд ус цас болохгүй бол ч... Өнөөдрөөс хойш хичээнэ ээ" гэсэн эрч хүчтэй асар хүнд зорилготой буцаж ирдэг байгүй юу.

Энэ удаад бас л тийм бодолтой, өөрийгөө голсон хүн л сууна.  

Аан бас "за энэ англи хэлийг сурахгүй бол ч, өдөр бүр үг цээжлэнэ ээ" гэсэн зорилготой ирнэ ээ. 

Монголын хууль гурав хоног болчихоод байдаг болохоос. 

Хажуугаар нь эмэгтэй хүмүүс бидэнд амжуулах ажил их байх юм аа тэ. Унасан бөхөд шалтаг мундахгүй гэдэг л энэ. 

Их битгий хий

Бага битгий хий

Өдөр бүр хий

гэдэг үгийг л санаж явахаас. Өдөрт ядаж ганц үг, ганц арван минут...

Таг болдог

болжээ, би ч. Аав минь бас таг болчих юм аа гэсэн. Хэ хэ

Ажил ихтэй байна. Эмэгтэй хүмүүс чинь ажлынхаа хажуугаар гэр орон, үр хүүхэд, нөхөр сүүдэр гээд харж халамжлах зүйл их байх юм байна шүү дээ. Багыгаа унтуулчихаад ажлаа хийж байна гэж хэд хоног гүрийсэн чинь хацар дээр юм гараад. Жаахан л ядарвал гардаг юм, ихэвчлэн уруул тойроод гарна гээч.
Бас нэг мэдүүштэй сониноо та нарт хэлэх үү? Нэг орой зүүн чих сонин хөндүүр оргив оо. Тэгсэн маргааш нь бүр өвдөөд уналаа. Юм идэхээр, ангайхаар, хүрэхээр аймар өвчтэй байлаа. Бүр цаанаа биш, наахан хэсэгтээ өвчтэй байгаад байдаг. Охидууд минь өвдсөн шиг дунд чихний үрэвсэл лав биш дэг ээ. Ядраад дотор нь нэг юм гарчихаж гэж оношлов. 2 өдөр өвдөж явав. Ажлаар гадуур явах гээд байдаг, бүр хүндрээд ажил будаа болно гээд эмчид үзүүллээ. Тэгсэн сувилагч нь миний хэлснийг сонсож байснаа
-Чихээ их ухдаг уу?
-Тийм, ер нь ухна л гэнэ шүү.
гэлээ. Сувилагч инээж байна аа. Ээлж ирээд эмч дуудлаа. Үзсэнээ багадаа дунд чихний үрэвслээр өвдөж байсан байна. Баруун чих зүгээр байна. Зүүн чихийг үзсэнээ улаан байна. Гадна чихний үрэвсэл гэв. Чихээ хагас жил ухаж болохгүй гэсэн. Хэ хэ
Чих их ухахаар бохир ороод ч гэнэ үү, бид өвтгөөд, шалбалаад орхидог ч гэнэ үү, тэгэхээр бохир ороод үрэвсдэг гэнэ дээ.
Гэртээ ирээд чихний хөвөнгөө далд хийчихсэн. Ил яваад л би чих ухах дуртай хүн гэрийнхээ бүх гишүүдийн чихийг ухах гээд зүтгэдэг хүн байхгүй юу. Одоо больё чи минь, муухай өвддөг юм билээ.
Чихээ үзүүлэхдээ бага зулзага их уйлдаг байхгүй юу, ер нь тэрүүгээр нэг үзүүлэх гэж ирсэн жаахнууд уйлаан майлаан, чарлаан болдог юм. Үнэндээ өвдөх байх гэж айгаад эмнэлэгт очилгүй 2 хоночихсон хүн шүү дээ би чинь. Тэгсэн өвдөх нь битгий хэл харин ч нээх кайфтай юм билээ шүү ккк

Ганган охид

гарах байх шүү. Охидууд минь. Хэхэ. Бага зулзагатайгаа оригами-гаар янз бүрийн бүтээл туурвиад сууж байлаа. Тэгсэн бага зулзага өөртөө бөгж хийлээ. Би скочоор нааж өгөөд бэлэн болов. Тэгсэн дахиад дахиад гэсээр байгаад 10 хуруундаа бөгж хийгээд зүүчихлээ өнөөх чинь. Бөгжөө бүх хүмүүст гайхуулаад л явсан. Хуруунуудаа байдгаар нь дэлгэчихээд л.
Том зулзага бас яг ингэж бөгж хийж тоглодог байсан юм. Бас их цуглуулна аа.
Намайг ээмэг бөгж зүүхлээр
-Ээж ээ, том болохоор минь өгөөрэй за
гээд л шулганадаг байж билээ. Томрохоор нь өгнө өө. Ямар учиргүй алт алмазан ээмэг бөгж биш. Хэ хэ. Энд нээрээ охидууд чихээ цоолох нь ховор. 10 жилд нь бүр хориотой. Ялангуяа ахлах сургуульд орохоор сургуулийн дотоод дүрэм журамд хориглодог юм билээ. Нэг бодлын зөв гэж бодоод байгаа. Чихээ цоолчихвол хичээлээ хийх цагаасаа хумслаад анхаарал нь бас ээмэг бөгжинд сатаараад. Баян хоосны ялгаа гараад гээд л сул тал байна.
Оюутан болоод ч юм уу нийгэмд гарахаараа харин эмнэлэгт очоод цоолуулчихдаг юм билээ эдний охид хүүхнүүд нь.
Би бүр ээмэг бөгжнөөс төсөөрсөн байна лээ. Зүүхээ мартаад гараад явчихна. Хааяа зүүхээр вуав яасан гоё болчихоо вэ энэ тэр гэж хүн ичээгээд байхаар нь төвөгшөөдөг болсон байна лээ.
Гэхдээ байна шүү, донжыг нь олоод гоёчихдог байх зүгээр гэж боддог юм. Тэгэхгүй бол ээж шигээ элдэв гоёлоос хол бол бас дэмий.

Гялгар уут

Гамшгийн үед байгаа материалаа ашиглан хоол хийх талаарх сургалтанд оролцов.
Сүүлийн үед иргэддээ болон, гадаад оршин суугчдад зориулсан иймэрхүү сургалт их зохиогддог болсон байна лээ.
Манай ажлаас анх удаа зохиож байгаа тул дутагдалтай зүйл байсан. Жишээ нь богино цагт олон төрлийн хоол хийх гэж үзээд, цагтаа амжихгүй зарим нэг хоол онцгүй болсон.
Энэ удаагийн сургалтын онцлог гэвэл гялгар уут ашиглан хоол хийх. Дээр үеийн бидний хэлж сурснаар бол 10-ын уут. Бусад төрлийн гялгар уут хорт бодис ялгаруулах тул ашиглахгүй байх нь зохистой. Үндсэн арга нь материалуудаа уутанд хийгээд ууттай нь тогоотой усандаа хийгээд буцалгах юм билээ.

Мэдээж гамшгийн үед ус, тог, газ гээд л өдөр тутмын хэрэгцээт зүйлсээр тасалдах үе гарна. Мөн гал тогооны хэрэгсэл гээд л.  Энэ л үед ухаан санаагаа уралдуулж, тэр бүр сандраад байлгүй аливаа зүйлд хянуур хандах хэрэгтэй гээд л хоолны хичээлээс өмнө хальт лекц сонсов.
Ганц тогоотой байна гэж бодоё. Олон хүний хоол хийх хэцүү тэл уутанд будаагаа хийгээд 30 минут буцалгаад л болж байна лээ. Бас лууван төмсөө хэрчээд нэг хүний поорцоор гялгар уутандаа хийгээд бас тодорхой хэмжээнд буцалгана. Гоймонг бас тэгсэн. Ингэхдээ 10 минут тутамд гаргаж ирж сайтар хольж өгөх хэрэгтэй. Уутных нь гаднаас. Халуун тул бээлий өмсөж хийнэ.
Амталгааг бол өөрсдийн хийнэ гэсэн зүйлээ хийхэд болох юм билээ. Япончууд хоолоо чихэрлэг амттай идэх дуртай тул нялуун болсон байсан. Бид бол давсаа л хийх хэрэгтэй. Хэ хэ.
Энэ арга гэхдээ бас сүүлийн үед турах зорилготой хүмүүст их хэрэгтэй гэсэн. Учир нь тос огт хэрэглэдэггүй тул. Энэ талаар янз бүрийн л ном хэвлэгдсэн байна билээ. Дараа завтай үедээ гүйлгэж харна аа. Ажил дээр олон орж ирсэн харагдсан.

Хөөрхөн ном 2

За энэ өмнөх бичлэгний үргэлжлэл.
Биеийн эрхтэн орсон хэлцүүд бий.
Гар хөл, цээж, мөр, гэдэс, хошного гээд л хэхэ.
Жишээ нь Ката но ни га орирү-мөрнөөс ачаа буух. Утга нь ямар нэгэн хүнд хариуцлага, ажлын ачаалал дуусч санаа амрах гэсэн утгатай.
Шири га омой-бөгс хүнд. "Бөгс томтай гэж бодож байна уу? Үгүй шүү. Ямарваа нэгэн зүлийг хийхдээ хойрго, удаан гэсэн үг. Жишээ нь хэн нэгний гуйлтыг цаг тухайд нь хийчихгүй, хойрго зан гаргах" гэж тайлбарласан байна.
Гэх мэтчилэн тайлбар нь бас хөөрхөн. Та нарын дунд арай ингэж бодсон хүн байгаа юм биш биздээ гэж ирээд л. Өөрийн эрхгүй пис гээд инээд алдах үе гарсан шүү.
Уг хэлцүүдэд монгол хэлний хэлцүүдтэй төстэй зүйл хэд хэд байсан.
Япон хэл суралцаж буй хүмүүс сонирхоорой. Ялангуяа японд суралцдаг хүмүүст их зүгээр шүү дээ. Үнэгүй зээлээд уншчихна. Тэгэхгүй бол жижигхэн хэрнээ бас л хөөрхөн үнэтэй ном байсан. Би нэг худалдаж авах гэснээ больчихоод, ажилдаа шахаж байхав.
За та нартаа болон өөртөө амжилт.
Ер нь гадаад хэл гэдэг чинь байна шүү дээ хэцүү хэцүү ккк

Хөөрхөн ном 1

Эртээд санаандгүй 2 зулзагатайгаа мужийн номын санд явахдаа зээлж авсан юм. Уншиж амжихгүй явж явж, хугацаа нь жаахан хэтэрсэн. Тэгээд ажлынхныгаа ав гэж захиад. Гадаад оюутнуудад их зүгээр юм байна. Хүүхдэд зориулсан тайлбар нь ч хөөрхөн энэ тэр гэж рекламдаад.
Толь бичигнээс үг харахаар нил ханз, дөнгөж суралцаж буй хүмүүст залхмаар шүү дээ үнэндээ.
Энэ ном нь юуны тухай вэ гэхээр хүний нүүр царай, толгой чих хамар орсон хэлцүүд тайлбартайгаа бий.
Жишээ нь монгол хэлэнд хамраа сөхөх гэж байдаг даа. Япон хэлэнд бас байна аа байна. Хана га такай гэж. Хамар өндөр гэж орчуулах юм уу даа шууд утгаараа.
Мөн Као га үрэрү. Царай нь худалдагдах, зарагдах махчилбал шүү дээ. Цаад утга нь нэр алдарт хүрэх, олны танил болох гэсэн үг.
Гэх мэтчилэн зөндөө л байсан. Бүгдийг нь бичнэ гэж юу байхав. Өөрсдөө олж умшигтий.

Онгод

ихтэй байгаа.
1. Нэхэх хобби ихсээд л. Том зулзагынхаа найзад малгай нэхэж өгсөн. Бөөн баяр байна гэсэн. Угладаг ороолтоо нэхээд тавьчихсан. Хагас сайнд эзэнд нь өгнө. Бас эгчид нь нэхэж байгаа. Уг нь өөрөө утсаа өгсөн юм. Тэгсэн нэг тийм хөвсгөр утас, сонин болоод болж өгдөггүй. Нэхэж үзээд л хөвөөд байсан. Сүүлдээ шинээр утас авч нэхээд, хуучин утсыг нь буцаана аа. Өөртөө бас малгай нэхнэ. Бас бус нэхэхээр товлосон зүйл байгаа. Зургийг нь оруулахаа хэлж мэдэхгүй л байна. Ганц нэг хүн адилхан нэхсэн зүйлийнхээ зургийг үзүүлбэл оруулна. Хэ хэ. Уншаад шууд өөрийг нь хэлж байна гэж мэдэх ёстой.

2. Бичиг цаасны ажил ихтэй байна. Дээр үед хийж байсан орчуулгын үг хэллэг хэрэг болоод. Тэгсэн хоолтойгоо хольчихсон байх юм. Тухайн үед хийж байсан галзуу хүний өдрийн тэмдэглэлээ сөхөж хараад л сууж байна.

3. Номоо уншиж байгаа. Дуусахаар нь зургийг нь оруулна аа. Хэ хэ. Мундаг тэмдэглэл бол оруулж чадахгүй шүү дээ угаасаа.

Сар шинийн мэнд

Сайхан баярласан биз дээ. Их өргөн болоод байгаа сурагтай. Энд ажлын өдөр байгаад байдаг, тэнд хүмүүс айл хэсээд, алт мөнгөө цуглуулаад байдаг.

Би өөрийгөө бас жаахан тэрслүүд үзэлтэй гэж боддог байхгүй юу. Тэгсэн адил үзэл бодолтой найз нөхөд байдаг л юм билээ. Хэ хэ Шууд манай тал.

Бид сар шинийн мэнд мэдэлцээд л шууд шүүмжлэлдээ орж байгаа юм.

Жил бүр шинэ дээл хийлгэж өмсдөг хүн байна. Нэг дээл хийлгэхэд дор хаяж ... төгрөг гэнэ. Тэрийг нь би иенд шилжүүлж үзлээ. Том зулзагын 3 сарын төгөлдөр хуурын төлбөр болж байна. Тэгээд ганц өөрөө биш, гэрээрээ гэнэ. 4 хүнээр бодоход л бараг бүтэн жилийн төлбөр. Толгой сэгсрээд л байж байна. Үндэсний зан заншил, уламжлал сэргээд сайхан байгаа ч, бас шүүмжлэлтэй хандах зүйл байна аа байна.

Хадаг байна. Бүр л онцгой тохиолдолд хэрэглэдэг зүйлийг өдөр тутмынхаа аар шаархан зүйлд хүртэл хадаг яндар болно.

Дээрх торго, хадаг гээд л бид өөрсдөө үйлдвэрлэдэггүй. Дандаа урд хөршид орлого оруулна.

Бас мөнгө барьж золгодог ёсыг болих хэрэгтэй.

гээд л бид зөндөө л хууч хөөрлөө.

Бодууштай шүү, үнэхээрийн.

Мөнгөтэй хүн лаагаа иднэ үү, луувангаа иднэ үү хамаагүй ч тэрийг нь дуурайгаад намираад байхгүй юм сан л гэж бодож сууна даа.

Жич: Шинэ жилийг найз нөхөд, ажлын газрынхтайгаа баярладаг баяр, цагаан сарыг хамаатнуудын баяр болговол таарна гэдэг шийдэл хүрсэн. Хэрэгжих болтугай.