Даам

Бага зулзагатайгаа саяхан даам нүүхийг суралцаж эхлэв. Даамыг бол ээж аав минь жилийн өмнө өгч явуулсан юм. Нэгэн шалтгаанаар өөр мужид хагас жил хадгалагдав, манайд иртлээ. Манайд ирснийхээ дараагаар хагас жил гаран хадгалагдав. Хэ хэ.

"Би чамд хайртай" дээр гардаг шиг л юм болж байна даа, одоохондоо. Мөн сонирхлыг нь бууруулчихгүйн тулд албаар хожигдож өгч байна. Хэ хэ.

Өдөр бүрээ байг гэхэд долоо хоногт нэг удаа тоглож байна даа. Зав зай нь яах нь уу?

Гэхдээ амжилттай, даам нүүх гэдэг үг зааж өгөв. Одоогоор даам гэдэг үгээ л цээжилсэн байна. Нүүх гэдэг нь дуудлага нь жаахан хэцүү байгаад байх шиг. Тэгээд бодохоор л эх хэлний минь дуудлага гэж хатуу шүү тэ.

Япон хүмүүс сурахад хэцүү хэл шүү л гээд байдаг юм. Бага зулзага бас л сурах гэж бөөн юм болно. Сүүлдээ төвөгшөөгөөд, таг болно. Яадаг юм билээ.

Яадаг юм билээ ч гэж дээ, ядаж зундаа нэг харьчихаад л баймаар. Тэгвэл дорхноо л сайжирна даа. Даанч энэ МИАТ гэж ноёнтны үнэ хаданд гарчих юм. Гэрээрээ харьчихаад ирэхийн тулд овоо хэдэн жил хурааж цуглуулах шаардлага гарч байна.

Гадаадад байдаг иргэдээ овойж оцойтлоо баяжчихсан гэж ташаа боддогоо больчихмоор.

Даам ярьж явснаа хадуурдаг гэнэ ээ. Багадаа даам ч тоглоно, даалуу ч тоглоно, шагай ч няслана, сайхан байж дээ. Ухаалаг утас энэ тэр байхгүй.

Одоо залуухан гэр бүлийн нэг том асуудал хүүхдүүдээ ухаалаг утаснаас холдуулах юм шиг байна.

Томчууд нь өөрсдөө хүүхдийнхээ нүдэн дээр ухаалаг утас барилгүй, хоорондоо даам тоглоод нэг үзээрэй. Хүүхдүүд чинь сонирхох байх шүү. Заавал даам шатрын дугуйланд явуулах шаардлагагүй байх өө. Өөрсдөө л бага зэрэг тоглож мэддэг байхад л болчих юм шүү дээ.

Бүгдэд нь амжилт хүсье. Би ч бас хичээнэ ээ...

Хөөрхөн ном

6 дугаар сарын хөөрхөн ном. Дэлхий дээрх ээжүүд аавууд хүүхдээ хэрхэн тэвэрдэг, үүрдэг тухай. Хэрхэн тэврэх ч гэж дээ, ерөнхийдөө бүгд хоорондоо адилхан ч, тэврэхийн тулд, үүрэхийн тулд хэрэглэж буй зүйл нь бага зэрэг ялгаатай байсан.

Яахав ихэнх нь даавуу хэрэглэдэг юм билээ. Зарим нэг улс үндэстэн энэ зурагны голын шиг хувцас нь тусгай зориулалтын байх жишээтэй.

Томыгоо зүгээр л хоёр гараараа тэвэрдэг байлаа. Тухайн үед одоогийнх шиг элдэв зүйл, санаа оноо ч гэж байсангүй. Ганц нэг гэрийнхээ ажлыг амжуулахдаа ташаан дээрээ суулгаж тэврээд л нэг гараараа амжуулдаг байв.

Багыгаа хүзүүгээ даадаг болоход нь урдаа энгэртээ тэврэх зориулалтай даавуун зүйл? ганц нэг ашиглаж байсан. Гэхдээ нэг их удаан хэрэглээгүй. Дэмий авч уу? гэж бодогдохоор. Учир нь дорхноо л томроод хэрэглэхээ байчихаж байгаа юм.

Заримдаа боддог юм, одооны залуухан ээж нар мэдээлэл их сайтай, тийм ч авах юмсан, ийм ч юм авах юмсан гэх болжээ, нэг их удаах хэрэглэгдэхгүй юмаар юугаа хийнэ ээ гээд хэлчихмээр. Хэ хэ.

Гэхдээ дүү мүү нь гарахад бас хэрэглэх болохоор худалдаж авсан даа ч яахав дээ. Тэ.

Японд их үүрдэг юм билээ. Яслийн анги нь бас багш нар нь нэг нэг хүүхэд үүрчихээд л, арай томуудтай нь тоглонгоо хамаг ажлаа амжуулдаг юм билээ. Тусгай үүрдэг хормогч шиг зүйл байдаг юм. Япон эмээ нар, ээж нар бас хоол ундаа хийхдээ ингэж их үүрдэг. Ингэх нь хоёр гар нь чөлөөтөй, хоол моолоо хийхэд хачин их тустай байдаг.

Гэснээс энэ номонд манайхны орныхоо хөлнөөс уячихдаг тухай оруулсан бол сонин байх байсан даа гэж бодоод амжив. Хи хи. Бид багыгаа бас ганц нэг уяж байсан шд, орчин үеийн ээжид таалагдахгүй л байх даа тэ. Ккк. Ямартай ч элдэв аюултай юм руу орчихно гэхгүй амар байж билээ.

За тэгээд өөрт амраараа, өөрийн хүслээрээ тэврээд, үүрээд ажлаа амжуулаад, гялалзаад байгаарай ээжүүд аавууд минь.

Сонсголын бэрхшээлтэй хүмүүст...

Өнгөрдөг бүтэн сайнд сонсголын бэрхшээлтэй нийт 30 иргэдэд эх орныхоо тухай ярьж хөөрөв.

Повер пойнт ашиглалгүйгээр ярьж өгөхийг хүссэн тул, нэлээд олон зураг хөрөг хэвлэж бэлдэх гээд л ажил ихтэй байлаа.

Миний ярьсныг дохионы хэлний орчуулагч? орчуулна. Би аль болох удаан тайван ярихыг хичээсэн. Учир нь Тэмүжин өвөө минь миний нэг яриан дээр суучихаад бага зэрэг удаан темптэй ярь гэж зөвлөснийг санан санан л ярилаа.

Наана нь бас хальт өөрөө дохионы хэлээр ганц нэг мэндчилгээний үг сурав. Хүрэлцэн ирсэн зочид минь их баяртай хүлээж авсан. Алга ташилтаар намайгаа мялаасан.

За тэгээд л далбаа, ганц нэг хүүхэлдэй, нэлээд хэдэн ном, тоглоомон гэр, шагай зэргээ тэврээд л явсан. Эдгээр зүйлс минь л яриаг минь баяжуулж, хөгжөөж, их тус болдог юм.

Мөн хэдэн сүмочид минь байна. Эндээс мэргэжлийн сүмод орсон ганц нэг дүү нарынхаа өгсөн банзүкэг гайхуулж бардамнана аа. Дараа чадвал ганц нэг аваргын банзүкэнээс олж авахыг хичээнэ ээ. Олдох болов уу даа өчүүхэн надад. Хи хи.

Нэг бэрхшээлтэй зүйл нь олон зурагнаасаа зургаа хайж олох гэж жаахан сандарсан. Мэдээж ганц нэгийг нь энд тэнд хадсан байсан л даа.

Ярьж байх явцад агуулгад нь таарсан зургаа олох гэж л сандарч байхгүй юу? Дээрээс нь дээлтэй байсныг хэлэх үү халууцаад.

Гэснээс одоо байгаа хоёр дээлээ жаахан муудаад, солих болбол торго энэ тэр гэхгүй зүгээр л дан тэрлэг хийлгэж өмсөнө гэж бодоод байгаа.

Бүтэн хоёр цаг гаран, дундаа нэг завсарлагатай. Орчуулагч нарт минь зарим нэгэн үг, хэллэг минь хэцүү байсан, самбарт бичих, дүрсэлж үзүүлэх гэх мэтээр ойлголцсон.

Сонсголын бэрхшээлтэй иргэд бүгд онц сурлагатан уу гэхээр бас тийм биш, дунд нь олон шалтгаанаар дохионы хэлдээ тааруу хүмүүс байдаг юм билээ.

Сэтгэлийн хөдлөл нь ил тод, өвөрмөц ертөнц юм шиг ээ.

Дээлтэйгээ унждаг ээмэг зүүж явдаг юм, энэ удаад зүүгээгүй. Учир нь тэдгээр хүмүүсийн сэтгэл зүрх эмзэг байдаг гэсэн болохоор, их ганган харагдаад, гомдоочих байх гэж бодоод.

Ярианы төгсгөлд нийгэмлэгийн дарга нь монгол хоолны сургалт явуулмаар байна, та завтай биз дээ? гэсэн.
-Завтай, завтай, дуртайяа зааж өгнө өө
л гэлээ. Хугацаа нь хаа байсын, ирэх жилийн 2 сард. Гэхдээ л цаг хугацаа харвасан сум шиг л өнгөрөх байх даа. Нэг мэдэхэд одоо ямар хоол хийж хуйхаа маажна аа гээд л явж байх байх даа тэ.

Өөртөө болон та бүхэндээ амжилт хүсье өө.

Шинэ цэс

Хэд хоногийн өмнөөс нэг ийм шинэ цэстэй болоод. Гэрийн бусад гишүүд их амтархан идэж байна. Харахад жаахан тийм ч, харлаад.

Амархан ч юм. Хэд хэд хийгээд, гартаа оруулаад авсан. Хойшид хийж идэж байна аа. Би өөрөө энэ ногоонд дуртай, их сонин. Тийм болохоор худалдаж авчихаад, ганцаараа шахуу л иднэ. Хэ хэ.

Өнгөрдөг жил бас хаш ногооны нэг цэстэй болоод байсан даа. Тэрийгээ тэрнээс хойш нэг их хийж идээгүй. Учир нь улирал нь дуусангуут л худалдаж авдаггүй юм. Тухайн улиралд гарч байгаа ногооноос л худалдаж авч идэхийг хичээдэг болж.

Би нэг их хоол голоод байдаггүй л дээ. Янзан бүрийн амьтны махыг идэж л орхино, есөн жорын ногоог амтархан иднэ.

Гэхдээ тарваганы мах идэж чадахгүй юм байна. Хэ хэ.

Бас эдний зарим нэг үндэснийх нь амттан зэрэгт нэг их дуртай биш.

Дараа өөр шинэ цэстэй болохоороо оруулна аа.

Та нар ч бас шинэ цэстэй болохоороо бичлэг оруулаарай, хийж сурахыг хичээнэ ээ.

Амжилт хүсье.

Гүзээлзгэнэ

Хагас сайнд гүзээлзгэнэ түүв. Бага зулзага бид хоёр ажлын минь хоёр хүүхэнтэй.

Хань ижил, том зулзага хоёр албатай тул яваагүй. Ямар сайхан юм? гээд л байсан.

Ийм хүлэмжүүд зөндөө байна. Бид дөрвүүлээ нэг бүтэн хүлэмжийг эзлэнхэн түүлээ. За ёстой ямар цөөхөн юм бэ, цадах юм уу ухааны юм бодсон байхгүй юу. Хэ хэ. Тэгсэн хэдхэнг идээд л гэдэс дүүрээд ирдэг байна шд. Бага зулзага бол гуравхан ширхэгийг л идсэн байх. Төлсөн мөнгөө бодохоор охиндоо овоо идүүлчихмээр байдаг. Ккк.

30 минут нь том хүн 1500 иен. Хүүхэд 800 иен. Гэснээс сүүлийн үед хүлэмжид ингэж газрын хөрснөөс дээш тариалдаг болсон гэсэн. Учир нь хүний хөдөлмөрийг хөнгөвчлөх зорилготойгоор.

Навч нь цэцэг нь иймэрхүү.

Ийм улаанаас нь түүж иднэ. Хэрхэн түүж идэх тухай орохоос өмнө зааж өгсөн. Мөн энэ газар янз бүрийн химийн бордоо, хор хэрэглээгүй учраас түүгээд л шууд идэж болдог. Тийм утгаараа хүн ч их байсан. Ихэвчлэн эмэгтэйчүүд их харагдсан. Жимс жимсгэнэд дуртайгаараа л тэр байх даа тэ.

Гүзээлзгэнийг амтархан идэх арга нь байна шдээ, навчыг нь авч байгаад навч байсан бөгснөөс нь хазаж иднэ. Хамгийн сүүлд үзээр хэсэг болох чихэрлэг амттайг хэсгийг нь иднэ. Тэгвэл гүзээлзгэнэ их амттай байдаг гэсэн шүү. Би бол үзүүрээс нь эхэлж идээд байдаг байсан.

Ингэж түүж байгаад л зөндөөг идсээн. Худалч хүнд жилийнхээ гүзээлзгэнийг идчихсэн байх аа. Цуг явсан хятад ажилчин маань бас тэгсэн.

Ирэх жил дахин явцгаана гэсэн. Бас наана нь блүбэрри идэхээр явцгаана. Ингэхэд блүбэрри жимсийг монголоор юу гэдэг билээ? Би заримдаа нэрс, заримдаа алирс гэж орчуулаад байдаг юм. Зөв үү? Буруу юу.

Ээлжит жүжиг

Бага зулзага бид хоёр ээлжит жүжгээ үзээд. Хөөрхөн гэж юүхэв, сонирхолтой гэж юүхэв.

За энэ зурган дээр байгаа хөөрхөн чихмэл тоглоомууд их ид шидтэй. Нэг том болоод, нэг жижиг болоод л хүүхэд томчуудыг хөөрхөн инээлгээд, баясгаж чадаад байна.

Хоёрхон хүн амилуулна, манайхаар бол настайд тооцогдохоор эмээ өвөө. Хи хи.

Гэхдээ энд эмээ өвөө нарын нийгэм дэх үүрэг бас л том шүү. Жишээ нь хорооныхоо сайн дурын үйл ажиллагаа, сурагчдын хичээлдээ явах цаг, тарах цагаар хийдэг сайн дурын үйл ажиллагаа гээд л тоочоод байвал их.

Манайхан болохоор тэтгэвэрт гарахаар нь хүний тооноос хасчихдаг гээд байдаг тэ. Хааяа л нэг ахмадын өдрөөр хүлээж авах, сонгууль дөхөхөөр нэг тоодог гээд л.

За тэгээд л эмээ өвөө хоёр маань хоолойгоо амьтны дүр бүр дээр өөрчлөөд л, их сүрхий. Тайзны засал чимэглэл ч их энгийн, гарын доорх материал ашигласан. Болдог бол монголд урьж аваачаад тоглуулахсан гэж бодсон шүү.

Бага зулзага бид хоёрын улиралд нэг үздэг жүжгүүд бүгд их хөөрхөн. Санаа авахаар зүйл их байдаг юм.

Та бүхэн ч гэсэн иймэрхүү жүжиг байвал жижиг юм, эмээ өвөөгийн тоглосон, нэрд гараагүй хүмүүсийн тоглосон, энэ тэр гэлтгүй үзэхийг хичээж байгаарай. Заавал том том тайзан дээрх мэргэжлийн хүмүүсийн үнэтэй тоглолт үзнэ гэлгүйгээр...

Мартах гэж байна, бүгдэд нь эх үрсийн баярын мэнд хүргэе. Баяраа сайхан тэмдэглээрэй.

Гэрийн даалгавар

Багахан зулзагынхаа гэрийн даалгаврыг чухам ямаршуу зүйл байдаг вэ гэдгийг эндээ тэмдэглэж үлдээх гээд...

Ийм хувилсан цаас тарааж өгч байна. Одоогоор хирагана үсгээ нэг нэгээр нь бичиж байна.

Цэцэрлэгт байхдаа уншаад сурчихсан болохоор энэ удаагийн даалгавар нь үсгээ бичих дарааллаар нь зөв, цэвэр бичиж сурах. Мөн хажууд нь байгаа зургийг будаж болно, будахгүй ч байж болно.

За энэ ЦҮ үсэг. Тогоруу, зун, өрдөг модон тоглоом гэдэгт ордог байх нь. Баруун гар талын хүснэгтэнд ангиа, овог нэрээ бичнэ.

Унших даалгавар дээр өдөр бүр нэг үсэг нүдэлж бичих даалгавар нэмэгдээд, даалгавраа хийгээч ээ гэж үглэх минь нэгээр нэмэгдэж байна даа гэж.

Аниа нь гоё бичдэг гээд л магтуулдаг байлаа. Дүү нь дуурайх байх аа. Хэ хэ. Ээж л тэгж хүсч байна даа. Хи хи.

Гэснээс ганц нэг багш тааралдаад аниатайгаа ёстой адилхан юм байна гэдэг гэсэн. Хэ хэ. Ганц нэг л багш үлдсэн байх, аниаг нь сурч байх үеийн. Учир нь өнөөх шилжилт хөдөлгөөнөөр шилжээд явчихдаг тул.

За ингээд л олон үсэг, олон ханзтай үзэж тарах нь дээ, ээж ч мөн адил хоцрохгүйг хичээнэ дээ.

Та нарынхаа сурлагад ажил үйлсэд ч амжилт хүсье.

Хөөрхөн ном

Бас л сэтгэж байгаа юм шүү.



Томхон зулзага дээр үед айлын хоёр хүүхдийн зургийг бас яг иймэрхүү дан А үсгээр зурж өгөөд өнөөдүүл минь бөөн баяр. Жаазлаад өлгөчихсөн байдаг юм. Нэлээд олон жилийн өмнө л дөө.


Хоёр хүүхдийн нүүр царайных нь онцлог зэргийг хөөрхөн гаргаж өгсөн байсан. Одоо ч очихдоо харах их сайхан, охиноороо бахархаад л, өөрийн эрхгүй инээмсэглэл тодордог юм.


Энэ ном бас тийм. Гэхдээ нэгхэн үсэг биш, бүх үсэгнүүдийг зурагт оролцуулчихсан. Жишээ нь охины нэг нүдийг ХА үсгээр, нөгөө нэг нүд хамар хоёрыг НА үсгээр, амыг Ко үсгээр зурсан байна.


Гэх мэтчилэн үсгээр зураг зурсан. Номоо уншихаас гадна хүүхэд үсэг нүдлэхэд нь дажгүй дасгал болж өгнө.


Шинэ долоо хоногт нь амжилт хүсье.

Сарнай ба амттан

Том зулзага дурлаад худалдаж авсан мини сарнай. Анх жижигхээн байсан чинь дээшээ ургаад л байгаа. Бас хэдхээн сарнай байсан чинь үржээд, бараг жилийн дөрвөн улирал цэцэглээд хагдраад, цэцэглээд хагдраад гээд явчихдаг юм билээ. Их гоёмсог. Жаахан шунаад өөр ягаан өнгийхийг авдаг юм билүү гэж бодоод байгаа. Хэ хэ. Өөрөө арчлахгүй байж шүү.

Энэ эртээд ажлынхаа нэг хүүхэнтэй, солонгосоос ирсэн нэг дадлагажигч хүүхэнтэй бага зулзага бид хоёр зугаалсан үед идсэн бялуу. Дээрх цэцгийг нь идэж болно. Хэ хэ. Энд ер нь галуу шувууны махнаас гадна цэцэг навч бас идчихээд л байна. Хи хи.

Ажлын газрынханд минь бэлэглэсэн солонгос чоко. Дотроо хатаасан гүзээлзгэнэтэй. Хайрцган дотроо гурван янзын амттай. Олон ширхэгтэй, би гэрийнхэндээ бас амсуулаад амжчихсан. Хэ хэ. Манайхан угаасаа заримдаа манай гэрийн гишүүдийг бас мартдаггүй нь уярмаар. Охид минь дараагаар нь нэхээд байгаа юм биш үүе?
-Ээж ээ, өнөөх гого чоко чинь дуусчихсан уу?
-Дуусчихсаан, хөөрхөн үрс минь.

Бас л ажлынханд минь хэн нэг нь авчирч өгсөн чоко. Хавай-нх. Дотроо хан боргоцой орсон. Гэхдээ дээрх гүзээлзгэнэтэйг бол гүйцэхгүй юм билээ.

Мөн л ажлынханд минь бэлэглэсэн. Токиогийн бэлэг. Таргалчихна гэдэг мөнхийн сэдэвтэй би ч ганцхан ширхэгийг л амссан. Хэ хэ.

Ингээд л би бондгор хэвээрээ, хэвээрээ ч гэж дээ улам л бондойчих гээд байдаг юм шүү дээ. Нэг хэсэг өөрийнхөө хувийг гэртээ авчраад л гэрийнхэндээ өгөөд л мундаг байсан чинь байхгүй ээ. Монголын хууль гурав хоног гээч л болсон. Хи хи.



Цаашид улам бондойчихгүйг хичээгээд, өөрөө өөртөө амжилт...

Бага сургуулийн сонин хачингаас

Мартаагүй дээрээ бичих гээд...

1. Бичих гэрийн даалгавар өгч эхэлсэн. Хирагана үсгээ нэг нэгээр нь бичүүлж байна. Багахан зулзага минь гялс мялс биччихээд л нэг бол гадаа тоглох, нэг бол зурагт үзэх гэж зүтгээд. Гадаа тоглох нь ч яахав, 200 хувь санал нийлээд бараг л хөөж гаргаад байгаа.

Сургуульд орсноор ойр хавийнхаа нэг сургуулийнхаа хүүхдүүдтэй танилцаад, ганцаараа орж гараад гүйдэг болсон. Ээжид мөн ч амар байна. Тэр хоолонд хоолоо хийнэ, нэг бол хэсэг амарна.

2. Сургууль дээр нь нийт сурагчдыг хамарсан эрүүл мэндийн үзлэг явагдсан. Дунд сургуульд бас адил. Саяхан зүрхний бичлэг хийсэн үзлэг нь хэвийн гэж гарсан. Шүдний үзлэг, харааны үзлэг, мөн шээсний шинжилгээ авсан. Гэр гэрт нь жижигхээн тусгай сав өгч явуулаад өглөөнийх нь шээсийг хийж авчрана.

3. Сургуулийнхаа номын сангаас ном зээлж эхэлсэн. Эртээд гурван ном зээлж ирсэн. Гэрийн ном улам л хөглөрөх шинжтэй. Одоогоор 5 номын сангаас зээлж ирсэн ном гэрээр нэг хөглөрөөстэй. Дунд сургуулийн, бага сургуулийн, хотын, мужийн, манай ажлын гээд таван номын сан.

Нэг удаад зээлэхдээ 3 ном зээлдэг юм байна, нэг дүгээр ангийнхан. Баасан гараг бүр зээлсэн номоо хийх уутаа авч яваад, өдөр нь номоо зээлээд авчрана. Даваа гарагт буцаана.

4. Ямар нэг арга хэмжээ зохиосны дараагаар тэр талаараа хүүхэд бүрийн гэрт зураг бүхий цаас хүргүүлнэ. Саяхан тамирын өдөрлөгийн тухай бичсэн нэг нүүр цаас ирсэн. Сурагчид бүгд маш идэвхитэй сайн оролцсон энэ тэр гээд л.

Гэснээс тамирын өдөрлөг дууссаны маргааш нь хичээл ороход багш нь ингэж асуусан гэсэн сурагчдаасаа.
-Тамирынхаа өдөрлөгт мундаг оролцсон гэж гэрийнхэндээ магтуулсан хүүхэд гараа өргөөрэй.
-Би, би, би...

Багахан зулзага гараа өргөсөн гэсэн. Хэ хэ. Угаасаа буухиа гүйлтэнд дөрвүүлээ гүйсэн чинь түрээлээд. Нүдэндээ ч итгэсэнгүй ээж бол. Хи хи. Турьхаан юм байгаа юм. Биеийн тамир буюу хөдөлгөөндөө жаахан тааруу... Харин зурах, хайчлах, наах, будах, нугалах гэх мэт зүйлд бол дуртай л даа. Үүнийг нь хөгжүүлэнгээ, бага зэрэг гүйж харайх гээд биеийн тамиртай найзлуулчих юмсан.

Гэхдээ энд бага дунд сургуулийн биеийн тамир гэж маш идэвхитэй, маш эрчимтэй явагддаг. Учир нь бие хаа эрүүл саруул байж хүүхэд сурлагадаа шамдана, хичээнэ, сурах тэмүүлэлтэй байна гэж ярьдаг, бичдэг улс.

Саяхан болсон нээлттэй хичээл дээр ч захирал багш нь энэ тухай маш тодорхой ярьж хэлж ярьж өгсөн.

Ямар сайндаа шинэхэн шавь минь
-Монголд би биеийн тамирын хичээлд хамгийн дуртай байсан чинь энд ирээд биеийн тамирын хичээлд үнэн дургүй болж байна аа, гүйлгээд байна гүйлгээд л байна.
гэсэн.

5. Удахгүй бассейных нь хичээл эхлэнэ. Усны хувцасны захиалга явагдсан. Бид эгчийнх нь өмсөж байсан усных нь хувцсыг өмсүүлж үзсэн болж байна лээ. Хэ хэ. Энэ ээж үнэн танхай ээж байна уу? Уут нь бас байгаа. Хайж олоогүй л байна, хаа нэгтээ харагдсан, үүнийг биччихээд хайж олно доо.

Гэх мэтчилэн томхон багахан хоёр зулзагынхаа, нэг хань ижлийнхээ, ажлынхаа, гэрийнхээ хооронд эргэлдээд л өдөр хоног асар хурдан өнгөрч байна даа гэж...

Бага сургууль дахь тамирын өдөрлөг

Миний нэг ажилтай давхцаад, би ч үнэнээ хэлээд л ажлаасаа чөлөө авлаа. Миний оронд өөр монгол хүн оролцоно. Амжилт хүсье.

Бас хотын нийтийн цэвэрлэгээтэй давхцаад. Гэхдээ энэ цэвэрлэгээ нь хар үүрээр гарч гудамжаа цэвэрлэнэ. Энэ цэвэрлэгээнд оролцохгүй бол араар нь муулдаг гэсэн. Хэ хэ. Би ч тоотой орж байсан болохоор зөндөө муулуулсан байх өө. Хи хи.

Яах вэ дээ, мэдэхгүйгээсээ болж оролцдоггүй, ажилтайгаасаа болоод оролцдоггүй, мартамхайгаасаа болоод оролцдоггүй гээд л шалтаг их байна өө. Хойшид яаж ийгээд л цэвэрлэгээнд гарч байхыг хичээнэ дээ.

Цэвэрлэгээ ч гэж дээ, бараг хоггүй хотыг чинь юугий нь цэвэрлэх вэ дээ. Замын хажуугийн өвсийг зулгааж энэ тэр.

Манайхны зурхай дээр байдаг газар шороо хөндөж болохгүй гээд заачихсан бол ч хэцүүдэх зүйлийн нэг дээ. Ккк. Ёс мэдэхгүй хүнд ёр халдахгүй гэгчээр өдөр бүр зурхай харахгүй болохоор амар. Хааяа нэг үс тайрахад сайн өдөр л хардаг юм байна.

Хань ижил цэвэрлэгээндээ гарч, том зулзага бид хоёр тамирын өдөрлөг дээр идэх өдрийн хоолоо бэлдсэн. Том зулзага дугуйлантай учир дүүгийнхээ тамирын өдөрлөгт оролцохгүй.

Тэр цаана харагдаж байгаа цагаан самбар байна аа даа, тэр бол хүүхдүүд талбайд орж гарах хаалга. Эцэг эхийн тэмцээнийн үеэр эцэг эхчүүд мөн тэр хаалгаар орж гарна. Дураараа тайлбай дундуур гүйж харайхгүй. Их ухамсартай оролцоно оо. Сүрхий.

Ер нь иргэдийн ухамсар л их чухал зүйл шиг байгаа юм.

4 өнгийн багт хуваагаад, өрсөлдөнө. Улаан цагаан өнгө нь биеийн тамирын хичээлдээ өмсдөг малгайныхаа өнгөөр. Хариун цэнхэр, шар өнгө нь малгайгаа цагаанаар харуулж өмсөөд дээрээс нь цэнхэр, шар өнгийн тууз зүүгээд л болно.

Тусад нь шар цэнхэр өнгийн малгай авч үрэлгэн хандахгүй. Иймэрхүү энгийн шийдэл нь маш их таалагдана.

Талбай нь ийм шороогоороо. Чулуу байхгүй. Хүүхдүүд хамаагүй л шороон дээр сууна. Гол нь тамирынх нь шоорт бөх гэж юүхэв. Боддоо, бид аниагийнх нь шоортыг дүүд нь шилжүүлчихсэн. Цагаан подволкийг нь шилжүүлэх гэсэн чинь суга нь шар байна гээд аав нь
-Авч өг, битий миний охин дээр хэмнээд бай.
гэж лүндэн буулгасан тул аргагүйн эрхэнд шинээр авсан. Аниагийнхыг нь борооны улирал зэргээр угаасан хувцас хатахдаа удаан үед ээлжинд гээд л байж байна. Хэ хэ.

Уг нь минималист болох гэж хичээгээд л байгаа юм, өөрийнхөө хэмжээнд. Гэр бүлийн бусад гишүүдийн эд зүйлс гэж бас л байна аа байна. Яалтай ч билээ.

Тэр асарт уригдасан зочид, багш сурагчид бэлэн байдалтайгаар дараагийнхаа тэмцээнд бэлдээд, шингэн зүйл ууцгаагаад хүлээнэ.

Хэрхэн хөгжөөн дэмжиж байгаагаар нь бас байр эзлүүлдэг тул, асарт хүлээж байгаа сурагчид ээлж ээлжээрээ дуу дуулж, үг хэлж багаа хөгжөөн дэмжинэ.

Өлгөөтэй далбаанууд, талбай дээрх цагаан шугам, асар, сандал ширээ зөөх, бөмбөр гэх мэт хөгжмийг зөөх гээд бүх ажлыг багш нар болон эцэг эхийн зөвлөлийн гишүүд эв найрамдалтайгаар, үнэнчээр, хөнгөн шингэнээр, хариуцлагатайгаар үүрэгт ажлаа гүйцэтгэнэ дээ.

Маш халуун өдөр таарсан. Хөл минь их сонин хэлбэртэйгээр наранд шарагдсихаж. Нүүрээ л хамгаалаад байснаас хөлөө хамгаалаагүй байх юм. Хи хи. Ирэх зунаас нааш зүгээр болохгүй гэсэн. Яадаг юм билээ?

Гэснээс их л халах шинжтэй, давж гарах л байгаа даа.

Бас энэ бага сургуулийн тамирын өдөрлөгийн тухай олон ч жил бичиж байна даа тэ, залхууралгүй уншсанд баярлалаа.

Нагоя

Энэ Японд Нагоя гэж нэг хот байна аа. Айчи мужийн төв хот. Мужийн захиргаа байрладаг хот.

Тэр хотынхноос найз нөхдөөр минь олон сайхан залуус тодроод байна аа. Хэ хэ.

Эртээд энд байж байгаад Нагоя хот руу явсан эгч ирээд явсан. Нагоя хотынхоо болон Нагоя их сургуулийнхаа амттангаас бэлэглэсэн гэж байсан даа.

Энэ удаад мундаг коохай найз ажлаар ирээд, манайхаар ороод гарсан. Бас л амттай сайхан нутгийнхаа идээнээс бэлэглэсэн. Бид амаа олохгүй л идлээ. Хэ хэ.

Нэгэн шавь минь бас сураад л яваа тэнд. Хэдэн жилийн өмнө манайд ирээд л, бид чавганы дарсаараа дайлах гэсэн чинь насанд хүрээгүй байсан шд, золиг чинь. Хэ хэ. Энэ удаад уулзвал эрүүл энхийн төлөө хундага тулгана аа. Аймаар уудаг гэж ойлгогдохоор л бичих юм тэ би. Энд чинь ер нь хүмүүс тааруулаад уучихдаг болохоор их амар.

Бид тэгж байгаад нэг Нагоя явна байгаа гээд л ярилцаад байна. Яг хэдийд явахаа хэлж мэдэхгүй л байна.

Найз нөхдийнхөө амьдардаг газартай ойрхон үзээд харчихаар аятайхан аялал жуулчлалын газар хайж байгаад, орохыг хичээнэ ээ.

Олон сайхан найз нөхөдтэйгөө уулзахаар нэг л нартай өдөр гараад жирийнэ дээ. Та хэд минь тэвчээртэй хүлээж байгаарай. Хэ хэ. Суугуул нутгийнхаа идээний дээжээс аваад л очно.

Ийм хайрцагтай, мэдээж энэ хайрцаг нь гадуураа бэлэгний цаасаар боосон. тухайн муж, хот, сумынхаа нэр бүхий ч юм уу? онцлог шинжийг харуулсан цаасаар боож тавих нь хэвийн үзэгдэл. Тэр цаас нь өнгийн цаас байвал бид бас бяцхаан зүйлд ашиглачихна аа. Ер нь шууд хогийн сав руу чулуудахгүй л гэж үзнэ шүү дээ. Кино энэ тэр дээр гардаг шиг бэлэгний гаднах цаасыг хайш яайш ураад л хаядаг дүр зураг байдаг даа. Би бол тийм биш, аль болох эвтэйхэн, уралгүй задлана. Дараагаар нь тэр цаасаа охидтойгоо хамт хийх гар урлалдаа ашигладаг юм.

Дотроо ийм гоё олон ширхэгтэй. Хэ хэ. Мэдээж цөөхөн ширхэгээр савласан нь ч бий. Ажилчдынхаа тоогоор, зочлох айлынхаа гишүүдийн тооноос хамаараад л дотроо цөөн тоотойгоос авах уу? олон тоотойгоос авах уу гэдгээ шийднэ.

Манайх цөөхөн ажилчидтай тул ихэвчлэн цөөн тоотойг л авдаг.

Бас энэ цаасан хайрцгийг нь хэр бат бөх байна гэдгээс нь шалтгаалаад япончууд бас их олон зүйлд ашигладаг. Жишээ нь манайх оригами-нуудаа хийж тавьдаг. Охидынхоо элдэв жижиг сажиг "үнэт эрдэнэс"-ийг хийдэг гэх мэт. Хэ хэ.

Жаахан далийгаад явчихаж, за энэ Нагоя хотод зөндөө л олон монголчууд сурч, ажиллаж амьдардаг гэж дуулсан. Бүгдийнх нь сурлагад, ажилд амжилт хүсье.

Ном ба япон хүний зан чанар 2

Номоо уншаад л яваа. Удаан уншиж байна уу? Ийм л болчихоод байна. Хэ хэ.

Япончуудын онцлог зан чанаруудаас нь мартаагүй байгаа дээрээ гээд бичиж байна шүү. Та бүхний япончуудын тухай төсөөлөлд чинь хувь нэмэр болох болтугай...

4. Суурь боловсрол өндөр.

OECD (Organization for Economic Cooperation and Developmen) буюу Эдийн засгийн хамтын ажиллагаа, хөгжлийн байгууллагаас 3 жил тутамд нэг удаа явуулдаг 15 настангуудын суурь боловсролын төвшинг тогтоох PISA(Programme for International Student Assessment)
гэдэг судалгаанд японы сурагчид математикаар эхний 8-т, унших чадвараар эхний 4-т, физикээр эхний 4-т ордог гэнэ. 2012 оны судалгаагаар.

Энэхүү суурь боловсролын өндөр төвшин нь зөвхөн нэг хүрээллийг хамарсан биш улс даяарх нийт сурагчдыг хамарч чаддагт гол ач холбогдол нь оршино.

5. Нийгмийн аливаа дүрэм журмыг чандлан сахьдаг.

Маш том жишээ гэвэл 2011 оны 3 сарын 11-нд болсон газар хөдлөлт, цүнамигийн үеийн дүх зураг. Тэр айхтар гамшигт нэрвэгдчихээд байж дэлгүүрт, бинзен клонкын газарт яс дугаарлаад зогсох япон хүмүүс. Энэхүү зураглал дэлхий нийтэд цацагдахад Америк, Ёвропын олон орнууд биширсэн гэж байгаа.

Их яригдсан даа тэ. Тэгтэл манайхан далимдуулж нутаг буцах гээд, онгоцны буудлаар нэг хөгөө чирсэн гэж шивэр авир гэх юм билээ. Ганц манайхан ч биш, хятадууд бас тэрүүгээр нэг шуугисан гэдэг

6. Хэрэглэхэд хялбар, загвар хоёрыг хослуулж чаддаг.

Жишээ болгож японы бичгийн хэрэгслийг хэлэх байна. Бал, дэвтэр гээд л.

Би ч бичгийн хэрэгсэлд дуртай, эдний. Анх оюутан байхад япон хүнээс бал, балын харандаа бэлгэнд аваад л их баярлаж билээ. Бал нь удаан дуусдаг байсан. Манай гэрийнхэн ч намайг энд ирсний дараагаар бал их захьдаг байлаа. Дүү минь оюутан байсан болохоор, япон бол их гоё гардаг, удаан хэрэглэгддэг гээд л дуртай байж билээ. Одоо ч дуртай.

Тийм болохоор одоо ч монгол дахь хүмүүст бэлгэнд бичгийн хэрэгсэл бэлэглэх дуртай.

Мөн япончуудын повер пойнт ашиглаж хийсэн илтгэл, тайлан маш ойлгомжтой байдаг. Өнгөний хослол, график дүрслэл гээд л хүн хараад ойлгогдохоор байдаг.

7. Ангилж ялгахдаа гарамгай.

Үүн дээр бэнто бако буюу үдийн хоолоо хийж авч явдаг савны тухай дурдаж. Гадаад оронд ийм үдийн хоолоо хийж авч явдаг сав дэлгэрч байгаа ч нэг саванд багтааж хийж авч явах биш, олон саванд хийж авч явах нь элбэг. Харин япон хүмүүс жижиг хоолныхоо саванд үдийн хоолоо ногоо, будаа, мах загасаар нь чадварлаг гэгч нь ангилаад, ялгаад хийчихдэг.

За энэ бол тун үнэний ортой. Би бас тэгж чаддаггүй. Нэг л төвөгтэй санагдаад байдаг юм. Угаасаа гал тогооны ажлаас дөлсхийдэг болохоор ч тэр юм уу? Яваандаа суралцана аа гээд төлөвлөсөн зүйлийн минь нэг. Хэ хэ.

8. Маш жижигхэн зүйлийг ч нямбай хийдэг.

Худалдаа хийгээд, бэлгэнд өгөх юм аа гэвэл маш нямбай гэгч нь боож, чимэглэж өгдөг. Энэ үйлчилгээ нь үнэдээ багтсан байдаг ихэвчлэн. Мэдээж үе үе тусдаа төлбөртэй байх тохиолдол байна. Ийм үйлчилгээ гадаад орнуудад тун ховор үзэгдэл.

Мөн аливаа бичиг цаас, ажил дээр ч жижиг гэлтгүй нямбай ханддаг.

9. Аливаа зүйлийг урьдчилан харахдаа гаргууд.

Аливаа хурал цуглаан, арга хэмжээ зохиохдоо зочид төлөөлөгчид тэгэх болов уу? ингэх болов уу? гэж төсөөлөн, урьдчилан бэлдсэн байдаг. А төлөвлөгөөгөөр зохион байгуулна, хэрэв ямар нэгэн өөрчлөлт орвол Б төлөвлөгөөг хэрэгжүүлнэ гэж зайлшгүй бэлдсэн байдаг.

Мөн үйлчилгээний салбарт ч их байдаг. Жишээ нь жижигхээн хоолны газар орсон ч үйлчлүүлэгчийн ам нь цангаж байгаа гэж үзэн захиалга авахаас өмнө хүйтэн ус, цай авчирч өгдөг.

Гэх мэтээр гадаадад гарч ажиллахад япон хүмүүсийн эзэмшсэн чанарууд нь тэдний олон улсад үнэлэгдэх зэмсэг нь болж өгдөг.

Бидний монголчууд бас аливаа орчинд дасан зохицохдоо сайн, юмыг амархан сурдаг гээд л онцлогтой чанаруудтай даа. Тэрийгээ улам өнгөлөөд, олон улсад хүлээн зөвшөөрөгдөөд гялалзаад байж дээ.

Амжилт хүсье...

Номын тэмдэглэл үргэлжиж ч магад, үгүй ч байж магад...

Ном ба япон хүний онцлог чанар

Зээлсэн номоо уншиж дуусгах сарын аян амжилттай явагдаж байна аа.

Учир нь бага зулзага бага сургуульд орсноор өглөө 7:30 гэхэд гэрээсээ гарна. Би цуглах газарт нь хүргэж өгөөд ирэхэд 7:45 хавьцаа болно.

Тэгээд том зулзага гарч явна.

Гэртээ ганцаараа үлдэнэ. Шинэхэн шавьтайгаа хичээллэх хуваарьтай бол эрт гарна. Хэрэв тийм хуваарьгүй бол өөрийн үндсэн ажил эхэлтэл ганц цагийн чөлөө гарна гэсэн үг.

Тэр цагаа элдэв жаран чавганцынхаа ажилд зарцуулаад дуусдаг байсныгаа больж ном уншихадаа зарах санаатай. Одоогоор гурав дахь хоногтоо явж байна.

Оршил урт болчихлоо. Хэ хэ.

Энэ удаагийн ном бас л их сонирхолтой ном байна. Япон хэл мэддэг хүмүүс хараад шууд унших сонирхол төрнө гэж бодож байна. Мөхөс миний орчуулгаар "Дэлхийн хэмжээнд ажилладаг хүн болох"? гэдэг гарчигтай.

Зохиогч Тажима Майко нь НҮБ-ын WFP-т ажилладаг япон хүн. 2014 онд хэвлэгдсэн ном байна шүү. Тэгэхээр одоо ажил нь солигдсон ч байж магад.

Ажлын хүрээнд дэлхийн 7 улсад ажиллаж амьдарч байсан. Нийт 60 гаран улсын иргэдтэй
ажлын шугамаар уулзаж учирч байсан.

Уншиж дуусаагүй байгаа ч мартаагүй байгаа дээрээ түүний бичсэн япон хүний давуу зан чанар, талуудыг эндээ бичиж тэмдэглэхээр шийдээд. Тэгэхгүй бол уншиж дуусчихаад бичих гэхээр зарим нэг зүйлийг орхигдуулах гээд байдаг юм.

1. Цагийг маш сайн баримталдаг.

Аливаа уулзалт цуглаан, хурал зэрэг эхлэхийн дор хаяж 10 минутын өмнө ирэх нь хэвийн үзэгдэл, нийгмийн хүний зайлшгүй үүрэг гэж үздэг тал нь дэлхийд гарч ажилладаг япон хүмүүсийн давуу тад болж өгдөг.

Цаг баримталдаг хүнд хүмүүс итгэл үзүүлдэг.

Цаг барьдаггүй орны тухай ганц нэг жишээ дурджээ.

Үүнд би Монголд 2 жил ажилласан шавийнхаа хэлснийг санаад. Монгол ажилчид нь өглөө ч тэр, өдөр цайндаа явихчаад ч тэр хэзээ ч цагтаа цуглаж байгаагүй. Өдөр цайны цагаар яг 13 цагтаа хүрч ирэхэд хэн ч ирээгүй, би дор хаяж 30 минут, тэгээд л 1 цаг, 1 цаг 30 минут хүлээдэг байлаа. Сүүлдээ тэд санаа зовсон уу? яасан? надад түлхүүрээ өгөөд, би ч цагтаа ирээд л өрөөндөө ажлаа хийгээд сууж байдаг байлаа. Тэд ч  над руу яаралгүй цайгаа уучихаад ирдэг байлаа. Гэж тоглоом шоглоом болгож ярих.

2. Ажлаа дуустал нь хариуцлагатай хийж гүйцэтгэдэг.

Яон хүмүүстэй ажиллахад их амар байдаг гэж их сонсдог. Ажлаа хугацаанд нь гаргаж өгдөг. Зарим орны хүмүүст эцсийн хугацаа тэдэнд шүү гээд заачихаад байхад л хээв нэг хэдэн өдрөөр хоцордог. Шалтгаан нь товч бөгөөд тодорхой, өөр ажилтай байгаад амжсангүй.
Мөн дуусгах ёстой ажил нь байсаар байтал тараад явчихдаг, тэгэхэд япончууд ажлаа цаг хугацаанд нь дуусгах гээд илүү цагаар сунаж ажиллаад яс л хугцаандаа амжуулах нь биширмээр.

Хэ хэ. За энэ бас бидэнд ч бий тэ. Урдны ажилдаа монголчуудтай их харьцдаг байхдаа эхэндээ ч гэнэдээд яг л цагийг нь үнэнчээр хэлдэг байсан бол сүүлдээ хашраад ганц нэг өдрийн запастай хэлдэг болж билээ. Мөн цагтаа цуглаарай гэж цаг хэлэхдээ дор хаяж 10 минутын запасатай хэлдэг гэж байгаа. Хэ хэ.

3. Элдэв хэрүүл маргаанаас зайлсхийдэг.

Дуугаа өндөрсгөөд л, өөрийн сэтгэлийн хөдлөлөө дарж чадахаа байх зүйл ажлын байран дээр тэр бүр гаргадаггүй. Өөрийн үзэл бодлоо хэт дөвийлгөн бусдад тулгаад байдаггүй. Элдэв ааш гаргаж цуг ажиллаж буй багийнхаа уур амьсгалыг эвдээд байдаггүй.
Ажил дээр нь хоёр хүн маргалдаад, бараг хэрэлдээд, барьцалдаж авах нь холгүй байсан ч чимээгүй пс-гээ ширтээд, ажилдаа анхаарлаа төвлөрүүлж байгаа мэт дүр үзүүлдэг. Энэ нь нэг ёсондоо хэн нэгнийг нь өмөөрч, байдлыг улам хурцатгах биш, харин ч намжихыг нь хүлээдэгт гол шалтгаан нь байдаг. Мөн нийтийн эрх ашгийг өмнөө тавьдаг.

За энэ чанар өнөөх эдний багаар ажиллах ур чадвар гээч зүйл нь шүү дээ. Эдний ажлын байрны зар дээр багаар ажиллах чадвартай гэдэг заалт байдаггүй, учир нь ихэнхи хүмүүст энэ чадварыг бүр багаас нь суулгасан байдаг.

Гэх мэтээр бичиж. Үргэлжилнэ...

Ном ба сайн дурынхан

За энэ тав дугаар сард номоо уншиж дуусгах сарын аян зохиохоор шийдсэн.

Японд уншихгүй байж ном цуглуулж өрж тавьдаг цүндокү гэж хэллэг байдаг юм. Би энэ хэллэгт яг тохироод байна.

Уншиж эхлээ ч үгүй байж монголоос ном захиад, хань ижилдээ загнуулаад байна. Хэ хэ.

Гэрт байгаа номыг болохоор "за яахав, байж л байх юм чинь, номын сангийн номыг л түрүүлж уншиж дуусгах минь." гэж номын сан ороод л, өөрийн мэдэлгүй дахиад л зээлчихээд, гэдэг үйлдэл давтагдаад.

Сая уншиж дуусгасан ном хөөрхөн, гол нь хөнгөхөн. Сайн дурын үйл ажиллагаанд оролцож, өөрийн ертөнцийг харах үзлээ өөрчилсөн таван бүсгүйн тухай. Тухай ч гэж дээ, хувийн амьдралынх нь тухай биш, хэрхэн яаж яваад сайн дурын үйл ажиллагаанд яваад орчихсон? ямар улсад сайн дурын ажилтнаар очсон? тухай нь товч бөгөөд тодорхой хүүрнэн ярилцсан ном.

Бүгд л миний үеийн, ганц нэг эгч, ганц нэг дүү хүүхнүүд. Оюутан байхдаа, цагийн ажил хийж мөнгөө цуглуулаад, гадагшаа явж галуу шувууны мах идэж, юм үзэж нүд тайлах хүсэл мөрөөдөлтэй байсан.

Хүсэлдээ хөтлөгдөн Азийн буурай хөгжилтэй оронд, ганц нэг хөгжинүй оронд очсон.

Аль 2004 онд хэвлэгдсэн ном гэхээр амласан үеийнх. Одоо тэр буурай орнууд нь хөгжөөд, өөрчлөгдсөн байх тэ.

Монгол гэж гарсангүй. Хэ хэ. Иймэрхүү номд эх орны минь тухай гарч уу? гараасай гэж битүүхэндээ хүснэ ээ. Яаж зүгээр байхав.

Үсэгний хэмжээ хэт жижиг биш, үгийн сонголт хүнд биш тул нэг их удаан уншсангүй. Дорхноо л дуусчихлаа.

Хөгжингүй орны оюутан залууст боломж их байх юм тэ. Монголд ч сүүлийн үед манийхтай харьцуулахад асар их боломж байгаад л байх юм тэ. Зөв ашиглаж чадвал.

Тээр жил оюутан байхдаа скаутын нэг цуглаанд сайн дураараа оролцож билээ. Хүүхдийн зуслан ч явж үзээгүй надад маш содон, хөгжөөнтэй, шинэлэг зүйл байж билээ. Тэрүүхэндээ хөөрхөн дурлалын романстай. Хэ хэ.

Галын наадам дээр дурлахдаа гарамгай охидууд дурлалт залуутайгаа бүжиглэх тактик зохиож мохиогоод л. Хэ хэ.

Сүүлийн үед энэ нүүр ном дээр цацагдсэн шиг хагас шалдан охин нэг бандитай учиргүй үнсэлцээд зогсоод байсан шиг, бас хэдэн хөвгүүд согтуу хэрэлдээд байгаа шиг энэ тэр зүйл болдоггүй л байж. Эсвэл би тэрнээс нь хол явсан юм болов уу?

Гэхдээ 8 дугаар ангиа төгсөхөд бас их инээдэмтэй зүйл болж билээ, хааяа бодохоор инээд хүрээд байдаг юм. Та нарт бас тийм хөгтэй зүйл байдаг л биз дээ?

Оюутан залуустаа хандаж хэлэхэд залуу насандаа хөгжиж цэнгэлгүй л яахав? Гол нь зөв, ариун байх. Мөн нийгмийн сайн сайхны төлөөх сайн дурын үйл ажиллагаанд идэвхитэй оролцоорой гэж хэдэн оймс илүү элээж байгаагынх сургааль айлдчихая. Хи хи.

Бүгдэд нь амжилт хүсье...

Шинэхэн шавь

Гэснээс саяхнаас шинэхэн шавьтай болов. Гэхдээ монгол. Хөөрхөн банди ирсэн байна, эндхийн нэгэн дунд сургуульд.

Тэгсэн дунд сургууль нь хотынхоо боловсролын газартай зөвлөлдөөд, хотын боловсролын газар нь манай ажилтай зөвлөлдөөд, ажил минь надтайгаа зөвлөлдөөд. Би нь багшаар тодров. Хэ хэ.

Угтаа япон багшаар заалгах гэж байснаа эхний хэдэн сар монгол хүнээр заалгасан нь дээр гэдэг шийдэлд хүрсэн бололтой, дээрх хүмүүс.

Тэгээд л би нь гэнэт шинэхэн хөөрхөн шавьтай болчихсон.

Шавьтайгаа очиж уулзав. Багш нар, захиралтай нь уулзав. Дажгүй сайхан хүмүүс байна. Олзуурхав.

Ирэх долоо хоногоос чармайж хичээнэ дээ. Мэддэг зүйлээ чадлынхаа хирээр зааж өгөөд, мэдэхгүй зүйл гарвал хамтдаа суралцаад л явна даа.

Их сургуульд байхад мундаг багш нар минь бас толь бичигтэйгээ явдаг байж билээ. Төгс мэддэг байх хэцүү, мэдэхгүй зүйл багш нарт нь ч бий, шавь та нартайгаа хамтдаа суралцаад явна шүү дээ.

Гэж хэлж байсан нь миний толгойд баттай хадагдаж. Би ч бас уртаашаа өргөөшөө хэдхэн монгол шавьтайгаа бас л ингэж зузаан толь бичгээ тэврээд л хамтдаа хичээллэдэг байлаа.

Эртээд нэг шавийнхаа ээжээс
-Мэдэхгүй ханз болон үгээ шууд утгыг нь хэлэхгүй, толь бичгээс хар... гэж ирээд л заадаг байсных нь ачаар би овоо хэдэн ханзтай болсон шд.
гэж хүү минь хэлсэн. Гэхийг сонсоод ямар их баярласан гээч. Хэ хэ.

Өөрийн багш нарын надад үлдээсэн энэ л аргаараа заагаад явахад нэг их буруудахгүй бололтой гэж урам авав.

Ажлынхантайгаа зөвлөлдөж нэг хөөрхөн номоор хичээлээ заах болов. Шавь багш хоёрт зориулж цоо шинэ ном бэлдэж өгөв. Номын сандаа бүртгэж аваад, удаан хугацаагаар зээлээд л үзэж тарна даа. Хэ хэ.

Хэдэн сарын байдлыг харж байгаад шавь маань тодорхой хэмжээгээр ойлгодог болоод ирэхээр япон багш орж эхлэнэ. Харин би үргэлжлүүлээд заах эсэхийг сайн мэдэхгүй л байна. Миний үндсэн ажлын цаг завыг харж байгаад л шийдэх байх бид бүхэн.

Шавьдаа болон өөртөө амжилт хүсье.

Хойшид үе үе шавь бид хоёр гэдэг бичлэг бичдэг болох нь. Хэ хэ.

Шавиас захидал ирэв

Нэг шавь өвөө маань сайн дурын ажилтнаар Канбож улсыг зорьсон гэж бичиж байсан даа.

Яваад нэлээд хэдэн сар болов. Сардаа нэг удаа захидал ирүүлнэ. Хөөрхөн. Би догдлоод л уншина. Зурагтай бас.

Би тэр бүрт нь хариу өгч чадахгүй ээ. Нэгтгэж байгаад л бөөнддөг гэж байгаа.

Намайгаа марталгүй ингэж захиа занаа өгдөгт нь баярлаад байдаг юм. Миний япон хэлэнд ч хэрэгтэй. Дунд нь мэдэхгүй үг хэллэг, тэр бүр хэрэглээд байдаггүй хэлц энэ тэр байдаг болохоор емайл хаягаа шалгах бүртээ нэр нь байж байвал инээмсэглэл тодруулаад л өдөртөө эрч хүчтэй байдаг болж.

Хөөрхий муу шавь минь надаас захидал хардаг л байх даа. Одооноос дор бүр нь хариуг нь бичиж байна аа. Хэ хэ.

-Чи минь, ажил төрөл, гэр орон, үр хүүхэд гээд завгүй байдаг тул тэр бүр хариу гээд яах вэ?
гэдэг болохоор тэр үгэнд нь би санаа амарчихаад л яваад байна.

Зарим нэг япон хүмүүс ийм сүрхий мундаг байх юм. Хуучны харилцаагаа хүндэтгэж, цаашид ч үргэлжлүүлэх зорилготой байдаг.

Мэдээж дунд нь тэгсгээд хэрэг нь дууссан бол хэсэгтээ чимээгүй байдаг ганц нэг япон хүмүүс бий бий. Энэ олон хүн дунд сайтай муутай зүйл байлгүй л яахав. Би ч манай монголчуудад ихээхэн ажиглагддаг зан болохоор тоохгүй л дээ.

Ер нь манайхны дунд хэрэгтэй үедээ чухам найзаа, хайраа гэх нь холгүй байж байгаад хэрэг нь дуусахаар таг чиг болдог хүмүүс их тэ. Би ч өөрөө заримдаа удаан холбоогүй байсан хүмүүсээ гэнэт санаад асууж лавлах зүйл зөндөө гарна аа. Хэ хэ. Энэ алдаагаа засахыг хичээдэг ээ.

Уучлаарай та нар минь. Сэтгэлдээ бол байнга л та нарыгаа санаастай шүү.

За бүгдэд нь амжилт.

Анхны үзэсгэлэн

Том зулзага зургийн дугуйланд яваад нэлээд хэдэн жил болж. Энэ жил дүү нь явж эхлээд.

Тэгсэн ороод сар болов уу үгүй юу багш сурагчдын хамтарсан үзэсгэлэн гаргах болчихоод. Бага зулзага нэг зураг дуусгаж амжсан гэсэн.

Багш нь
-Гайхалтай бүтээлүүд болсон, нэрэлхэлгүйгээр зарлаарай, ирээрэй.
-За, гэрээрээ очно оо.

Угаасаа жил бүр л очдог юм. Зарим жил найз нөхдөө дагуулаад л очно. Энэ жил хань ижил өөр хөтөлбөртэй байсан тул гурван бүсгүй л явлаа.

Өө тэр багшийн зурсан бүтээлүүд бол тансаг, тасархай, өөр юу гээд байдаг билээ? Орчин үеийн хэллэгээр.

Их үнэтэй зарагддаг юм билээ. Ирээдүйд хоёр зулзага минь ингэж бүтээлээ зарах болов уу гэсэн шүү юм бодсон шигээ л нүд сэтгэлээ баясгав.

Багшийнх нь хэлснээр нэрэлхэлгүйлгээр нүүр номдоо зарыг нь оруулав. Хөрш айлын эмээ очиж үзсэн байсан. Дараагаар нь ёстой мундаг, ёстой хөөрхөн зурж гэж магтсан.

Одоо манайд хоёр жаазтай зураг өлгөөстэй байна. Урд жилүүдэд туурвисан аниагийх нь бүтээлийг заримыг нь монгол явуулчихсан, сүүлийн хоёр жилийх нь далд хийгээстэй. Өлгөх газаргүй гэх юм уу? Том зулзага өөрөө бас нэг их дуртай биш, өлгөх. Даруухан зан? эсвэл дургүй? альныг нь мэдэхгүй л байна.

Бага зулзага бол их дуртай, минийхийг хаана өлгөх юм бэ? Энд яг таарах юм байна гэж байгаад морин хуурын минь хажууд өлгүүлсэн.

За та нарынхаа мэлмийг мялааж багынхаа бүтээлээс л орууллаа шүү. Том нь загнаад унана, хэхэ.

Хойшид хоёр хүний бүтээл нэмэгдээд явахаар гэрийн хана минь дүүрээд, зарим нэгээс нь монгол руугаа явуулах хэрэг гарах байх даа.

Ямартай ч охиддоо уран бүтээлийн амжилт хүсье. Ээж нь охидынхоо бүтээлийг яаж ийгээд л энд тэндээ өлгөх газар олно оо олно. Бүр болохгүй бол дуудлага худалдаа явуулна аа. Хи хи. Эмээ өвөө нарын дунд л явуулах байх даа? Би ч ойр тойрныхондоо л наймаа хийж баяждаг хүн дээ гэж. Кккк

Анхны гэрийн даалгавар

Олон хоногийн амралт дуусч ажил албууд жигдэрч байна.

Бага зулзага анхныхаа гэрийн даалгаврыг авч ирсэн. Их хөөрхөн даалгавар.

Уран  уншлага. Жижигхээн шүлэг өгөөд, түүнийгээ гэрийнхэндээ уран, чанга, үгээ тод хэлж унших гэсэн даалгавар.

Тэрийг нь ээж аав нь дүгнэж, багшийн бэлдэж өгсөн тусгай хүснэгтийг бөглөнө.

Гурван удаа уншиж өгнө. Тооны далгавараа бас ингэж чанга дугаар уншина.

Нэг сонин нь цагаан толгойгоо заагаагүй байж ийм далгавар өгдөг. Бодвол ихэнх хүүхэд уншиж чаддаг байсан байх.

Бас дэвтрээ тараагаагүй л байна. Тусгай тараах материал дээр бичиж ирээд түүнийгээ гэртээ хадгалж байна.

Багшийн тавьдаг дүн нь улаан балын харандаагаар том цэцэг зураад л болоо.

Сургуульдаа дасах гэж л үзэж тарсан улс байх шиг байна. Номын сантайгаа танилцах, захирал багшийн өрөөгөөр орох, багш нарын өрөөгөөр орж үзэх гээд л.

Өө тийм, удахгүй тамирын өдөрлөг нь болно. Түүндээ бэлдэж өдөр бүр тамирын хичээл орж байна. Бага зулзага тамир талдаа жаахан эв дүй муутай ч хичээж байгаа гэсэн. Ер нь хоёр зулзага минь тамирын хичээлдээ нэг их дуртай биш, тэр тал дээр ээжийгээ дуурайсан юм шиг байгаа юм.

Багш нар бол " Өө хүн болгон бүх зүйлдээ сайн байх албагүй, хүнд чинь чадахгүй зүйл байлгүй яахав, санаа зоволтгүй" гэж хэлдэг тул би ч нэг их санаагаа чилээдэггүй л дээ. Хэ хэ.

Шинэхэн ээжүүд минь бас хүүхдээ супер болгох гээд сэтгэл санаагаа чилээв ээ, хамгийн гол нь эрүүл саруул л байх.

Бүгдэд нь амжилт...

Элсэн бүтээл

Алтан долоо хоногоор ирсэн зочинтойгоо үзсэн. Энэ жилийн сэдэв нь Америк.

10 дахь удаагийнх нь гэж байна. Цаг хугацаа ч хурдан юм даа. Анх гадаа ил талбайд болж байлаа. Тэгсэн одоо бүхэл бүтэн байгууламж бариад элсээр жуулчдыг татаад байна.

Жил бүр сэдвээ сольж, нураагаад л эхнээс нь бүтээнэ. Дэлхийн олон орноос барималч? урьж авчраад хийлгэнэ.

Хэзээ нэгэн цагт Монгол гэсэн сэдвээр хийх л байх даа. Хэ хэ. Тэр өдрийг хүртэл эндээ байж байвал ч гуяа алгадаад л үзэхээр гүйх байх даа.

Түүхэнд нэрээ үлдээсэн ерөнхийлөгчид нь. Би ч ганц нэгийг л мэдэх юм билээ. Том зулзага л тэр тэр гээд бүгдийнх нь нэрийг хэлж өгөөд байсан.

 За энэ бас хэн гэсэн билээ дээ.

 Үүнийг нэг юм мэдээд байгаа юм аа. Хэ хэ.

Угтаа Майкл Жорданыгаа байгаасай гэж бодож, горьдож байсан чинь. Уурандаа эртээдээс хойш нэг Жордан пүүз авах уу байх уу? гэж эргэлзээд байсныгаа очиж авдаг ч юм билүү гэж бодоод. Аваагүй л байна л даа. Хэ хэ. Уур гарчихсан чинь хэд хэдэн пүүзтэйгээ санаад.

Зарим нэг жилийн бүтээлийг үзээгүй алгассан байна лээ. Хойшид чадвал жил бүр үзэж байхыг бодно оо. Их ойрхон юм байгаам манайхаас.

Самар

Энд нэг япон найз маань самарны амтанд орчихсон.

Монгол явж буй хүнд самар л захиастай. Би тэрнээс нь хааяа хүртээстэй. Хи хи.

Бууз чимхэнгээ самраа цөмөөд л. Эх орны минь амт гэж цаанаа л сайхан шүү.

Зун монгол харьж ирэхдээ самар бэлгэнд өгвөл дуртай байж магад шүү. Мэдээж хүн хүнээсээ л болох байх. Залуучууд лав дурлах байх.

Солонгост бас байдаг гэнэ. Гэхдээ цөмчихснийг худалдаалдаг гэнэ. Солонгос хэл бие даан сурдаг ажлын газрын маань найз дурлаад цөмөөд байсан. Ингэж цөмдөг юм уу? Анх удаагаа л харж байна гээд. Мэдээж нэлээдийг дундуур нь тас хазсан. Хэ хэ.

Япон найз нөхдөд чинь санал болгох гэж энэ бичлэгээ бичив. Амжилт хүсье бүгдэд.

Ёстой хөөрхөн ном

Бага зулзага бид хоёрын ээлжит хөөрхөн ном.

Явуулын номын сан ирээд, бага зулзага өөрийнхөө карт, ээжийнхээ картыг оролцуулаад хориод ном зээлж ирсэн.

Тэгсэн дотор нь энэ ном. Суугуул нутагт минь уртаашаа өргөөшөө хоёр тэмээ байдгийг ч хэлэх үү? Бага зулзага гарчгийг нь хараад л сонгож зээлсэн байх.

Сүүлд ээждээ уншиж өгсөн чинь гарчигнаас нь эхлээд шууд эх оронтой минь холбоотой ном гэж мэдээд, чих тавин чагнав.

Ёстой хөөрхөн ном. Зураач нь ч эчнээ танил монгол бүсгүй. Хэзээ нэгэн өдөр уулзах завшаан гарвал баярлалаа гэж хэлэх юм шүү. Ажил үйлсэд нь амжилт хүсье. Таньж мэддэг хүн байвал уламжлаарай. Үргэлж талархаж явдаг элэг нэгт нь энд байдаг шүү гээд.

Гарчигнаас нь хараад л ойлгомжтой биз? Ингэ хөөслөөд ботго авахуулж байгаа тухай. Яг энэ тухай баримтат кино байдаг даа. Олон жилийн өмнө үзэж байсан юм. Тэмүжин өвөө минь бичиж өгч байсан санаад. Олж бага зулзагатаа үзүүлнэ дээ.

"Говийн дуу" гэдэг ном.

Говь нутагт хэзээ нэгэн цагт очиж үзнэ дээ.

Эндхийн хэсэг эмээ өвөө нар Говь явсан тухайгаа ярьдаг юм заримдаа. Үлэг гүрвэлийн чулуужсан яс зардаг, намайг худалдаж авах гэсэн чинь хажуунаас тэр гуай хуурамч байх аа наадах чинь, жинхэнэ бол ийм хямдхан зарах уу? гэж хэлээд би авахаа больчихсон.

Бас хөтөч орчуулагчтайгаа энэ талаар маргалдаад бараг л муудах дээрээ тулсан.

Хил гаалиар гаргахгүй, шал дэмий мөнгөний гарз болох вий дээ.

Гэх зэргээр хоорондоо шаагилдаж байснаа хууч хөөрнө өө.

Би ч очиж үзээгүй, бас тэр үлэг гүрвэлийн яс зэргийн талаар А ч үгүй хүн чинь одоо дуугай л байхаас яахав тэ. Хи хи.

За нэг иймэрхүү тав дугаар сарыг ч номтойгоо нөхөрлөөд, байгальтайгаа нөхөрлөөд, ажилтайгаа нөхөрлөөд, за ер нь юм юмтай нөхөрлөөд л өнгөрөөнө дөө. Бүгдэд нь амжилт хүсье.

Алтан долоо хоногоор

Японд сурдаг, ажилладаг, амьдардаг хүмүүсийн хүсэн хүлээдэг сарын нэг бол 5 сар аа гэж.

Учир нь нэлээд олон хоног амарчихдаг юм. Үндсэн хуулийн өдөр, хүүхдийн баяр, ногоожуулалтын? өдөр гээд гурван хоног дарааллаж амарна. Хагас бүтэн сайн өдөртэй дарааллан таарвал тав хоног амарна.

Мөн Токиод Хаврын баяр гээч зүйл болно. Бид нэг ч удаа очиж үзэж байгаагүй, хол учраас.
Нүүр номоор дүүрэн хаврын баярын тухай зураг хөрөг. Хурд хамтлаг ирж тоглож, мэдэж байгаагаас. Сүмочдын зураг хөрөг. Хуушуурны зураг хөрөг гээд л тэргүүлж байна.

Бид энэ жил суугуул нутагтаа даруухан л баярлав. Эхний нэг өдөр нь холоос зочид хар үүрээр орж ирээд, харанхуй болов уу үгүй юу дараагийн хүмүүс минь хүлээж байгаа гээд яваад өгөв.

2 дахь өдөр нь гэр зуур, ганц нэг дэлгүүр орж багахаан хэмжээний худалдаа хийв.

3 дахь өдөр нь хань ижил ажилтай, гурван бүсгүй орой ирэх зочноо хүлээж авахаар бэлтгэж өдрийг өнгөрөөв.

Орой нь зочинтойгоо элдвийг хамж шимэн ярьж, ууж идэв. Цагаан архи хууж үзээгүй гэхээр нь амсуулав. Ёстой бүтэхгүй зүйлийн нэг байна, дахиж амсахгүй шүү гэсэн. Хэ хэ.
-Ямар аймар юм уудын бэ? та нар чинь.
-Харин тийм ээ, үүнийгээ мөс зөсөөр шингэлэхгүй хатуугаар нь ууна гээч.
-Би ч шууд үхэх юм байна.
-Би ч үхчих гээд, уудаггүй юм өө, хааяа л ганц нэг амсана.

Ингээд яг амралтын өдөр дуусав аа гэж.

Хагас сайнд буюу өнөөдөр том зулзага дугуйландаа, шинэ багш ирсэн гээд хачин идэвхитэй байгаа.

Хань ижил ажилдаа.

Бага зулзага бидэн хоёр өглөө хүүхэлдэйн кино үзэв. Өдөр төгөлдөр хуураа давтав. Үдээс хойш төгөлдөр хууртаа явав.

Маргааш буюу бүтэн сайнд том зулзага нэгэн ахлах сургууль дээр очиж сургалтанд сууна. Өглөө эрт хүргэж өгөх ажилтай, орой нь тосож авах ажилтай. Мөн өдрийн хоолыг нь хийхэд тусална. Хэ хэ.

Хань ижил ажил дээр нь ирсэн хоёр монгол хүнийг дагуулж газар үзүүлнэ гэсэн.

Багахан зулзага бид хоёр гэрээ сахиад л үлдэх нь. Гэснээс ирэх долоо хоногт бас нэг хөөрхөн мундаг зочин хүлээж авна. Үсний боолт нэхэж тавих минь. Бас аяга угаагч.

Цэцгийн баяр

Жил бүр 4 сарын өдийд болдог юм. Хотын төв болох нэгэн гудамжныхаа замын хөдөлгөөнийг зогсоож байгаад баяр болно.

Хотод үйл ажиллагаа явуулдаг олон байгууллагууд бяцхан хэмжээний лангуу ажиллуулах нь ажиллуулж, урлагийн үзвэр гаргах нь гаргаж, байгууллагаа сурталчлах нь сурталчилна.

Бага зулзага бид хоёр сүүлийн 3 жил дарааллан явж байна. Нэг шалтгаан нь бага зулзагын цэцэрлэгийн найзууд их таарна. Биесээ харж хөөрөөд, тоглож гүйдэг юм. Бас нэг шалтгаан нь үнэгүй цэцэг болон жимсний модны үрсэлгээ, хүүхдүүдэд цэцгийн үр бэлэглэдэг юм.

Бид хоёр цэцэг сайхан ургасан. Харин нэрсний модныхоо үрсэлгээг үхүүлчихсэн. Энэ жил модны үрсэлгээ тараахгүй, дан цэцэг байсан.

Том зулзага, хань ижил хоёр энэ жил бас л ажилтай, албатай байх тул бага зулзага бид хоёр л явав. Гэхдээ бид хоёрыг гарах гэсээр байтал аниа нь тарж ирэх цаг болчихоор нь нэг мөсөн өдрийн хоолоо идчихээд аниагаа хүлээж байгаад цугтаа явлаа.

Далимд нь ойрхон номын санд зээлсэн номоо буцаан өгч, дахин ном зээлж гээд давхар туулай буудсан шиг явяв.

Явуулын үлгэр уншиж өгдөг эмээ байдаг юм. Бага зулзага тэр эмээгийн үлгэрийг чагнаад суучихав. Гэхдээ энэ сууж байгаа охин бага зулзага биш шүү. Жил бүр энэ арга хэмжээгээр үлгэр уншиж өгдөг. Сайн дурынх. Үүнийг бас их таалдаг даа.

Яг ийм тайз гэх юм уу? модон зүйлийг нэгэн байгууллагад хандаж байгаад монголд ганц нэг цэцэрлэгт бэлэглүүлж байлаа. Түүнийг ажилчид нь дуурайлган хийгээд, анги бүртээ нэг нэг ийм тайзтай болж байсан юм. Одоо ч түүнийгээ ашигладаг байх аа. Цэцэрлэгийн багш нарын ажил үйлсэд амжилт хүсье.

За энэ удахгүй 5 сарын 5-нд болох хүүхдийн баяраараа чимэглэдэг мөрөг загас. Хүүхдийн баяр гэж хуулиндаа заасан байдаг ч энэ мөрөг загасны чимэглэл нь эрэгтэй хүүхдийн ирээдүйг сайн сайхан байгаасай гэж бэлэгддэг.

Хөдөлгөөний дутагдалтай надад сайхан алхалт болов. Нэгэн урт гудамжийг бүтэн нэг тойрчихсон гэж бодохоор.

За нэг амралтын өдөр иймэрхүү.

Ирэх долоо хоногт алтан долоо хоног гээд хэд хоног амарна. Бид ямар ч төлөвлөсөн зүйл алга, гэхдээ холоос зочин ирнэ гэсэн. Хоног тоолоостой.

Таалдаг зүйлс

Бага, дунд сургуулийн бас нэг таалдаг зүйлээ бичих үү?

Өчигдөр дунд сургуулийнх, 5 сарын 2-нд бага сургуулийн багш нар ангийнхаа хүүхдүүдийн гэрийг яг хаана байрладаг, ангийх нь хүүхдүүд сургууль хүртлээ хэдий хэр хол явж ирдэг, дунд нь гэрлэн дохио хэр олон байна, ойр хавьд нь аюулгүй байдалд нь харшлах зүйл энэ тэр байна уу гэж танадах журмаар гэрийг нь хүүхэд нэг бүрчлэн явж үзнэ.

Гэрт нь орж барихгүй. Гаднаас нь л аан энд байдаг байх нь гэж харна, тэмдэглэнэ.

Ганц нэг ээжүүд таарвал ганц нэг үг сольдог. Би тэр бүр таарахгүй. Ажилтай таараад байдаг юм.

Энэ бас их дажгүй тогтолцоо байгаа биз?

Дээхэн үед гэрийнхээ ойрхон сургуульд л явдаг байсан үед багш нар бас сурагчдынхаа гэрийг хаана байрладгийг мэддэг байсан тэ. Одоо ч мэдэхийн эцэсгүй болоо биз дээ? Бүгд сайн сургууль хөөж гэрээсээ хол сургуульд явдаг болохоор.

Гэснээс миний сурагч байх үе сайхан байжээ. Ялангуяа бага анги. Хэ хэ. Үе үе дурсана аа. Нас ахиж байгаагийнх байх даа. Хи хи

Мөн таалдаг зүйлийн нэг нь өглөөд хичээл эхлэхээс өмнө 15 минут ном уншдаг явдал. Сурагчдын анхаарлыг төвлөрүүлэх зорилготoй.

Бага ангийн уншиж бичиж сураагүй байгаа сурагчид ч сургуулийнхаа номын сангаас дуртай зурагт номоо зээлж ирээд хардаг гэж эртээдийн хурал дээр багш нь хэлсэн.

Номын сан ч гэж үнэн тансаг дөө, бүр атаархаад аазгай хөдлөөд байдаг юм. Хэ хэ.

Өөр юу таалдаг билээ байз? Санахаараа дор бүр нь бичээд явна аа.

Та бүхэндээ амжилт хүсье, бас өөртөө...

Бага ангийн анхны зугаалга

1 дүгээр ангийн сурагч болоод анхных нь зугаалга.

Лхагва гарагт явах байсан чинь бороотой байгаад баасан гарагт явав.

Лхагва гарагт зугаалгаар явах тул өдрийн хоолоо өөрсдөө хийж авч явна. Бороотой байгаад зугаалга хойшлогдсон ч өдрийн хоолоо хийж авч явна. Учир нь сургуулийн өдрийн хоолыг хийж тараадаг газартайгаа тухайн өдөр хоол авахгүй гээд захиалгагүй байдаг тул.

Баасан гарагт бас л өдрийн хоолоо хийгээд аваад явав. Энэ удаад янзан бүрийн баатрын дүрс бүхий хоол хийгээгүй ээ. Цэцэрлэг биш тул гээд ээж жаахан залхуурсан.

Нэг инээдтэй нь цэцэрлэгийнхээ зугаалгаар дуртай нь аргагүй үүрээд явдаг байсан үүргэвчээ голов. Жижигхэн байна, миний биед багадаад байна энэ тэр гэж урвайж үзэв. Аниадаа нэг загнуулж, ээждээ нэг аргадуулж байж гайгүй тайвшрав. Хэ хэ.

Яг зугаалгаар явдаг өдөр нь гадаа цуглаад л явах болсон чинь нэг охин үүргэвчийг нь яасан жижигхэн юм бэ гээд хэлчихэв. Тэгсэн бага зулзага уйлаад зогсчихдог гэнэ. Буцаад харьж явсан би санаа зовоод яагаад уйлсныг нь асуусан чинь үүргэвчийг нь жижигхэн гэж хэлсэн, би ийм жижиг үүргэвчтэй явахгүй гэнэ.
-Миний охиных харин ч яг биед нь таарсан, хөөрхөн жижиг. Эд чинь жижиг биендээ нээх томдсон үүргэвчтэй, эсрэгээрээ их хүнд харагддаг юм.
гэж аргадав.

Санаандгүй жижиг гээд хэлчихсэн охин уучлалт гуйв.

Тэгээд л урвайсан юм л явсан. Өдөр нь харьж ирэхдээ цоглог хүн харьж ирсэн. Захилаа шд, нэг хүүхэд санаандгүй юм хэлэхээр л бидэнд гомдоллож уурладаг шигээ уурлаж урвайхгүй байх гэж. Яах юм байгаа юм.

Тэгсэн бас нэг инээдтэй нь лхагва гарагт ангидаа өдрийн хоолоо идсэн чинь ганц нэг ангийнх нь хүүхэд хоолны савыг нь, цайных нь савыг цэцэрлэгийн бацаанууд л сонирхдог зурагтай байна гэж хэлсэн гээд бас л урвайгаастай. Хи хи.

Бидэнд жаахан нялхаараа гэж санагдах авч өөрсдөдөө бол сургуулийн том сурагч бололтой.

Аниагаас нь гуйж, аниагийнх нь өдрийн хоолны саванд өдрийн хоолоо хийж авч явав. Цайных нь сав ямар ч арга байгаагүй тул бацаануудын сонирхдог зурагтай савандаа цайгаа хийж авч явав.

Зун дөхөж байна, цайных нь савыг шинэчилж өгье дөө гэж бодож байсан юм, нэг завандаа дэлгүүр явахаас.

Зугаалга нь бага сургуулийн бүх сурагчид хамтдаа явна. Нэлээд наана нь бага сургуулийнхаа хамгийн том анги болох 6-р ангийн нэг сурагчтай танилцаж, нөхөрлөнө. Зугаалганы үеэр тэр 6-р ангийн сурагч өөрийн дааж авсан 1-р ангийн бацаантай хөтөлж явна, хамт өдрийн хоолоо иднэ, хамт тоглоно гэх мэтээр хариуцна.

Гэх мэтчилэн хүүхэд томрох сайхан ч элдэв ааш маяг нь дийлдэхээ байгаад л ирэх юм дөө гэж. Бас нэг л ээжээс гарсан байж зан ааш нь ч өөр байх юм даа гэж. Хэ хэ.

4 дүгээр сарын ном

Өөрийнхөө уншсан номыг эндээ хальт оруулъя дөө. Ядаж л гарчгийг нь мартахгүй. Хэ хэ.

Сүүлийн үед энэ япончууд чинь өөрсдийг нь магтсан, биширсэн агуулгатай ном их хэвлэн гаргадаг болсоон. Зурагтын нэвтрүүлэг ч их байна.

Манай ажил ч тиймэрхүү номыг гарсан даруйд нь л худалдаад авах жишээтэй. Би таалагдсанаа л уншина, дунд нь бас арай л хэтрүүлээд магтчихсан ном байх шиг байгаа юм. Мэдээж магтаалд дургүй улс гэж юу байхав тийм ээ.

"Япон хүний мэдээжийн зүйлд дэлхий нийт гайхан биширдэг шалтгаан". За ёстой махчилан орчуулна гэдэг нь болоод байна шүү ойрд ч. Уран цэцэн орчуулах гэхээр толгойгоо асар ихээр ажиллуулах болчихоод. Хэ хэ.

Нээрээ л энэ зан чанар нь сүрхий шүү гэж боддог зүйлээ ганц нэгийг түүж орууллаа шүү.

1. Нямбай зан чанар.

2. Өөрийн гэсэн дүр зургийг чухалчилдаг.

3. Харилцан ашгийг сонирхдог. Зөвхөн нэг тал л ашигтай байх бус хоёр тал харилцан ашигтай байх гэсэн зарчим баримталдаг.

4. Хэн ч хараагүй байсан ажлаа сайн хийдэг. Зарим нэг гадаад орныхны баригдахгүй л бол яасан ч яахав гэдэг үзэл байдаггүй.

5. Өрсөлдөгчөө найз мэтээр үздэг. Өрсөлдөгч минь ялж байж би бас ялалт байгуулна гэж үздэг.

6. Цэвэрлэгээнд дуртай. Ажлын гадаах талбай, албан байгууллага, гал тогоо, шал зэргээ зүлгээд л байна, шүүрдээд л байна.

Энэ занг нээрээ их ажигладаг шүү. Эртэч өвөө эмээ нар гадаах үүд, довжоогоо шүүрдээд л зогсох нь их. Мөн бага, дунд сургуульд сурагчид өөрсдөө сургуулиа цэвэрлэнэ. Жорлонгоо ч өөрсдөө угааж цэвэрлэнэ. Энэ их таалагддаг. Тэгж байж ариг гамтай ханддаг байх, нийтийн өмчид ч гэсэн.

Тэгээд ч бүгд эрдэмтэн доктор болох албагүй, ажилчин анги ч нийгэмд асар том үүрэгтэй. Тийм үү?

7. Япончуудын аливаа зүйлийг эрэлхийлэхдээ, судлахдаа сайн гэж. Үнэний ортой. Жишээ нь амт чанарын хувьд нэг тийм цаанаа л өвөрмөц амтыг эрэлхийлээд, судлаад явдаг улс ихтэй. Ялангуяа ресторан, амттаны үйлдвэр зэрэгт ажилладаг, сонирхдог хүмүүс.

8. Хэрэглэгч та хаан. Бүрэн утгаараа хэрэгжинэ. Бөхөлзөөд л гүйнэ шүү дээ.

9. Нарийн ширийн, жижиг сажиг зүйлд анхаарал хандуулдаг. Гярхай.

10. Аливаа зүйлийг хуулбарлахдаа өөрсдийн онцлогт, хүсэлд, зан чанарт нийцүүлэн улам сайжруулан боловсруулахдаа гарамгай.

Гэх зэргээр бичжээ. Ирээд удаагүй хүмүүст хэцүү шүү. Иймхэн юмыг хэд дахин хэлдэг юм бэ? Толгой муутай юм уу хаашай юм, иймхэн юм цээжлээд явчихгүй, тэр бүр цаасаар булчих юм гэж их бодогдоно. Дасаад ирэхээр харин эргээд цаасаа нэхээд, цаасан дээр хэвлэж өгөхгүй юм уу гэж өөрөө нэхдэг болно. Хэ хэ.

Энэ нь ажлын хариуцлагатай холбоотой. Жижиг сажиг зүйлийг нэг бүрчлэн хэлээд өгчихсөн байхад ажил ч урамтай сайхан явагдана шүү дээ. Бид бас тийм болбол тэ.

Энэ бүгд чанарыгаа гадаад улсад ажиллаж амьдарч буй япон хүмүүсийнхээ ахуй амьдрал, амжилттай нь холбож жишээ авч тайлбарласан байв.

Тэр бүрчлэн орчуулна гэж юу байхав, боломжтой хүмүүс нь олж уншина биз дээ.
Суралцаад суралцаад явчихна даа, мундаг улсуудаас. Тийм ээ. Та нар минь ч гэсэн сэтгэлдээ тогтоогоод, суралцмаар зүйл байвал суралцана биз дээ?

За ёстой бүтэн нэг сар уншлаа даа хэхэ. Цаана нь өөр зөндөө гоё монгол, япон байгаа. Уншиж дуусаад зураг оруулна аа.

Ном дор мөргөмү...

Толгой ПИГ- 2

За том зулзагын сургуулийн нээлттэй хичээл.

Бүтэн сайн өдрийн үдээс хойш. Үдээс өмнө хичээл орно. Бүтэн сайн өдөр учир өдрийн хоолоо өөрсдөө хийж авч явсан. Өглөө эртлэн босч хийсэн бид хоёр.

Бага сургуулийн нээлттэй хичээлтэй адил дарааллаар явагдана. Эхлээд нээлттэй хичээл. Анги дааж авсан багш нь англи хэлний багш, эмэгтэй. Америк багштай хамтраад англи хэлний хичээл орсон. Ээж нь аан энэ үгийг мэдэх юм байна гэсэн шиг зогсов. Мэдээж мэдэхгүй зүйл нь 99 хувь. Хэ хэ.

Хичээл дуусахаар сурагчид тарна. Эцэг эхүүд үлдээд өнөөх урт хуралдаа сууна. Үдээс өмнө борголоо ууж аваад гарсан болохоор нойр хүрэх нь гайгүй байсан.

Баахан тоо бүхий тайлан, захирал багшийн үг, багш нарын танилцуулга.

Дунд сургуулийн 3-р ангийнхны хурал. 9 дүгээр анги гэсэн үг. Энэ 9 дүгээр анги их үүрэг хариуцлага өндөр. Учир нь ахлах ангид буюу 10 дугаар ангид дэвшин суралцах эсэхээ шийднэ.

Хүссэн сургуульдаа шалгалт өгөөд тэнцэх эсэх нь өөрсдөөс нь шалтгаалах үе.

Энэ талаар танилцуулсан. Хувийн ахлах сургуулийн шалгалтын хуваарь, улсын сургуулийн шалгалтын хуваарь зэргийг ерөнхийд нь танилцуулсан. Дугуйлан секцүүд 8 сараас ерөнхийдөө дуусна. Үлдсэн хагас жилээ ахлах ангид дэвшин суралцахад зориулна. Сур сур бас дахин сур гэдэг лоозонтой.

Ахлах сургуульд суралцах нь албан бус тул ажил дээр гарч ч болно. Мэргэжлийн сургуульд ч орж болно.

Эцэг эх хүүхдүүд өөрсдөө шийднэ.

Том зулзага ямар сургуульд орох юм бол доо гэсэн шүү юм бодож суув. Гэрийн ойр өнөөх сүмогийн секцтэй хувийн ахлах сургууль байдаг юм. Төлбөр нь жаахан үнэтэй гэж сонсогддог. Том зулзага орохгүй гэсэн.

Одоо сурдаг дунд сургуультай нь тавхан алхмын зайтай нэг ахлах сургууль бий. Улсынх, муждаа эхний тавд ордог гэсэн. Ойрыг нь бодоод энэ сургуульд л ордог юм шүү гэж захиастай. Том зулзагын санаа нь арай жаахан хол байдаг сургуульд санаатай юм шиг байна лээ.

Том зулзагын санаархаад байгаа сургууль ч гайгүй л дээ. Муждаа эхний тавд багтдаг. Гэм нь жаахан зайтай. Дугуйтай ирж очно, нэг бол автобусаар. За бүр болохгүй бол би хүргэж өгдөг байх даа.

Энэ жилийнх шиг цас бороо ихтэй үед бол хэцүү, хүргэж өгөх гэж өчнөөн цаг болно. Ээж аавынх нь хэн нэг нь ажлаасаа хоцорч таарах болно бла бла гэж үглээд л байгаа.

Гэрээс ойрхоноороо хоёрт ордог бас нэг хувийн сургууль бий. Төлбөр нь бас л өндөрт орно.

Нэг хувийн сургуульд, нэг улсын сургуульд л шалгалт өгөх эрхтэй. Алинд нь өгөх юм бүү мэд. Тэр өдрийн тэнгэр мэдээд л явах байх даа.

Хамгийн сүүлд дугуйлан тус бүрийн хурал. Шилжилт хөдөлгөөнөөр хуучин эрэгтэй багш нь өөр сургууль руу шилжиж шинээр эмэгтэй багш ирсэн. Том зулзага их ам сайтай байгаа. 1 дүгээр ангийн 10 хүүхэд шинээр нэмэгдэж орж ирсэн гэнэ. Жилийн хөтөлбөрөө танилцуулсан. 8 сард мужийн хэмжээний тэмцээнд оролцоно. Түрүү жилүүдэд алт аваад байдаг тэмцээн. Энэ жил бас л алт авах зорилготой гэсэн. Алт алтдаа бүсийн тэмцээнд явах эрхтэй алт авах юм гэсэн. Ерөөл бат оршиг.

Том зулзага магтуулаад л, ээж нь дотроо овоо шүү дээ үр минь гэж хөөрөөд л.

Зарим нэг үед нь хань ижилдээ даалгавар өгсөн шиг л хуралд суув. Өнөөдөр ханийхаа гарын хоолыг л иднэ шүү. Хэдэн өдөр хуралд суугаад ядраад байна, хуушуур идэж ядаргаагаа гаргамаар байна энэ тэр гэж. Хэ хэ. Бага зулзагаа дагуулаад тоглохоор гарсан хань ижил үүрэг даалгавар аваад эртхэн харьсан гэсэн. Ккк

Орой нь хуушуураа идэж ядаргаа нь гарсан улс шинэ долоо хоногтоо эрч хүч дүүрэн байх болтугай. Та нартаа ч бас амжилт хүсье.

Толгой ПИГ

Хоёр өдөр охидынхоо хичээлийн нээлттэй хичээлд суугаад. Толгой гэж ПИГ.

Бага зулзагынх баасан гарагийн үдээс хойш. Ажлаасаа чөлөө аваад л жирийлгэв. Яг иймэрхүү чухалд үед ажлынхан минь ойлгож хүлээн авч, үдийн цайгаа уух цаг байгаа юм уу, эртхэн гараад цайгаа уучихаад яваарай гэж санаа тавих нь сайхан. Талархаад барамгүй.

Эхний 40 минут хичээлийг нь үзэж сонирхоно. 1-5 хүртэлх тоог хэрхэн бичих тухай хичээл. Одоогоор цагаан толгойгоо үзэж эхлээгүй. Мөн одоогоор нэг ч дэвтэр байхгүй. Сургуулиас нь бэлдэж тарааж өгөх ёстой. Мэдээж дараа нь данснаас минь мөнгийг нь татна.

Үндсэн хичээлүүдийн сурах бичгийг нээлтийн өдөр тараасан. Түүнийгээ хуваарийн дагуу авч явна. Балын харандаа таван ширхэг, баллуур, улаан харандаа бүхий үзэгний саваа авч явна.

Энгэртээ нэр бүхий жижиг пайз?-аа зүүнэ, өдөр бүр.

Нээлттэй хичээл дээр заасан тоогоо багшийн тараасан тусгай цаасан дээр бичиж багшдаа хураалгасан.

За дөнгөж нэг дүгээр ангийн хүүхдүүд гэж хөөрхөөн. Анхаарал нь төвлөрөхгүй, хойшоо эргэж хараад л, чанга чанга дуугараад л. Тэрний ээж, энэний ээж гэж мэндлээд л. Хэ хэ.

Дараагаар нь эцэг эхийн зөвлөлийн бүгд хуралд сууна. Өнгөрдөг жилийн орлого зарлагын тайлан. Явуулсан үйл ажиллагааны тайлан зэргээ танилцуулна. Мөн дарга цэргээ сонгоно.
Эхэнд нь захирал багш үг хэлнэ. Сүүлд нь сургуулийн захиргаа болон багш нарын танилцуулга болсон. Жүжигчилсэн тоглолт энэ тэр оруулаад сонирхолтой танилцуулга хийсэн.

Дараагаар нь 1 дүгээр ангийнхны хуралд суув. Анги даасан багш нар дахин өөрсдийгөө танилцуулсан. Нэг жилийнхээ зорилго, төлөвлөгөөгөө танилцуулна. Хичээл эхлээд удаагүй ч хүүхдүүд чинь хичээж сурч байгаа, цэвэрлэгээгээ сайн хийдэг гэж хэлсэн.

Сургуулиа сурагчид өөрсдөө л цэвэрлэнэ. Мундаг уу мундаг. Лхагва гарагт цэвэрлэгээгүй өдөр. Аль болох хог тарихгүй, сургуулиа, ангиа хайрлан хамгаалцгаая гэсэн уриатай.

Хамгийн сүүлд анги ангиараа хуралдана. Хуралдана ч гэж дээ өөрсдийгөө танилцуулна. 1 жилийн хугацаанд болгоогоорой гэж. Хэ хэ. Хүүхэд нь сургуульд ороод хэрхэн өөрчлөгдсөн, хэрхэн хичээж байгаа тухай товчхон хэлнэ.

Энэ өдөр эцэг эхийг хамгийн их догдлуулдаг, санаа зовоодог зүйл бол эцэг эхийн зөвлөлийн ямар нэгэн албанд томилогдчих вий гэдэг асуудал. Хэ хэ. Урьдчилан хүргүүлсэн цаасан дээр болох хүсэлтэй ээжүүд байвал хүсэлтээрээ болж болдог. Хэрэв хэн ч болох хүсэлтээ өгөөгүй бол сугалаараагаар сонгогдоно.

Энэ удаад 3 ч ээж хүсэлтээ өгсөн байсан тул нэг л албан үүрэгт сугалаа явагдав. Би нь азаар болоогүй.

Орой нь би ууж идэх цуглаантай байсан тул толгой гэж тал нь тэрийгээ бодоостой. Хи хи.

Том зулзагыхыг дараагийн бичлэгт. Агуулга нь ерөнхийдөө ижил.

Зураач болоорой

Бага зулзагынхаа уран бүтээлээс ганц нэгийг оруулав. Эмээ өвөө нар нь харж баясдаг юм.

Зураач болоорой гэж ерөөе.

Хар өнгөөр их зурна. Хар бал, балын харандаа гээд л. Аниа нь бас яг тийм байлаа. Өнгө алаглуулахдаа хойрго байлаа. Одоо тэгсэн дүү нь яг адил. Яваандаа өнгө алаглуулдаг болно, нэг их санаа зовохгүй л байна.

Олж харахад жаахан хэцүү л зураг байна. Том том хуанлины цаасны ар дээр зуруулдаг хэвээрээ. Зарим нь гялгар гөлгөр байдаг болохоор балын харандаа болон бол их бүдэг гарна.

Хүүхэлдэйн киноныхоо баатруудыг зурж. Хэлүүлэлтгүй таньж байгаа биз дээ? Хэ хэ.

Хараад зурахдаа дажгүй л зурчихаад байна. А ч байхгүй ээжийгээ бодвол.

Дараа хөөрхөн бүтээл туурвибал дахин зураг оруулна аа. Түр баяртай.

Хоол гэж урлаг

Энэ япончууд нээрээ үндэснийхээ хоолыг урлаг болгочих юм тэ.

Монголоос ирсэн дарга нартай хамт явахад нэг сайхан нь тансаг тансаг япон хоолны барааг харах юм дөө гэж.

Яагаад барааг нь харна гэхээр, тэр бүр идэж ууж чадахгүй. Ам руугаа нэг юм хийтэл хажуугаас хэн нэг нь ярина, гялс залгиж ирээд л ажлаа хийнэ. Хэ хэ.
Тэр тансаг хоолыг амталж, баясаж идэх ч ховор дөө.

Далайн ургамал, цагаан арваалж?-тай зууш. Мөсөн аяганд хийж ирсэн. Доороо мөстэй тавагтай. Мөддөө хайлж урсаад байхгүй л юм билээ. Бидний хэдэн монголчууд сүрхийг нь гайхаад л
-Гүэ мөн их хөдөлмөр зараа даа. гэж шогшив.

Тавагнууд нь, аяганууд нь, хундаганууд нь янз янз. Цаасан шүхэр хажууд нь тавьж чимэглэж энэ тэр. Тэрийг нь хараад хүмүүс дуугай байдаггүй юм байна шд. Яасан мундаг юм бэ, яасан хөөрхөн санаа оноо вэ, яаж хийдэг юм бэ гээд л. Бас л нэг хөөрхөн ярианы сэдэв.

Улаан шүхэрийг зочид та бүхэнд бэлэглэж байна. Хүсвэл авж хариарай.
Гэсэн чинь би мартаад гараад ирсэн. Бага зулзагатаа өгч хэд хоног тоглуулна гэж бодож байсан юм. Хэ хэ.

Маш олон төрлийн хоолыг жаахан жаахнаар нь өмнө минь тавиад л. Дорхноо л цадаж байгаа

Энэ зурагт байгаа хясааг бас л авч харьж болно гэсэн. Би авсангүй ээ. Гэрт нэлээд хэдэн дун, хясаа хөглөрөөд, бага зулзага тоглоод гүйдэг тул. Бас нэг новш нэмэгдэхийн нэмэр гэж бодов.

Ажлын хажуугаар бас олон зүйл бодоод амжих юм тэ энэ эхнэрүүд, ээжүүд. хэ хэ.

Гэснээс манай эрчүүд зөөлөн сайхан шар айраг, япон архиар дайлаад байхад уухгүй байснаа, буудалдаа очингуутаа өрөөний юм гээд л авчирсан цагаан архиа сайн уух юм аа. Аан тийм дуусахаар нь виски худалдаж аваад ууна гээч. Зоослог зоослог. Ккк

Эхнэрүүдэд захихад, гарын мөнгийг нь яг тааруулж өгч явуулж байгаарай. Хэ хэ. Тэгэхгүй бол архинд хамаг мөнгө чинь явна шүү.

Хүсвэл өөр зөндөө зөвлөгөө өгч болно шүү. Хи хи

Бага сургуулийн сонин сайхан

За дахиад 6 жилийн турш блогтоо бага сургуулийн тухай бичих нь дээ. Та нар минь ч 6 жил бага сургуулийн тухай унших нь дээ. Хэ хэ. Уншчихсан зүйлийг чинь бичиж жаахан залхааж магадгүй. Өнгөрөөгөөд явчихаарай.

1 дүгээр ангийн 4 бүлэгтэй. Бага зулзагын анги дааж авсан багш нь эмэгтэй.

Энэ тухай хань ижил зураг хөрөг явуулаад л, би ажлынхаа хажуугаар хальт харж нулимс цийлэгнээд л.

Эхний долоо хоног хичээл гэхээр зүйл ороогүй. Сургууль дээрх биеэ авч явах байдал, дүрэм журам зэргийг заадаг юм билээ. Жишээ нь коридороор хэрхэн алхах, шатаар өгсөж буухдаа аль талаар нь явах, цэвэрлэгээгээ хэрхэн яаж хийх гээд л.

Өглөө цуглаад алхаж явдаг газар нь гэрээс жаахан зайтай, өглөөд ээж нь тэр цуглах газарт нь хүргэж өгдөг. Архаг сурагчид их орой гарч ирэх юм. Өглөөний сэрүүхэнд би даараад хэлээд л тавьчихлаа. Цагтаа ирээрээй за хөөрхөнүүд ээ гээд. Хэ хэ.

Тарж ирэхдээ ойрхон гэртэй хүүхдүүд нэг бүлэг болоод алхаж ирнэ. Сургууль тарсны дараах өдөр өнжүүлэхэд оруулаагүй тул гэрээ онгойлгоод ээжийгээ иртэл 30 минутаас 1 цаг гарантай хугацаанд ганцаараа байна.

Чадах болов уу гэж санаа зовоод байсан чинь дажгүй шүү. Одоохондоо даалгавар гээч зүйл байхгүй болохоор дуртай киногоо үзээд л сууж байх шив.

Нэг хөөрхөн бандитай нэг ширээнд суусан. Найз болсон, шинэ найзуудтай болсон гээд л шулганаж өгч байгаа.

Гэм нь өдрийн хоолоо л удаан иддэг хэвээрээ. Цэцэрлэгт байхын л удаан иддэг байсан юм.Цэцэрлэгийнх нь багш энэ тухай ярьж хэлээд л зөвлөлддөг байлаа. Одоо бага сургуулийн багшаас сонсдог болох нь. Хэ хэ.

Одоохондоо долоо долоо хоногоор хичээлийн хуваарийг тарааж байна. Яваандаа сараараа, улирлаараа гарах байх. 4 дүгээр сард болох гол гол хөтөлбөрийг харин бичсэн байсан. Жишээ нь бүх сурагчдын зугаалга болох байсан.

За байз өөр юу билээ?

Сакүрадав

Энэ жилийн сакүрадалт ажлынхаа хажуугаар амжуулж ганц нэг зураг дарснаар өндөрлөв.

Манай гурав нэг орой нь оройн сакүра, нэг өдөр нь бага зулзага хань ижил хоёр өдрийн сакүра харж баяссан.

Гэхдээ л ганцаараа сакүрадах чинь онцгүй тэ. Хайртай хүмүүстэйгээ хамтдаа л сакүрадвал сайхан. Сэтгэлд хоногшоно.

Хотоосоо жаахан зайтай газрын сакүрагийн зураг оруулъя. Суугуул хотынхоо сакүраны зургийг жил бүр оруулсаар байгаад жаахан улиг болсон байж магад. Хэ хэ.

Эд ч баярлаж сурсан улс дөө. Хоггүй, зодоон нүдээнгүй баярлаж чаддаг улс. Атаархаад байдаг юм. Эх орон минь хэзээ баярлаж сурна даа гэж бодоод л.

Аминдаа ах дүү амраг садангууддаа архигүй баярлаарай, даруухан баярлаарай гэж байнга шахуу захина, хааяадаа загнана, үглэнэ. Үглэхийг минь даанч тоохгүй юм дөө гэж.

Гэснээс энд тэндхийн монголчууд яасан ч коллектив сайтай байдаг юм. Нийлж суугаад л сакүрадсан байсан. Хуушуур хийж очицгоогоод л.

Бүр шар гозойгоод хуушуур хийж идэхээр шийдэв. Нэг нартай сайхан өдөр хуушуурдаад зураг хөрөг оруулна аа. Хэ хэ.

Ажил амжилттай юу? Амжилттай амжилттай. Мэдээж дунд нь өөрийгөө голох зүйл зөндөө байлгүй яахав. Эх хэл минь, эх хэлийнхээ өвөрмөц хэлц энэ тэрийг мартаж байгаа юм билээ би. Тэмээн жин гээд хэлчих юмыг мөн ч их тойруулж хэлээд, дараагаар нь монгол дарга надад тоглоом шоглоомоор хэлж өгсөн.

Ажлын тухай бичээд байвал уртаа бичлэг болох гээд байгаа тул бичихгүй...

За дараагийн бичлэг хүртэл түр баяртай.

Хичээлийн нээлт

Ээж нь бага зулзагынхаа 1 дүгээр ангид элсэн орж буй дурсгалт өдөр нь хамт байж чадсангүй. Уучлаарай. Сэтгэл зүрхээрээ бол хамт л байсан шүү.

Хань ижил ажлаасаа чөлөө аваад явсан.

Шинэхэн цүнхээ үүрээд, бас бус хичээлийнхээ хэрэгслийг аваад явсан. Ээж нь эзгүй байх 4 өдрийнхөө бэлтгэлийг сайтар бэлдэж өгөөд явсан болохоор дажгүй л байсан гэсэн.

Анхны өдөр сургуульдаа явахдаа ёслолын хувцастай явна. Маргаашнаас нь энгийн хувцастай. Бага сургууль дүрэмт хувцас өмсдөггүй.

Хотын захиргаанаас ирсэн сургуульд орох эрхийн бичиг ил захидлыг авч очиж сургуульдаа хураалгана. Бөглөх ёстой ар гэрийн танилцуулга хуудсаа бөглөөд авч явна. Энэ хуудас нь гэртээ хэн хэнтэйгээ амьдардаг болохыг нь сургуулийн багш нар мэдэж байх үүднээс бөглүүлдэг шиг байна лээ.

Өглөө нээлтийн арга хэмжээ эхлэхээс өмнө сургуулийн үүдэнд хаалган дээр хэн хэн хэд дүгээр бүлэгт хуваарьлагдсаныг нь бичиж хадсан байна. Ангидаа орж багштайгаа анхлан нүүр тулж уулзана.

Нээрээ ингэж нээлтэнд очихдоо манайхан шиг цэцэг энэ тэр барьж очдоггүй шд.

Харихдаа сурах бичиг энэ тэрээ авч харин тул томоохон ууттай ирээрэй гэж урьдчилан мэдэгсэн байна.

Мөн нээлтээр ирэхдээ аль болох том гэсэн хэрэгслүүдээ барьж ирээрэй, тэгэхгүй бол дараа нь хүүхдүүд өөрсдөө дангаараа сургуульдаа ирэх үедээ авчрана гэвэл хүнддээд даахгүй байх магадлалтай тул гэж захьдаг. Их зүгээр.

Эдний энэ эцэг эхэд, сурагчдад төвөг болохооргүйгээр хүүхдэдээ чиглэсэн санаа оноонууд их таалагдана аа. Эх орондоо хуулмаар л зүйлийн нэг.

Үүнийг бага зулзага бид хоёр урласан юм. Мундаг байна уу? Хэ хэ. Сакүра цэцэглэх үеэр хичээл эхэлдэг тул сакүра цэцэг, түүний дор жагсаад явж байгаа сурагчид гэдэг утгаар эдний өнөө нэг хөөрөгний үнэтэй цүнх. Хэ хэ.

Энэ цүнхийг нугалах арга нь жаахан л чимхлүүр боловч бага зулзага минь дагаж хийгээд нугалчихаж байна лээ. Мундаг. Сакүра цэцгийг ч бас.

Гэснээс бага зулзагын минь цүнх ямар өнгөтэйг таагаарай. Хэ хэ.

Эрдмийн их оргилд нь томоос том амжилт хүсье. Хайртай шүү.