Чулууны магтаал

1986 оны Болор цомын эзэн. Монголын зохиолчдын эвлэлийн нэрэмжит шагналт яруу найрагч Тоомойн Очирхүү

Чулууны магтаал

Эргэн тойрон хадтай Балбархайн хаваржаанд би
Эхний дуугаа чулуунд хадааж төрсөн
Ээжээс анх тасарсан миний нялхын хүй
Энэ л бууцны чулуун дунд үлдсэн
Хүй, дуу хоёрын минь чулуунд шингээстэй
Хүний орчлонд тэгэхлээр би чулуунаас уяатай
Хөлд орохоосоо өмнө би чулуун дээгүүр мөлхсөн
Хөлд орохдоо би чулуун дээр боссон
Хашаа хороогоо ч чулуугаар барьж
Хатуу өвлийг ч чулуугаар хаадаг
Хана хэрмийг ч чулуугаар өрж
Халуун галаа ч чулуугаар тулгадаг
Арвай тариагаа ч чулуугаар татаж
Агт морьдоо ч чулуугаар аргамждаг
Уулын минь хөх чулуу орсон юмыг нэрлэснээс
Уулын минь хар чулуу ороогүйг нэрлэсэн нь амар
Юугаараа баян билээ? түүгээрээ бахархана
Юм юмны түрүүнд уулынхан чулуугаа л магтана
Эрдэнийн чулуу нь зам гудас хэвтдэг
Элбэг баян уулсаараа бахархана
Орд харш, зам талбай, гүүр далан бүгд чулуу
Охид хүүхнүүдийн гоёл чимэг, ээмэг, бөгж бүгд чулуу
Оргил өндрийн овоо, тахилга бүгд чулуу
Он улирлын хөшөө, хиргэсүүр бүгд чулуу
Эх газрын алаг чулуу орсон юмыг нэрлэснээс
Энэ дэлхийд чулуугүй юмыг нэрлэсэн нь амар
Хөлд орохоосоо өмнө би чулуун дээгүүр мөлхсөн
Хөлд орохдоо би чулуун дээр боссон
Чулуун дунд өсч төрсөн уулынхан бид
Чулууны үнийг мэддэг улс
Эмээлт морио харж шинждэг шигээ
Эрдэнийн чулууг таньдаг улс
Манай нутгийн буурал өвгөд
Машины үнэтэй гаанс зуудаг
Айлчин гийчнийхээ амрыг эрж
Алаг манан хөөргөөр тамхилдаг
Чулуун дунд өсч төрсөн уулынхан бид
Чулууны идийг мэддэг улс
Болор шилийг зүсдэг алмааз ч болдог
Болд төмрийг элээдэг билүү ч болдог
Зөөлөн хатуугийн туйл
Зөвхөн чулуунд л шингэсэн байдаг
Чулуун дунд өсч төрсөн уулынхан бид
Чулууны бөхийг мэддэг улс
Он цагийг тээсэн гүүрийн багана ч болдог
Орд харшийг даасан суурийн бие ч болдог
Ган шиг батын эрхэм чанар
Гагцхүү чулуунд л шингэсэн байдаг
Эр зориг, баатарлагийн тухай
Энэ чулуугүйгээр сэтгэшгүй
Уул давж, чулуу өргөж
Урт замд сульдахгүй юм бол
Газрын чулуун бөөрөн дээр
Ганц ч атугай хаьтирч даарч хонохгүй юм бол
Гавьтай ямар эр хүн байх билээ?
Байгалийн сайхан, аян замын тухай
Бас л чулуугүйгээр санашгүй
Уудам дэлхий цулгүй тэгшхэн бол
Учрал ч гэж байхгүй, Алтай ч гэж байхгүй
Ургахын нартай ядаж ганцхан удаа
Уулын хяр дээр золгоогүй бол
Угтаа ямар нүд тайлсан байх
Алдар гавъяа, одонгийн тухай
Аанай л чулуугүйгээр ярьшгүй
Цагийг эзэлсэн суутны алтаар сийлсэн нэр
Цагаан гантиг дээр суурилж байж мөнхөрнө
Эрэлхэг баатрын алтан таван хошуу одон
Эрдэнийн чулуу шигтгэж байж тодорно
Хөлд орохоосоо өмнө би чулуун дээр мөлхсөн
Хөлд орохдоо би чулуун дээр боссон
Хорвоог таниулсан багын минь тоглоом чулуу байсан
Хожим миний суусан байшин чулуу байсан
Унаган багын тоглоомын чулуун гэрээс
Улаанбаатарын өнөөгийн сууц хүртэл
Эр бие минь чулуун дунд өсч
Эх орноо чулуутай цуг дуулсан
Эхлээд би эх орноо бүхэлд нь бичсэн
Энэ надад ахадсан
Дараа нь Алтайгаа бичсэн
Дахиад л надад томдсон
Хожим сүүлд нь би
Хол хөдөө үлдсэн аргамжааны чулуугаа бичсэн
Уулын хүү миний чулууны магтаал
Угтаа чухам эндээс л эхэлсэн
Өвдөг тулж мөлхсөн
Өлмий тулж боссон
Сэтгэл хүлэг хоёроо цуг аргамжсан
Сэрүүн Алтайн минь ширхэг чулуу
Өөрийг минь элээх
Өлгий дээр минь босгох
Эхний бөгөөд эцсийн чулуу
Энэ чулуу миний чулуу

1986 он

Тэртээх арван хэдэн жилийн өмнө эх орноосоо гарахдаа нэгэн чулуу өвөртлөөд л гарч билээ. Одоо гэрт минь хүндтэйхэн залраад л, хааяадаа эх орноо нэг сайхан сэтгэлдээ харж дүрсэлж баясдаг даа.

Монгол гэдэг үг

Бага зулзага бид хоёр бүтэн 7 хоног өвчнөө эдгээж байна гээд амарч, би Маша-дуулж өнжих шив дээ.

Яг дэргэдээ л байлгах гээд л, 00 орохоор л араас ээжээ гэж дуудаад л. Хэ хэ. Энийг хараа, энийг хамтдаа хийе, энэ номыг уншаад өг, энийг яаж хийдэг юм бэ? мээмээ л дээ энэ тэр гэж намайгаа яг л баавгайг дэглэж байгаа Маша шиг л байлаа.Ккк

Өдөр албаар унтуулж, амраав. Түүнээс эрүүл байхдаа гэртээ бол унтахгүй л дээ. Тэгж унтуулахдаа ном уншиж өгнө. Нэг зурагт номд монгол гэдэг үг гараад бид хоёр учиргүй баярлав шд. Ер нь хаа нэгтээ санаандгүй монгол гэдэг үг сонсохоороо гэрээрээ л хөөрнө. Мэдээ энэ тэрээр эх орны минь тухай таагүй зүйл гарвал дургүй талдаа. Өмөөрнө шүү дээ.

Гадаада байгаа эх орон нэгтнүүд минь ч мөн адил ханддаг байх тийм үү?

За энэ удаад ийм номноос монгол гэдэг үг олж уншсан юм л даа.

"Шувуудын хачирхалтай үүр" гэдэг ном. Гаричгнаас харахад л ойлгомжтой. Шувуудын сонин хачин үүрнүүдийн тухай. Хэлбэр дүрс, материал?, байрлал, хэмжээ гээд л янз янз. Танин мэдэхүйн их хөөрхөн ном.

Тэрэн дунд гэдэг шувууны тухай бичсэн хуудас. Монгол гэдэг үг гарсан. Өөрийн мэдэлгүй хоёр бие лүүгээ харсан.

Латин нэр нь Remiz pendulinus гэнэ. Англи нэр нь European penduline tit гэнэ. Монголоор хайгаад олсонгүй ээ. Мэддэг хүн байвал хэлж өгөөрэй.

За энэ шувууны үүрийг "Монгол зэрэг эрс тэс уур амьсгалтай газар хүүхдийн оймс болгон ашигладаг байж. Үүнээс харахад энэ үүр нь маш дулаахан, бат бөх гэдэг тодорхой." гэж бичсэн байна.

Үнэн эсэхийг нь сайн мэдэхгүй ч, Монгол тийм хүйтэн юм уу ээж ээ? Тийм ээ, японоос хүйтэн. Гэсэн харилцан яриа өрнүүлэв.

2 дахь зургийг толгойгоо гэлжийлгэж байгаад сайн хараарай. Нээрээ л оймсны хэлбэртэй байгаа биз?

Өөр зөндөө сонин хачин хэлбэртэй үүрний тухай гарсан байсан. Японд байдаг хүмүүс номын сангаас зээлж хүүхдүүддээ уншуулаарай. Ёстой хөөрхөн ном шүү.

Заримдаа ингэж үр хүүхдүүддээ дэглүүлэх их зүгээр вм байна шүү. Өөрөө ч бас суралцаад. Зураг зурж чаддаггүй хүн чинь зураач болохоо шахав шд бас. Хэ хэ.

Оригами-чин болохоо шахав бас. Янз бүрийн л бүтээл туурвив. Дараа бөөгнүүлж байгаад зураг оруулна аа.

Гэснээс гол зүйл. Өвчин нь эдгэсэн шүү. Халуурч бариагүй болохоор өвдсөн ч юм шиг, өвдөөгүй ч юм шиг л байлаа. Хөнгөн туссан бололтой. Ангийнх нь ганц нэг хүүхэд бүр 40 хүрч халуурч, бас нэг охин халуурахын зэрэгцээ 4 газар хавдаж барьсан гэнэ. Гэх мэт сонсоод миний ингэж жаргалтай гэгч нь дэглүүлэх ч юу ч биш, харин ч зулзагатайгаа цагийг зугаатай  өнгөрүүлсэн байна шүү л гэж бодов. Нэг их удалгүй томроод ээж ээ, ээж ээ гээд гүйх нь багасаад, биеэ даагаад, үнсэж үнгүүлэх нь ч ховрын үзэгдэл болно доо гэж бодохоор...

Шагнал

1985, 1993, 1998 оны Болор цомын эзэн, Монгол Улсын Ардын уран зохиолч, Төрийн шагналт, Соёлын гавъяат зүтгэлтэн яруу найрагч Бавуугийн Лхагвасүрэн

Шагнал

Ээж минь намайг
Цагаан сүүгээрээ шагнаж
Эцэг минь намайг
Эсгий үнэгээр мялааж
Орон минь намайг
Эрх чөлөөгөөр шагнасан
Хувьсгал миний шагнал
Хувь заяа ч миний шагнал
Өрх татахад тооноор бялхсан нар
Өлгий дээр минь гэгээ мандуулж
Өндөр босгоо давж, талын сэжүүр өлмийдөхөд
Өөлөн чулуу, халиун цэцгээ дэвссэн
Дэлхий миний шагнал
Хайрыг даана гэдэг
Шагнуулахаас хэцүү
Ханаж сагасан байвал
Үхсэнээс дор
Салаан даргадаа ч
Сайшаалгаж яваагүй цэрэг эр
Сайхан эх орныхоо төлөө
Шагнал гэж хумсын чинээ ч бодоогүй
Шархныхаа цусыг хэгзэрсэн эх газартаа юүлж
Дотно амиараа эх орноо шагнаж
Дотоод хормойг нь нөхөж нөгцсөн
Орчлонг хувьсагасан Ленин
Одонгүй байсан
Ленин өөрөө
Дэлхийг шагнасан
Мөнхийн одон
Алаг эрээнтэй
Амьдрал өөрөө шагнал
Амраг минь намайг үнсэх нь ч
Амьдын жаргалын шагнал
Эгэлхэн шүлэг минь ч
Энэхэн бие минь ч
Эх орноо шагнасан шагнал
Ирэх цаг
Ирээдүй миний шагнал
Элин улирсан
Түүх ч миний шагнал
Уртын дууны талд хоносон цуурай
Ураг улаан галын зуунаар цогшсон амь
Уулсын оройд хоносон нойрмог цагаан манан
Усны ногоон тохиойгоос намайг ширтсэн жимс
Уйлж явсан зовлон
Ухаарсан алдаа минь хүртэл шагнал
Надад байгаа миний бүхэн миний шагнал
Надад илүү шагнал хэрэггүй ээ?
Харин
Амраг ханийг минь
Ачдаа дуулах бүүвэйн дуугаар шагна
Дүн өвлийн нүдгүй шуурганаар малын захад
Дуугаа хөлдтөл гуугалж яваа эцгийг минь
Нараар шагна
Дун цагаан үс нь
Намрын салхинд хийсч
Дуутын шаргал хөтөл дээр
Намайг харуулдаж үогсоо
Ижийг минь
Мөнхийн усаар шагна
Дайны айдсаар түгшиж байгаа
Дэлхий минь
Энх амгалангаар шагна
Шагна

1985 он.

Монголоос ирсэн хуанли-с хуулж бичив.

Шагналд дуртай хүмүүст уншиж өгмөөр шүлэг үү тэ. Нэг бол шагнах дуртай хүмүүст. 4 жилийн хугацаат албан тушаалд байгаа дээрээ гээд болсон болоогүй хүнийг шагнаад байдаг гаруудад уншаад өгчихмөөр ч юм шиг.

Гахайн хавдар

Бага зулзага шинэ долоо хоног эхлэв үү үгүй юу өвдөөд. Өглөө босч ирээд чихний доохон өвдөөд байна гэв. За яг л гахайн хавдар байна гэж таасан, оносон.

Яагаад ингэж эмч шиг шууд таасан, оносон гэхээр цэцэрлэгээс нь нийтийн имейл хаягт захидал ирсэн байсан юм хэд хоногийн өмнө." Ахлах ангид гахайн хавдар тусаад 5 хүүхэд гэртээ амарч байгаа, та бүхэн ч гэсэн хүүхдийнхээ биеийн байдлыг сайтар ажиглаад, хэрэв сэжигтэй байдал ажиглагдвал эртхэн эмчид үзүүлээд, сайтар амраах хэрэгтэй шүү. Цэцэрлэгийн хамт олноос." гэсэн байсан юм.

Тэгээд л шууд оношилсон хэрэг. Хэ хэ.

Хүүхдийнхээ өвдсөнд сэтгэл зовнихгүй, хагас сайнд нь болох тамирын өдөрлөгтөө оролцож чадахгүй болох нь ээ гэж бодоод байгаа юм биш үү энэ ээж. Хэ хэ.

Яг ид халуунаар л тэр тамирынхаа өдөрлөгт бэлдээд, гүйгээд харайгаад, бүжиглээд, хуурдаад гээд л өдөр бүр хар хөлс нь цувчихсан тарж ирдэг байсан болохоор тэр. Тэгж их бэлтгэл хийж хийчихээд, тамирынхаа өдөрлөгөөр алтан медаль авна гээд хөөрөөд байгаа бага зулзагаа харахаар яаж ийгээд л тэр тамирынх нь өдөрлөгт оролцуулмаар болоод байгаа юм чинь.

За тэгээд энэ гайхал гахайн хавдарт чинь таарах тохирох эм, эмчилгээ гэж байдаггүй юм байна. Гэрт нь сайн асарч тойлж, амраах хэрэгтэй байдаг гэнэ. Халдварлах өндөр чадвартай тул сургууль цэцэрлэгтээ явалгүй гэр зуур амардаг юм байна.

Далимдуулаад би бас амраад л сууж байна. Ямар азаар энэ долоо хоног бага сургууль явж улс эх орноо танилцуулах арга хэмжээ байхгүй юм.

Юм идэхээр доод эрүү хавьд нь өвдөөд эмчийн бичиж өгсөн өвчин намдаах эмийг 2 өдөр уусан. 3 дахь өдрөөсөө өвдөөд өвдөөд гэх нь гайгүй болсон. Хоолой нь жаахан улаан байна гээд бичиж өгсөн 4 хоногийн эмээ бол бүгдийг нь уусан. Эм зүйч угаасаа эм бичиж өгөхдөө тайлбарлаж өгдөг юм. Жишээ нь энэ эмийг өвчин нь эдгэсэн ч дуустал нь уух, харин энэ эмийг яг өвдсөн үедээ л ууна. Өвдөхөө больсон үед уугаад хэрэггүй гэх мэт.

Хамгийн зэвүүн нь ямар нэг халдварт өвчин тусаад эдгээд, албандаа явахдаа заавал эмчийн зөвшөөрөл хэрэгтэй. Тийм бичиг нь цэцэрлэг, сургуульд нь байж байна. Тэрийг аваад эмчид үзүүлж байгаад хэрэв албандаа явж болно гэсэн тохиолдолд эмч зөвшөөрч тамга дарж өгнө. Халдварладаг өвчнүүдийг жагсаасан бичиг байдаг юм. Тэндээс тухайн үед өвдсөн өвчнийг нь дугуйлаад л, он сар өдөр бөглөх гэх мэт зүйлсийг бөглөөд л тамга дарчихна, уг нь ядах юмгүй. Хэ хэ.

Жаахан наана нь таньдаг эмч мэмчээрээ тамга даруулна гэсэн ойлголт байхгүй. Юмыг яаж мэдэхэв баригдчихвал эмч нь хүртэл бангадуулах тул, тийм эрсдэлтэй, амьдралаасаа салсан зүйл хийхгүй.

Өнөөдөр оройхондоо очиж үзүүлнэ дээ. Эмч гуай юу гэж үнэд орох нь уу? 10-14 хоног албандаа явдаггүй амардаг гэсэн. Тухайн хүүхдийн эдгэж байгаа байдлаас хамаарна даа гэсэн. Хавдар нь хэр бууж байгаагаас болно гэсэн. Халуурдаг хүүхэд байдаг юм байна. Бага зулзага халуураагүй. За тэгээд эрэгтэй хүүхдэд бас л их аюултай өвчин юм гэсэн. Эрэгтэй хүүхэд гэлтгүй эдгэсний дараа тархинд нь ямар нэг юм үлдэх гэх мэт эрсдэл байдаг юм байна.

Тэгж бодохоор тэр тамирын өдөрлөг мөдөрлөг бол ярьшиг л байна тийм ээ. Амьдрал баян, цаана нь сургуулийн тамирын өдөрлөг мөдөрлөг гээд л больёо гэтлээ л тамирын өдөрлөгдөнө.

Цэцэрлэгийнх харин байхгүй, энэ жил ахлах бүлэг тул. Уг нь хөөрхөн бүжгийн хөтөлбөр байсан юм...

Над мэт шиг гэрээсээ хол ээж нарт жаахан хэцүү, хүүхэд өвдөх. Чухал ажилтай үед ч юм уу, олон хоног ажлаасаа чөлөө авах тохиолдолд эмээ өвөөгий нь дуудаж харуулмаар болоод, монголд ээж аавдаа эрхлээд л байж байгаа хүмүүст атаархахыг минь яана гээч. Хэ хэ.

Сэтгэл хангалуун амьдрахад

Дажгүй гэсэн санаануудаас нь орууллаа.

Ер нь энгийн, мэдээжийн гэх зүйлүүд их байсан.

• Амьдарч буй орон гэртээ дахин дахин дурлах. Анх нүүж орж байсан үеэ дурсан дурсан, дурлах. Тэгвэл хөглөрөөд байгаа гэрээ цэвэрлэх, хөглөрөхгүй байлгах урам зориг орох. Үглэх аргаар биш үлгэрлэх аргаар хүүхдүүдээ тоглоомоо хураадаг, хувцсаа эвхдэг болгох.

Намайг л хэлээд байлаа энэ хүн. Хэ хэ. Би ч үглээд үглээд явчихна шүү дээ. Тэгсэн хэрнээ өөрийнх нь уншиж байгаа ном, оймс өмд зэрэг гарахад ойрхон гээд хөглөрүүлчих тохиолдол их байна. Засах гэж маш их хичээж байгаа.

• Хөдөлгөөнийг өдөр тутмынхаа амьдралд оруулж хэвш. Жишээ нь цахилгаан шат биш шатаар алхаж өгсөх. Ойрхон дэлгүүр лүү унаагаар биш алхаж явах. Гэр цэвэрлэх чинь ч бас нэг төрлийн хөдөлгөөн. Тийм болохоор түүртэлгүй гялс мялс цэвэрлэчихэж байх. Цэвэрлэгээний хуваарь гаргах. Гэр бүлийнхээ гишүүдийг ч үүндээ оролцуулах.

Энэ бас л намайгаа хэлээд байна. Би чинь гэр цэвэрлэх тал дээр жаахан лазан тэрий шүү дээ. За цэвэрлэе дээ гээд л яваад байх. Хэ хэ. Тэгснээ наана нь нэг ном барьж аваад, нэг блог бичээд, нэг юм нэхээд гээд сатаараад л явна. Харин суугаа ажил хийдэг тул 00 орохдоо нэг давхрын биш 2 давхрын 00 орж байгаа, нэлээд дээрээс. Ингэхийн тулд шатаар өгсөнө. Бас нэг том талбай тойрж алхана. Ойрхон дэлгүүр орохдоо алхдаг болж байгаа.

• Өглөөний цайгаа тогтмол уух, ингэж уухдаа тухтайхан шиг суугаад, амтыг нь мэдэрч уух. Завгүй ээжүүд ихэвчлэн ямар нэгэн юм хийж байхдаа босоогоороо, нааш цааш холхингоо уудаг даа. Үүнийгээ л больчих. За тэгээд хүүхдүүд бага байх үед бол энэ хэвийн үзэгдэл болох нь их. Оройдоо хийчихэж болох бэлтгэлээ оройдоо хийчихээд, өглөөдөө өөртөө цаг зав гаргаж сур бүсгүй ээж минь.

Би ч бас нэг хэсэг тийм л байсан. Бага зулзагынхаа албаны бэлтгэлийг хийж байхдаа л ам руугаа нэг юм чулуудаад л. Ойрд арай гайгүй л болж байна. Хэ хэ.

За тэгээд өдөр бүрийг онцгой өдөр мэт амьдар. Ингэхийн тулд дээрх энгийн мөртлөө чухал зүйлүүдийг санан санан хэрэгжүүлж хэвших.

Бас л уншиж дуусаагүй байгаа тул уншаагүй үлдсэн хэсэгт гоё зөвлөмж байвал бичнэ ээ.

Бага сургуульд орох бэлтгэл

Ирэх жилийн 4 сард хичээлийн шинэ жил. Бага зулзага сургуульд орно. Хурдан байна уу? Ёстой хурдан цаг хугацаа.

Бид бол ирэх жилийн 4 сар хүртэл зай ч байна гээд л тайван амгалан байна. Гэтэл энэ япон улс тийм биш. Бидний өмнөөс санаа зовоод л байх улс юм. Хэ хэ.

Яасан гэхээр дугтуйтай захидал ирэв. Ирэх жил сургуульд элсэн орох нас нь юм байна. Хэрэв япон улсад сургуульд орох хүсэлтэй байгаа бол бүртгэлийн хуудсыг бөглөөд ийм ийм бичиг баримттайгаа ирж бүртгүүлнэ үү гэсэн байв.

Өдрийн сайныг харж байгаад л хотын захиргааны боловсрол хариуцсан хэлтэст очив. Өдрийн сайн гэдэг нь завтай өдрөө харсан шүү, шашин машинтай холбов оо. Хэ хэ.

Уриалгахан гэгч нь хүлээж аваад, хэд хэдэн асуулт асуугаад, бичиг баримтуудын минь хуулбарыг авав.

Асуулт 1. Япон улсад сургуултд элсэн суралцах хүсэлтэй байгаа юу? Суурь? албан ёсны? боловсрол тул иргэншил хамаарахгүй сургуульд сурах эрхтэй.

Асуулт 2. Япон хэл ойлгохгүй ч юм уу? хэл усны тал дээр санаа зовж байгаа зүйл бий юу? Хэрэв байвал хэл ус үнэгүй зааж өгөх тогтолцоо байдаг, түүнийг ашиглаж болно.

Асуулт 3. Сургуульд ороод ч хэл уснаас гадна ямар нэгэн санаа зовоосон зүйл гарвал багш нараар, сургуулийн холбогдох хүмүүсээр дамжуулаад бидэнтэй холбогдоорой.

Асуулт 4. За охиныг нь бүртгээд авлаа. Удахгүй хаягаар чинь эрүүл мэндийн үзлэгт хамрагдах бичиг, харъяа сургуультайгаа очиж танилцах бичиг зэргийг цаг тухай бүрт нь шуудангаар явуулна аа.

Цаг зав гарган ирж бүртгүүлсэнд баярлалаа. Болгоомжтой явж хариарай.

Нэг иймэрхүү. Тэгээд л бодлоо, ийм хурдан сургуульд орох болчихдог. Бас иймэрхүү зохион байгуулалт сайтайн ач буянаар бид ч бэлтгэлээ эртхэн базааж эхлэнэ.

Юу юу бэлдэхийг сургууль нь маш дэлгэрэнгүй хэлээд явчихдаг юм билээ. Эндээ бас бичээд явна аа.

Гэх мэтчилэн бүхэл бүтэн хагас жилийн өмнөөс боловсролынхоо байгууллагатай хамтран сургуульд орох бэлтгэлээ хийж байна. Аниагийнхаа хэрэглэж байсан зарим нэг зүйлсээс хэрэглэнэ дээ. Тийм тохиолдол их байдаг юм билээ.

Тамирын өдөрлөг

За энэ 9 сард 2 хагас сайн өдөр нь хоёр зулзагын тамирын өдөрлөг, хоёр бүтэн сайнд нь хорооны, уулынхны тамирын өдөрлөг болно.

Үүнээс хамгийн эхний бүтэн сайнд уулынхны тамирын өдөрлөг болсон. Сурагчдын тоо цөөхөн тул хороо сургууль хоёроо хамтатгаад зохион байгуулчихдаг юм билээ.

Нэг уралдаан үзүүлбэрт оролцоод л нэг хайрцаг сальфетка авна. Хань ижил бид хоёр уригдаж очиж оролцоод зөндөө сальфеткатай ирсэн. Хэ хэ.

Хоёр дахь долоо хоногийнх нь хагас сайнд том зулзагын тамирын өдөрлөг. Өглөө эртлэн босч өдрийн хоолоо бэлдэж аваад л явна. Том зулзага бол яг л сургуульдаа явдаг цагтаа гараад л явна.
Үүндээ бэлдэж байна гээд л хар халуунд урсаж өгсөөн. Дээрээс нь сургуульдаа ирж очихын нийлээд 1 цаг алхдаг болохоор ядарч үхэх гэснээ гайхсан хүн орж ирнэ.

Энэ их хөөрхөн тэмцээн. Том том дөрвөлжин мөсийг дунд сургуулийн 2-р ангийн (8-р анги)эрэгтэй сурагчид цээжин биеэ нүцгэлж байгаад л тэвэрч гүйнэ. Түрүүлж барианд орох ёстой. Бээлийн өмсөнө. Замдаа бүдэрч унана, мөсөө унагаана гээд л хөгжилтэй. Өөрийн эрхгүй "хичээгээрэй" гэж орилох юм билээ.

3 дахь хагас сайнд нь бага зулзагын тамирын өдөрлөг. Үдээс өмнө л зохион байгуулагдана. Өдрийн хоол бэлдэж байна гэж ядрахгүй, амар. Хэ хэ.

4 дэх долоо хоногийн бүтэн сайнд хорооны тамирын өдөрлөг. Хань ижил буухиа гүйлтэнд нь гүйнэ. Ингэж оролцох тамирчинд өдрийн хоол гарна гэсэн.

Би бол дагалдан баясаж, япон ээж аавуудыг шинжсэн шиг л сууж байна шүү дээ. Хэ хэ. Дунд сургуулийнх нь арга хэмжээний үеэр япон ээжүүд гэж чөрийсөн чөрийсэн, хацар мацраа ягаа бутруулсан хүүхнүүд энд тэнд хэсэг бүлгээрээ буу халаастай. Цэцэрлэг, хорооныхон бол эрт очиж гоё газар аваад түүндээ дэвсгэрээ дэвсэж суугаад л хөгжөөн дэмжээстэй.

Одоогийн байдлаар 2 тамирын өдөрлөгийн ард гарчихсан. Үлдсэн 2-ыг нь амжилттай давчихвал ч...

Амжилттай давчихвал ч гэсэн хэд хэдэн арга хэмжээ байна аа, тэгээд л 9 сар дуусааский болох нь.

Гэснээс хөөрхөн хөөрхөн тэмцээн их байдаг юм билээ. Хөрөнгө мөнгө нээх орохгүй, гарын доорх материал ашиглаад л хийчих. Зун албан газрынхаа зугаалга зэрэгт санаа авмаар байна  гэсэн хүмүүс жич холбогдоорой. Хэ хэ.

Монголын минь үрс маш олон болтугай

Хүүш л дээ, энэ бичин жил тээр жилийн алтан гахай жил шиг сайн жил үү? Хэ хэ

Яасан гэхээр миний эргэн тойронд жирмээ ээжүүд их ч гэж юүхэв. Эхнээсээ төрөөд, охинтой боллоо, хүүтэй боллоо гээд л мэдээ ирээд байна.

Тэгээд л бодсон юм л даа. Бичин жил нь чухам сайн жил таараад монголын үрс үржээд байна уу? Тохиолдлоор ингэж найз нөхөд, хамаатан садан, танил нөхдүүд төрөөд байна уу? гэж.

Хэрэв сайн байсан юм бол наддаа хэлчихгүй дээ, Тэгсэн бол би ч гэж гялалзуулах байсан юм. Ккк
Одоо ч өнгөрсөн л дөө. Амжихгүй. Тахиа жилд төрөх болно. Тахиа жил ямрыг мэдэхгүй л дээ. Хэ хэ.

Холбогдсон ихэнх хүмүүс одоо та 2 минь дахин нэг маамааны ая бодох байгаа л гэдэг болов. Ккк.

За тэгээд төрсөн шинэхэн ээжүүд минь биеэ сайн бодоод, гам сайн хийгээрэй.

Шинээр ээж аав болсонд, дахин бяцхан маамаатай болсонд гээд бүгдэд нь баяр хүргэе.

За тэгээд нэг зүйл ажигласнаа бичье.

Байсгээд л тэр төрөхөд таньдаг эмч, эх баригч, сувилагч бий юу гэдэг асуулт. Заримдаа энэ эрүүл мэндийн салбарын тогтолцоо, үйлчилгээг ойлгохгүй юм. Хүн болгонд л сэтгэлээрээ үйлчилчихгүй, заавал таньдаг хүн хайлгаад царай алдуулаад байх.

Бололцоотой, танил талтай нэг нь ч тэгсгээд л чимээгүй төрчихөж байна л даа. Хөдөө орон нутгаас орж ирээд удаагүй байгаа, шинээр айл гэр болоод анхны хүүхдээ өлгийдөж авах гэж байгаа зэрэг хүмүүст тэр танил эмч нь, эх баригч нь, сувилагч нь байхгүй болохоор аргаа бараад хаа хол байгаа надаас асуудаг байх даа, хөөрхийс. Би ч ямар анагаах төгссөн ч биш, эмч ч биш ямар юмных нь тийм танил тал байхав даа. Яахав ажлынхаа буянаар ганц нэг эмч хүмүүстэй танилцсан л даа. Тэд нараас хаа холоос ийм тийм хүнийг тэгж балешиглаад өгөөч гээд л гуйна аа хааяа даа.

Тэгээд л боддог юм. Хэцүү ч юм аа даа гээд л.

Ямар сайндаа олон ах дүүстэй улс дотор нэг эмч хүн байх зайлшгүй хэрэгтэй юм, сувилагч хүн хэрэгтэй юм гэж яригдаж байхав дээ.

Ганц нэг жишээ гэвэл хяналтандаа эх нялхаст явж явж байснаа, төлөвлөгөөт төрөх өдрөө тогтчихоод урд өдөр нь хэвтэх гээд очсон чинь харъяа эмнэлэгтээ үзүүлж төр гээд хөөх.  Тэгээд л өнөөх жирэмсэн эх маань дахиад л тэр энэ эмнэлэгт таньдаг эмч байна уу гэж сураглах. Томоос том гэдэстэй эх хүнийг тэгж тамга даруулж ир, маягт бөглөж ир гээд нааш нь цааш нь гүйлгэх. Ядаж байхад түгжрээд явахгүй.

Ганц төрөх тасаг дээр ч биш, ер нь эмнэлэгт үзүүлнэ гэдэг танилгүй хүмүүст туйлаас ядаргаатай байдаг. Тийм болохоор ард иргэд маань жилдээ нэг эрүүл мэндийн үзлэгт хамрагдахаасаа халширдаг, тэр байтугай өвчнөө үзүүлэхээсээ халширч явсаар даамжруулдаг.

Дарга нар ч яахав тусгай үзүүлдэг эмнэлэгтэй болохоор иргэдийнхээ энэ мэт бэрхшээлийг мэдэрдэггүй ч юм уу? Мэдэхийг хүсдэггүй ч юм уу? Бүр болохгүй бол гадаадад гараад л эмчилүүлчихнэ. Зардал нь яг хэний халааснаас гардаг нь бас л эргэлзээтэй...

За тэгээд тун удахгүй зөв гольдролдоо орох байгаа тэ. Ямартай монголын үрс маш олон болтугай. Бүх маамаа нарыг үнэрлэе.

Нутгийн минь идээ

Нутгаас минь идээний дээж ирээд. Гоё байна өө.

Дээр нэг хүн бяслаг өгсөн юм. Нэг өдөр хөргөгчөө уудлаад л нээх гоё идчихмээр юм байна уу гэж харж харж байснаа нутгийхаа бяслагийг гаргаж ирж нэг том хазаж байж билээ. Даанч дорхноо л дуусчихсан.

Харин энэ удаад шар доктор чацаргана. Хэ хэ. Шингэлээд уухаар гоё шүү. Бага зулзага ч дуртай ууж байгаа.

Та хэдийг гоё газар, хүнс сайтай газар байгаа болохоор өгөх юм олдохгүй юм өө гэх. Харин бид чинь нутгийхаа амтыг санасан улс байх. Цагаан идээ, мах, жимс жимсгэнэ, самар гээд л.

Заримдаа ч сайхан шинэхэн өрөм талхан дээр түрхээд идэх юмсан гэж боддог юм шдэ. Хийж идэх гэсэн болж өгөөгүй, хуруу зузаан өрөм тогтдоггүй юм билээ. Сүүнийхээ тослогийг бүр үнээнийхээ идэшнээс нь авахуулаад хяначихдаг болохоор тэр байх гэж таасан.

За энэ шар доктороо шимэн шимэн бага багаар ууна даа, хэд хоног. Дүү нартаа баярлалаа.

Бас танил ахын өгсөн самарыг хэд хоног чөмөв. Багахан байсан болохоор дорхноо л дуусав.

Айраг нэг стакан олж уух завшаан тохиов. Аяа сайхан байсан шүү.

Удахгүй бас ижий аав 2-нхоо тарьж ургуулсан чацарганыг захиж авчруулаад өвөлдөө чанаж ууна даа. Түүхэд жаахан төвөгтэй, аав минь л байсгээд л гарч түүдэг гэсэн.

Ойрхон бол ирж түү гэхгүй юу л гэдэг юм, хөөрхий минь.

Нутгаа, ижий аавыгаа санахын жаргалаа гэж...

Гуйлтанд учир

Гуйх хүн бөхийж
Гуйлгах хүн гэдийнэ

Өө зөндөө л олон янзын гуйлт байна шүү дээ.

Би ч өөрөө хүнээс их гуйна, хүн л болсон хойно. Аль болох хямраачихааргүй гуйлт байлгах юм сан гэж хичээнэ шүү дээ. Заримдаа санаснаар болдоггүй ч...

Энэ удаад гуйлгасан тухайгаа бичих гээд л. Учир нь зарим нэг гуйлтаас болоод сэтгэл санаа давхар хямраад л явчих юм.

Өөрийн чадах зүйл байвал дуртай нь аргагүй л тэгээ тэг, бараг гуйгаагүй байхад нь надаас гуйгаарай гэх нь холгүй. Хэ хэ.

Саяхны нэг сэтгэл санаа хямраасан гуйлт гэвэл том зулзагынхаа эрүүл мэндийн даатгалын картыг зээлдүүлээч, монголоос ирсэн, даатгалгүй хүн үзүүлэх гэсэн юм.

Шууд л чадахгүй л гэлээ. Өвчнийх нь түүх үлдэнэ шүү дээ. Хойшид энэ улсад хэдэн жил ч амьдараа билээ? Тэгээд ч өөрийн гэсэн үзэл бодолтой, тэрийгээ ижий аавдаа чөлөөтэй илэрхийлдэг болж байгаа хүүхдийнхээ чухал картыг хууль бус зүйлд ашиглуулчихвал уурлана биз дээ.

Зүгээр ч нэг ханиад биш, нэлээд том зүйлд ашиглах гэж байсан болохоор амнаас шууд л чадахгүй гэдэг үг гарсан. 

Тэгээд ч энэ үйлдэл нь баригдчихвал зээлсэн, зээлдүүлсэн хоёулаа л торгуульна. Нэг ёсны залилан шүү дээ.

Бас жилийн эцсээр бүх л эмнэлэгт үзүүлсэн зардал он сар өдөртэйгөө ирнэ шүү дээ. Бид хань ижлийн компанийн шугамаар эрүүл мэндийн даатгал, нийгмийн даатгал зэрэгт хамрагддаг тул юмыг яаж мэдэхэв ажлынх нь газрын даатгалын асуудал хариуцсан хүн нь олоод харчихвал, хүүе том зулзага чинь тийм асуудалтай байсан билүү гээд л асуугаад явчихвал бид юу гэж хариулах уу?

Гэх мэтээр ургуулан бодоод л сууж байна даа.

Монголоос ирсэн оюутнууд хоорондоо ингэж их солилцдог гэж нэг хүнээс сонсож байсан юм. Яахав тэд төгсчихөөд эндээ үлдэж ажилд орохгүй, хэдхэн жил болоод буцчих тул асуудалгүй байж магад. Овоо хэдэн жилээр үлдэж ажиллах хүмүүст бол юмыг яаж мэдэхэв сүүлд нь асуудал үүсгэж магадгүй шүү дээ, тийм үү?

Эсвэл би хэт амиа хичээгээд байгаа юм болов уу?

Чадахгүй гэж хэлчихээд, тус болж чадаагүйдээ хэсэгтээ л сэтгэл хямраад, өгчихдөг ч байж уу гээд л бодогдоод байх юм.


Зөв явбал зөөлөн зөөлөн замбуулин
Буруу явбал будлиантай будлиантай замбуулин

Энэ сүүлийн бадгийг хэдэн жилийн өмнө хамаатны жаахан хүүхэд зохиож дуулж байсан юм. Тухайн үед өхөөрдөөд л өнгөрч байж. Сая харин санаад бичиж сууна.

Хүний хэрэгтэй, үнэтэй цайтай бичиг баримт, карт зэргийг хээв нэг гуйдагаа уг нь больчихвол тэ. Адаг сүүлд нь өгөөгүй бид л буруутай болж хоцрох байх даа.Ямар хүнсний дэлгүүрийн оноо цуглуулдаг карт өгч авалцах гэж байгаа биш.

Бас ихээ олон жилийн өмнө  нэг хамаатны ах банкны дэвтэр нээлгээд, картыг нь өгчих гэж гуйгаад, би ч юм бодолгүй за гэж хэлээд карттай болов оо, өгч явуулахын даваан дээр нэг учир мэддэг хүнд загнуулаад явуулахаа больчихсон. Хэ хэ.  Тэр ах хараар байсан юм.

Бас л олоон жилийн өмнө хань ижлийг нэг найз нь гадаад иргэний оршин суугчийн картныхаа хуулбарыг өгчих гэж гуйгаад, би урд нь учир мэддэг хүнд загнуулж байсан юм болохоороо хань ижилдээ учирлав. Тэгээд өгөөгүй шд.

Хүний газар хараар хэцүүдэж явсан олон улсад тус бололгүй, амиа хичээсэн улс даа би ч.

Гэхдээ бид ч бас хүний газар улс эх орныхоо нэрийг аятайхан авч явах гэж хэрэндээ л хичээж байгаа улс шүү гэдгийг ойлгох хэрэгтэй гуйж байгаа улс ч гэсэн, тийм ээ.

За тэгээд гадаад оронд ирсэн элэг нэгт хүмүүс минь толгойгоо, сэргэлэн зангаа зөв л зүйлд зарцуулахыг хүсье. Зөөлөн зөөлөн зөв амьдарцгаая.

Гараа минь амжилттай

9 сарын 1
Ерөөсөө бидний баяр даа.

Хичээлийн шинэ жилийн гараа амжилттай биз дээ, уншигч олон түмэн минь.

Жил бүрийн өдийд бага сургууль явж улсаа танилцуулдаг даа.

Ажлын газраас минь зохион явуулдаг арга хэмжээ.

Энэ жилийн гараа минь ч амжилттай боллоо. Сая нэг дэх өдөр очсон сургууль ганц л монгол улсын танилцуулгыг хүссэн байсан.

Ганц улс дангаараа очих тул цаг хангалттай байсан учир ажлынхаа газрын хариуцаж буй хүнтэйгээ ярьж байгаад нэг монгол оюутныг дайчлав. Тэр оюутны дүү нь амралтаараа ирсэн байгаа тул азны юм гээд давхар дайчлав.

Миний ажил хөнгөлөгдөнө гэсэн үг. Бага хугацаанд юм юм л танилцуулмаар болоод байдгийг хэлэх үү.

Хүссэн бүхий л зүйлээ танилцуулж амжсан.

Энэ жил шинээр нэг зүйлийг өөрийн танилцуулгадаа оруулав. Нэг ёсондоо агуулгаа баяжуулсан. Хэ хэ. Хэлэх гэхээр жаахан санаа зовоод,  өөрөө чадахгүй байж түүнийгээ хаа байсан арлын орны хүүхдүүдэд зааж маагаад байгаадаа. Ккк.

Дараа нэг дураа хүрвэл зураг оруулна аа. Юуг айхтар сүрхий мэдээд, заагаад, танилцуулаад байгаагаа.

Хамгийн сүүлийн сургууль явах өдөр 12 сард байгаа. 12 сарын дуустал өөрөө өөртөө амжилт.

Гэснээс хэдхэн сарын дараа шинэ он гарах гэж байна. Сая 12 сарынхаа ажлын хуваарийг харж байгаад гэнэт л юу билээ? Ийм хурдан он солигдох гэж байгаа билүү гэж бодов. Тэр болтол ажлуудаа нэг нэгээр нь амжилттай дуусгаад ард нь гараад байвал ч болох нь тэр дээ.

Та нартаа ч бас амжилт. Шинэ он гарах хүртэл урд урдах ажлаа хичээгээрэй.

Үүдэн шүд

Багахан зулзагын минь доод үүдэн шүд хөдлөв өө. Өөрөө их л баяртай хүн болгонд зарлаад л. Нэг өдөр цэцэрлэгтээ өнөөх шүдээ оролдож байгаад унахад бэлэн болгочихоод ирэв. Аниагаа тарж ирэхэд нь үзүүлсэн чинь аниа нь

-Өө, авчих, тэгэхгүй бол над шиг идчихнэ шдээ .
гэснээ суга татаад л авчихсан.
-Ёооё л доо.
Уйлж барьсангүй. Орой нь аавдаа шүдээ суга татуулаад уйлаагүй баатар хүн л тайлангаа тавьсан. 

Аниа нь өөрөө анхныхаа унасан үүдэн шүдээ цэцэрлэгтээ хоол идэж байхдаа залгичихаад ирсэн хүн байхгүй юу. Тэгээд ээж нь идэвхитэй юм болохоороо энд ингээд л бичиж байж.
http://saruul-uhaan.blogspot.jp/2008/01/v.html 

Уншсан чинь бас л хөөрхөн дурсамж. Коршоконд баалгаад, баасыг нь савхаар ухаад, залгисан шүдийг нь гаргаж ирж байлаа шүү дээ.

Хүүхэдгүй хүмүүсийн сэжиг нь хүрээд огиудас нь хүрж байна уу. Хэ хэ.

Хүн чинь аав, ээж болохоороо үрийнхээ төлөө юуг ч хийхэд бэлэн болно шүү дээ. 

Одоо онгорхой буйлтай хүн, хүн болгонд үзүүлээд л, хажуугийнх нь үүдэн шүд бас хөдлөөд эхэлчихсэн байна лээ.

Цаг хугацаа нээрээ үнэн харвасан сум шиг л хурдан байна шүү. Саяхан л улаан нялзрай байсан чинь. Хэ хэ.

Монте-Кристо гүн

Саяхан ажлынхаа Морокко хүнтэй суусан япон хүүхнийд очиж жаал ярьж суув. Морокко улс нь араб хэлнээс гадна франц хэлээр ярьдаг юм байна. Тэгээд л францын тухай ярьж байснаа Монте-Кристо гүний тухай яриад. Япон хэлээр орчуулагдан хэвлэгдсэн байдаг юм байна шд. Хэ хэ.

Том зулзага цуг явж байсан болохоор зулзагыгаа номын сангаас зээлж уншаарай гэж тушаал айлдав.

Ижийгийнх нь бага нас, анхны дурлалт залуу гээд л бүх л зүйл энэ номтой салшгүй холбоотой шүү дээ гэж ирээд л арван жилээ дурсав. Хи хи.

Номын сангаас зээлж ирнэ ээ. Өөрөө ч бас хальт харъя. Нетээс хайхад лав 7 дэтвэр байдаг юм байна. Суугуул нутгийн минь төв номын санд ямартай ч байдаг юм байна.

Харин энэ зургийг амазоноос авчлаа. 

Өөр нэртэйгээр ч хэвлэгдэн гарсан байдаг гэнэ. 巌窟王гээд.


Гэснээс нэгэн монгол шавийнхаа өгсөн хөөрхөн номыг уншиж эхлээгүй байгаа, яана аа. Тун удахгүй эхлэнэ ээ.

Хамгийн гол нь сатаарах зүйл ихдээд байх юм.

Энэ жилийн ном унших төлөвлөгөөндөө орууллаа.

Өөрийнхөөрөө сэтгэл хангалуун амьдрах

Түрүү жилийн өдийд энэ номны эхний дэвтрийг оруулж байсан даа. 10-хан хувцастай францчууд гээд. Тэр номыг уншсанаар ер нь шинэ хувцас худалдаж аваагүй шүү. Байгаа хэдэн хувцсаа сайхан угаагаад л өмсөөд болж л байна. Дотуур хувцас ганц нэгийг худалдаж авсан юм байна.

Бас нэг хэмнэх арга зааж өгөх үү? Биений өнгөтэй тирко өмсөхөө байсан. Ккк. Хар, хар хөх, нил ягаан, хар өнгийн хээтэй тирко гэж өмсдөг болсон. Ийм тирконууд нь арай удаан эдэлгээтэй. Өлмий энэ тэр нь цоорохдоо удаан. Ккк.

 Энэ тэр номны хоёр дахь нь. Ажлынхаа шинээр худалдаж номын жагсаалтанд оруулчихсан байсан юм. Ашгүй худалдаж авсан. Зарим санал болгосон ном томчуудын санал шүүмжээр хасагдчихдаг талтай.

За тэгээд уншиж эхэлж байна. Том зулзага амарч байгаа тул түрүүлээд уншив. Би их цаг зарж уншдаг тул сүүлд л уншъя гэж явсаар л... Хэзээ дуусахыг бүү мэд.

Ямартай ч японд амьдардаг уншигчиддаа санал болгоод эндээ зургийг нь орууллаа шүү. Энд тэндээс зээлж аваад уншина биз дээ.

Эхлээд удаагүй байгаа тул гол санааг нь хэлж арай амжихгүй ч эхний хэдэн хуудсанд лав "Өөрийнхөөрөө, байгаагаараа сэтгэл хангалуун амьдрах. Үүнд заавал мөнгөтэй байх албагүй, баян байх албагүй, хөөрхөн байх албагүй, гуалиг байх албагүй, заавал цаг завтай байх албагүй" гэсэн байна.

Хурдан уншиж дуусчихаад гоё гоё зөвлөмжүүдээс нь эндээ та бүхэнтэйгээ хуваалцана аа за.

Хичээл эхлэв

Уламжлалт бичлэг. Идээд л унтаад л даалгавараа хийгээд л ном уншаад л гэсэн дөрөвхөн үйлдэлтэйгээр 2 долоо хоног бүтэн амрав. Хэ хэ.

Дунд нь хааяадаа хоол хийхэд туслана, ганцаараа бие дааж хоол хийнэ.

Хичээл эхэлсэн өдөр шууд шалгалттай. Эднийг зуны амралтаараа хамаг юмаа хоолтойгоо хольж идэхээс нь сэргийлж албаар хичээл эхэлсэн өдөр тест авдаг шиг билээ.

Энд эгч дээрээ ирсэн нэг монгол оюутны буянаар крилл цагаан толгойгоо хальт цээжилсэн. Өдөрт хоёр л өгүүлбэр уншуулж байгаа. Түгдэрсгээд уншиж л байна. Гол нь ээж хичээж, өдөр бүр марталгүй уншуулах. Тэгвэл дорхноо л цээжилчих байх тийм үү. Хэдэн мянган ханз цээжилж буй хүүхдэд 35-хан үсэг юухан байхав гэж томчууд бодох ч, хүүхдүүд өөр бодолтой байдаг шиг.

Зуны даалгаврын нэг чухал нь чөлөөт судалгаа. Дунд сургуульд орохоор заавал хими физикийн хичээлээр хийх ёстой байдаг юм байна. Байсгээд л дэлгүүрээс ийм ч бодис авна, тийм ч бодис авна гэж явав.

Хэдэн өдөр гэр минь урлангийн талбар шиг л байлаа. Энд тэнд будаг болоостой, аав нь энэ юун цэнхэр, улаан, ногоон, шар будаг болчихов оо гэж үглээстэй.

Ингэж эдний боловсролынхон хими физикт дуртай зохион бүтээгч, судлаач, шинийг санаачлагч, инженер зэрэг хүмүүсээ багаас нь бэлддэг юм шиг байна.

Ийм чөлөөт судалгаа хийснээр мэдээж бүгд хими физик, шинжлэх ухаанд дуртай болно гэж байхгүй. Гэхдээ л ганц нэг хүүхэд байна аа даа.

Бага сургуульд бол ихэнхдээ энд тэндхийн номноос уншсанаа л хуулж бичих нь их байдаг бол ингэж сэдэв зааж өгснөөр уг хүүхэд өөрөө бодож сэтгэж хийх юм даг уу даа.

Гэхдээ ээжид бол жаахан яршигтай санагдсан. Байсгээд л тийм ч юм авна гээд л мөнгө нэхээд, дэлгүүр гүйгээд, гэр мэр хөглөрөөд байхаар. Үүнийгээ гэхдээ гадагш нь гаргаж хэлэхгүй л дээ. Хэ хэ.

Өнөө өглөө маш хүнд цүнхээ үүрээд гараад явлаа. Тестэнд нь амжилт хүсээд л сууж байя даа.

Ижий нь бас зүгээр суухгүй номоо уншина даа...

Өө тийм. Хоёр хоног айхтар бороо ороод японд энд тэнд сэрэмжлүүлээд л байсан юм. Онцгой байдал зарлаад сургууль амраасай гээд  залбираад байвал яах уу? Яг л амарч харагдана л даа.

Торойгоод л үлдэв би

Өнөөх шавь минь англи хэлнийхээ чадварыг дээшлүүлнэ гээд Филиппин яваад өгсөөн. 1 сарын хугацаатай англи хэлний сургалтанд сууна.

Сайн яваад ирээрэй, сурлагад нь өндөр амжилт хүсье гээд л сүүлчийн уулзалтыг өндөрлөв.

Очсон газрынхаа сонин сайхангаас дуулгана аа гээд цаанаа л нэг догдлоостой хүн.

Тэтгэвэрт гараад нэлээд хэдэн жил болчихсон манайхаар бол өвөө шүү дээ. Хэ хэ.

Тэтгэвэрт гарсныхаа дараах амьдралыг эд нар хоёр дахь амьдралын үе гэж нэрийддэг юм билээ. Үр хүүхдүүд нь томроод тусдаа гарчихсан. Ач зээгээ харна гэж түүртэхгүй улс ингээд л амьдралын зугаатай үе ирж байна гэж үзнэ.

Мэдээж бүгд бол тийм биш шүү. Дотор нь тэтгэврийн хэд нь хүрэлцэхгүй цагийн ажил хийх ч хүн байна. Ач зээгээ хараад завгүй хүн ч байна. Ганцаархнаа ч хүн байна. Өвчинтэйгээ тэмцэх ч хүн байна. Амьдрал баян шүү дээ.

Ингээд л эргэн тойрны хүмүүс шинэ зүйл эхлээд, ийшээ тийшээ яваад байхаар бяцхан атаархал төрөх юм. Хэ хэ. Угтаа би ч өөрөө монголд байгаа хэдийгээ бодвол гадаадад байгаа шүү дээ. Ккк.

-Зөө зөө, таныг хүлээж байх 2.5 жилийг ямар нэгэн юм шинэ зүйл сураад л хүлээж байя доо. Ирээд харин юун монгол болчихов оо, би хүлээж байгаа шүү.
-За. Гээд л инээд алдаад байсан.

Цэрэгт явж буй амрагаа хүлээх гэж байгаа хүн шиг л байлаа шд би. Хи хи. Филиппин явж ирчихээд ирэх жилийн 1 сард Канбожия явах юм. Тэндээ 2 жил болоод ирнэ.

Цаг хугацаа ч хурдан өнгөрнө дөө тэ. Харин энэ хугацаанд би ямар шинэ зүйл оролддог юм билээ байз? Англи хэл? Франц хэл? Солонгос хэл? Орос хэл? Дандаа гадаад хэл болчихлоо. Хэ хэ.

За за гол нь эрүүл саруул, гэрийнхэн дундаа эргэлдээд л байж байвал болно доо болно.

Та нартаа ч бас амжилт шүү.

Хогоо гэж

Хог гэж нэг ядаргаатай зүйл байна тэ. Хог гаргалгүй амьдрах нөхцөл бололцоо ч байхгүй болж.

Ядаж байхад энэ халуун улирлын хог ч үгүй ээ мөн хэцүү. Яагаад хэцүү гэхээр?

Долоо хоногт 2 өдөр нь шатдаг хог, 1 өдөр шатдаггүй хог гэж ангилж гадаах тусгай цэг дээр аваачиж хаяна. Хэсэг хэсгээр нь айл өрхөө хуваагаад тав алхаад л хогны цэг байна. Өглөө 9 цаг гэхэд хогны машин ирээд хүү хаа гээд л хамж ачаад явчихна. Харин шатдаггүй хог бол өдөр 12 цаг хүртэл байж байдаг юм. Учир нь элдэв үнэр танаргүй болохоор. Шатдаг хогонд элдэв хүнсний зүйлийн үлдэгдэл байдаг учраас үнэр танар гэж хэцүү хэцүү. Тэгээд ч эрт ачиж явахгүй бол хэрээ гэж гайхал тоншоод талаар нэг тараачихдаг учраас.

Шатдаг шатддагүйгээр нь тусгай уут худалдаж авч хийнэ. Хэмжээ нь ч жижиг, дунд, том гээд л байна. Жижиг нь дотроо бас хоёр янз. Зун бол хамгийн жижгээс нь аваад чихэж өгнө шүү дээ. Мэдээж хэмжээнээсээ хамаараад үнэ нь хүртэл өөр өөр.

Би ч хэмнэх дуртай юм болохоор жижиг уутанд л чихэж гардаг юм. Аль болох хог гаргахгүй байна үзэхээр яаж ийгээд л хог гарна. Ядаж байхад орчин үед бүх юм хуванцар савлагаатай болчихсоныг ч хэлэх үү.

Өдөр бүр гаргаж хаяхгүй болохоор гэрт өмхий үнэртээд л, хог хаядаг өдөр хурдан болоосой гээд л хүлээнэ шүү дээ.

Монголоос ирсэн нэг охин манайх бол өдөр бүр л гаргаад хаячихна амар, танай энэ япон чинь ярьшигтай юм бэ? гэсэн. Хэ хэ.

Хагас сайн өдөр нэг өдөр нь байдаг юм. Заримдаа өглөөд сайхан унтмаар байхад хог зүүдлээд л сэрнэ шүү дээ. Яана аа, хогны машин ирчихсэн үү? гээд л. Мэдээж ганц нэг удаагийн машинаасаа хоцорсон тохиолдол байна аа байна. Тэр үед л уруудах айл унтаж идэхээсээ гэдэг үгийг санаад л учиргүй санаа алдана шүү дээ. Ккк

За тэгээд шил, лааз, ундааны сав, хөөсөнцөр сав гээд л тус тусдаа гаргаж хаях өдөртэй. Заавал угааж байж хаяна.

Лаазтай хүнсний бүтээгдэхүүн бараг худалдаж авахгүй ч пивоны заал бол ихээр нь хаяна өө гэж. Ккк

Ундаа бараг уудаггүй болохоор энэ тал дээр хогийг гаргахгүй байж болоод байдаг юм. Ундааны хуванцар савыг хаяхдаа бас их учир жанцантай шүү дээ. Бөглөөг нь нэг, хаягийг нь нэг, тэгээд их биеийг нь нэг гэж ангилж хаяна.

Хөөсөнцөр савыг хүнсээ цуглуулахаар явахдаа тэр дэлгүүрийн үүдэнд байдаг тусгай хөөсөнцөр савны хогийн саванд хаячихдаг юм. Махаа хөөсөнцөр саванд хийж зарах нь их ээ. Тийм болохоор хаяхдаа бас л угааж байж хаяна шүү дээ.

Шил гаргаж хаях тохиолдол за их ховор юм байна. Гэснээс хааяадаа монгол архиныхаа шилийг хаяна. Сүртэй сүртэй шил. Шууд хараад л за энийг ч тэр монгол айл хаяж гэж шууд азаартахаар. Ккк. Ядаж байхад их эзэн Чингис хаан минь өөдөөс "аан чи намайг хүний газрын хогонд хөсөр хаях гэж байна уу?" гэсэн шиг ширтээд л. Аягүй хэцүү. Маань мэгзэм уншиж байж хаях гээд байгаа юм биш үү. Хэ хэ.

Нэг хөгжилтэй зүйл саначихлаа. Хэдэн жилийн өмнө монголоос нэг ах ирэв ээ. Энд хоёр жил гаран болсон байх. Тэгээд Чингис архины шилийг хогны цэг дээр гаргаад хаячихаж зүрхлэлгүй хээр эзгүй газар аваачиж хаясан гээд л ярьж байв шд.

Гэх мэтчилэн аяга шанага угаахаасаа илүү иймэрхүү хогоо угаах нь их шүү худалч хүнд. Хэ хэ.

Юу болоод гэнэт хогны тухай бичив гэхээр дөнгөж сая хогоо гаргаж асгачихаад ирсэн юм л даа. Тэгээд л...

Алга дарам газрын амт

Жилдээ нэг ийм гарчигтай бичлэг хийдэг дээ.

Хөрш айл тарьсан тарвасаасаа байнга хуваалцана. Энэ жил арвин ургац авч байгаа бололтой. Байсгээд л үүдэнд чинь тарвас тавьсан байгаа шүү, амт нь хэрхэн болсныг мэдэхгүй л байна. Энэ халуунд шингэнээ алдахгүй байхад чинь хэрэгтэй байж магад шүү гээд зурвас бичээд үлдээнэ.

 Яг дуусч байгааг нь мэдсэн юм шиг л ургацаа хураалаа гэсээр тэвэрсээр ирэх нь хөөрхөн, хайр хүрмээр. Хэ хэ. Ургацынхаа дээжээс үнэгүй өгч байгаа хүнийг хайрлахаас яахав тэ.

Гэрээсээ алхаад 5 минут орчмын газар танилынхаа газрыг хөлсөлж ганц нэг ногоо тарьдаг. Өөрсдийнхээ хэрэглээний ногоог л тарьдаг. Тэтгэвэрт гарчихаад зүгээр суухаар нэг л боломгүй санагдаад ингэж биеэ хөдөлгөж байхав гэж самган нь ярих.

Айлуудын дундах жижигхээн газраас л арвин ургац хураагаад атаархал төрүүлээд байдаг юм. Гол нь цаг агаарын хувьд их тохиромжтой. Бороо хур элбэг. Энэ нь ижийгийн минь атаархлыг давхар хүргэчихнэ.

Ижий аав хоёр минь ч алга дарам газрынхаа амтыг хүртэнэ л дээ. Бороо хур бага тул услахад жаахан төвөгтэй. Усанд нь гүйгээд өгөх хүн хүч ховор, заримдаа ч гүйж очоод усанд яваад өгмөөр, нэг бол энд хувингаар цутгаад байгаа юм шиг ордог борооноос шууданд хйичихмээр болдог юм.

Сүүлийн үед бас нэг санаагий нь зовоож байгаа зүйл гэвэл дүрсгүй хэдэн жаал.

Хашаанаасаа дээш саглайгаад ургасан мойлыг нь хулгуйгаар түүж идээд байгаа явдал.

Нэг өдөр ижий минь отож байгаад барьсан гэсэн. Тэгээд зураг хөргий чинь авчихсан. Нүүр номд тавина шүү гэж айлгасан юм уу даа. Хэ хэ.

Энд ямар ч хашаа хороогүй, хаалт хамгаалалт байхгүй шүү дээ. Хэн ч хүний хүч хөдөлмөрийг зүгээр мөлжье гэж бодохгүй.

Хүүхдүүддээ бүр багаас нь хүний юманд хүрз зээтүү шиг хандаж болохгүй гэж зааж сургадаг юм билээ.

Монголынхоо хүүхдүүдэд л ийм зан чанар багаас нь суулгамаар байгаа юм тэ. Хаан занд сургах биш хөдөлмөрч занд сургах.

Япон улсаас Монгол улсад суугаа элчин сайд хүртэл хэлсэн байдаг юм билээ. Монголчууд энэ хаан зангаа засчихвал ч хол явна даа гэж.

За тэр яахав, ирэх жил ч хөршийн минь ургац арвин байж бид нь тарвасаар тасрахгүй байг ээ. Хи хи...

Бүжиг

Суугуул нутагт минь жил бүр 8 сарын дундуур уламжлалт баяр нь болно.

Японд байдаг хүмүүс бол андахгүй дээ. Нутаг нутгийнхан уламжлалт бүжиг энэ тэртэй бол түүнийгээ бүжиглэнэ.

Албан байгууллагууд нэг баг гарган хотынхоо төв гудамжаар тойрон бүжиглэж цугласан жуулчид, наадамчин олныг баясгана. Өмссөн хувцас, бүжгийн ур чадвар зэргийг харж баясана, үнэлгээ өгнө.
  
Орой жаахан сэрүү орсон 18 цагаас эхлэнэ. Шүхэртэй бүжиг. Каса одори гэдэг юм. Тоттори мужийн каса одори гэхээр гараад ирэх байх.

За нэг байгууллагын бүжигчид.

Гадаад дотоодын жуулчдад зориулсан булантай. Тэндээ ийм шүхэр түр өгч бүжиглүүлнэ. Бид бас ирсэн зочдоо бүжиглүүлсэн. Бага зулзага бид хоёр бүжиглэсэн.

Бага зулзагын цэцэрлэг сэрүүцэх баяр, тамирын өдөрлөг зэрэгтээ ахлах ангийхаа хүүхдүүдээр бүжиглүүлдэг тул бага зулзага тэрүүхэндээ хөдөлгөөнөө мэдээд сэтгэл өндөр байсан.

Дан ганц хувийн байгууллага ч биш хотын харъяа байгууллагууд, төрийн албан хаагчид, мужийн захирагч хүртэл бүжиглэнэ. Хотын дарга нь бас бүжиглэнэ.

Манайхны гүзээтэй дарга нар нээх өндөрт,  асар масарт аахилаад суугаад байдаг даа. Нээх том том хулаар айраг аягалуулаад, хөлсөө арчаад суугаад байна.

Тэгэхэд эндхийн дарга нар нь ард иргэдтэйгээ хамт бүжиглэж, хамтдаа хөлсөө урсгаад л, хөнгөн шингэж гэж юүхэв. Мөн ард иргэддээ хүндэтгэлтэйгээр мэхийж гар бариад л.

Манай дарга нар мөн адил эднээс суралцвал тэ. Дандаа л ард иргэд нь энд тэндхийн соёлоос суралцаж байхаар...

Буудлага

8 сард хаа сайгүй буудлага болно. Том хот газрууд сүр буудлага зохиодог юм билээ.

Хөдөөнийхөн бол тэрүүхэндээ төсөвтөө таарсан, иргэдээ чамгүй л баясгасан буудлага хийнэ.

Оросоор салют -г монголоор буулгар гэхээр бас яг таг оноосон үг олж чаддаггүй ээ. Та нар минь оноож хэлж өгөөрэй.

Гар утсаараа авсан ганц нэг зураг оруулъя.

Эгзгийг нь тааруулж авахгүй бол унтарсан хойно нь дарагдаад байх юм билээ. Авъяас шаардсан эд билээ шүү.

Их л хичээж дарлаа.

Төгсгөлийн буудлага нь уг нь их сүрлэг болсон юм. Даанч зураг дарах хэмжээ хэрээс хэтэрсэн байна гээд болдоггүй. Ийм л 3 зурагтай ирлээ блогтоо.

Яг ч хотын төвсөөс гаргадаггүй юм шиг байна лээ. Том том аж ахуйн нэгжүүд, компаниуд ивээн тэтгээд, өөрсдийн нэрийг зарлуулаад буудуулдаг юм билээ.

Мэдээж ямар ч хоггүй шүү дээ. Дуусаад эргээд харахад. Энэ занг л суралцмаар байгаа юм манайхан. Тэгвэл ч аяндаа хөгжөөд ирэх байх даа.

Бужигналдав

8 сард хуулиараа яг тэд дэх өдөр амарна гэсэн амралтын өдөр байхгүй ч албан газрууд өөр өөрсдийн хувиараар хэд хоног амардаг юм.

Бурхан болоочдынхоо газар дээр очиж эргэнэ, хот газар амьдардаг үр хүүхэд нь ижий аав дээрээ очиж амрана.

Бид ихэвчлэн уул явж амардаг байлаа. Хааяа монголоос зочидтой үедээ гэр зуур амарна.

Энэ жил уулынхан маань манайд ирээд. Байнга очиж төвөг уддаг бид тэднийгээ аятай тухтай байлгах гэж, амттай хоолоор дайлах гэж хэрэндээ сандарлаа.

Урьдчилан бууз банш хийж хөлдөөлөө. Бас цуйвангийн гурил зуурч элдэж хөлдөөлөө.

Япон хүмүүс дан гурил мах идээд хоолшихгүй тул хажуугаар нь салат, будаа агшаах, мисо шөл хийх гээд л миний хамаг ур чавдарыг шалгасан өдрүүд байлаа.

Нэг сайхан нь япон ээж бол зүгээр суухгүй, алив туслая гээд ханцуй шамлан наддаа ихээхэн тусалсан. Хань ижил бас гарынхаа өндгийг шарж өгсөн. Японы хуйлж шарсан өндөг. Би тэгж шарж чадахгүй, албаар том зулзага хань ижлээрээ хийлгэдэг юм.

Ер нь ганц нэг чадахгүй зүйлтэй байхгүй бол хэцүү шүү шинэхэн ээжүүдээ, эхнэрүүдээ. Ккк. За энэ талаар та нарыгаа хүсвэл зөвлөгөө өгч болно шүү. Хэ хэ.

6 хүүхэд 6 томчууд бие биенийхээ дуу хоолойноос илүү гарч ярих гэж ядарлаа шд. Бага зулзагын дуу чангыг ч хэлэх үү?

Гайхшралыг минь дандаа төрүүлдэг нэг зүйл бол энэ япончууд шөнө орой хэдэн цагт ч унтсан өглөө хар үүрээр гозойж байх юм.

Бүр хүүхдүүд хүртэл. Маргааш өглөө сайхан унтаарай гэж захиад байхад шүү. Монголчууд болсон манай гэрийнхэн л хамгийн орой босоод байгаа юм биш үү? Яг адилхан цагт унтсан улсууд шүү дээ.

Бүр багаас нь орой эрт унтаж, өглөө эрт босч, өглөөний цайгаа заавал уух гэсэн амьдралын хэв маягт суралцсан байдаг болохоор бие организм нь ч сурчихсан байдаг бололтой.

Өнөөдөр зочдынхоо сүүлийн баг бүрэлдэхүүнийг үдэж гаргачихаад нам жим болсон бидэн 4 бужигналдсан хэдэн өдрөө эргэн дурсаад л сууж байна.

Япончуудын зангаар юун дээр алдав? Дараа ирэхэд нь яах уу? ийх үү? гээд л. Ккк

Маргаашнаас ажилтай. Хэд хоног идэж уусан жингээ яаж хасна даа гэж шаналаастай. Хэ хэ

Хажуугаар энэ халууныг ээ? Хурдан сэрүүсээсэй...

Жич: 8 сарын 11 өдрийг "Уулын өдөр" гэж нэрийдэн олон нийтийн амралтын өдөр болгосон, энэ жилээс.

Алт

Гэснээс том зулзага өнөөх үлээвэр хөгжмийнхөө тэмцээнд алт авсан шүү дээ. 2 жил дарааллан. Бүсийнхээ тэмцээнд эрх авахад тун бага оноо дутчихсан гэсэн. Харамсалтай. Ирэх жил заавал бүсийн тэмцээндээ явна даа гэсэн хүн л байна. Том зулзагаа цаашлуулаад
-Миний охиныг орсон жилээс алт аваад эхэлсэн үү?  Үгүй юу?
-Үгүй ээ. Эрхлэгч багш мундаг болохоор.

Эрхлэгч багш нь том зулзагыг дунд сургуульд ордог жил шилжиж ирсэн. Мэргэжил нь дуу хөгжмийн багш. Их мундаг хүн гэсэн. Аав нь муждаа их алдартай юм билээ. Хөгжмийн зохиолч, багш хүн байсан хүн гэнэ. Одооны мундаг мундаг дуу хөгжмийн багш нар заалгадаг байсан гээд л яригддаг юм.

Тэгээд л бодлоо. Ер нь багш хүн бас асар их нөлөөтэй байх юм даа гэж.

Үлээвэр хөгжмийнх нь дугуйлангийн багш гэж тусдаа байдаг. Тэр багшийгаа "Гадагшаа гаргаж илэрхийлэхдээ, зүйрлэхдээ жаахан тааруу" гэж авсан. Тэрнийх нь хажууд эрхлэгч багш нь хатуу ширүүн ч гэж юүхэв, загнахдаа, удирдахдаа маш уран чадварлаг, сурагчдын сэтгэлд хүрдэг юм байх.

Бас л бодлоо. Багадаа багш нартаа элдэв хоч өгөөд л, сайн муугаар нь ялгаад л байдаг байснаа. 

Энд Япон хүүхдүүд  бас багш нартаа хоч өгчихнө өө.

Хөөрхий муу ардын багш нар. Муу ч нэртэй сайн ч нэртэй байх юм даа.

Алт авсан гээд гавъяа байгуулсан амарч байна. Зуны хэдхээн хоногийн амралтынхаа ихэнхийг саяын тэмцээнд бэлдэж өнгөрөөнө.

Тэмцээн дуусаад сургууль энэ тэр орохгүй жинхэнэ утгаараа амрах нь 7-хон хоног шахуу. Болоогүй ээ зуны даалгавар гэж байна.

Даалгавраа хийж байгаа юу гэж үглүүлнэ.

Монгол дахь хүүхдүүдтэй харьцуулахад амраад байгаа ч юм шиг, үгүй ч юм шиг.

Монголын 12 жилийнхэн та нар бол жаргалтай мангар бацаанууд шүү. Ккк. Хэт жаргаад амар сайхан жаргалгүй хичээлээ ч, дугуйлан секцээ ч бас хааяадаа сөхөж хараад явдым шүү. Эх орны минь ирээдүй та нарын гарт...

Хэрэг гарсан шүү

Агсан тавьсны минь хэрэг гарч, хэдэн хөөрхөн блогчид минь эхнээсээ блогтоо салхи оруулж эхэлсэн шүү.

Үе үе ингээд агсан тавьчихаж байх нь зөв юм байна. Хэ хэ.

Гэхдээ та нар минь намайгаа бага агсан тавиулаарай. Ккк

Олимпоо ч үзээд, та нарынхаа блогийг ч уншаад энэ халуун өдрүүдийг даваад гарчихвал ч.

Япон орон даяараа маш их халж байна аа.

Сая өнгөрдөг бүтэн сайнд далай явж жаахан сэрүүцсэн юм байна.

Бага зулзага хавч энэ тэр тоох ч үгүй барьж гүйгээд цуг явсан монгол харчуудыг алмайруулсан. Өнөөдүүл нь айгаад гар хүрч чадахгүй байхад. Ккк. Жижигхээн л хавч байсан уг нь. Харин тэр айгаад байсан харчуул нь ханхар ханхар эрчүүд шүү дээ. Хэ хэ.

-Авч хариад хавчны шөл хийж уух уу?
-Юу яриад байна? Ижий минь, хөөрхий амьтан.

Бүр итгэчихсэн, харихдаа надаас нууцаар буцааж далайд нь тавьж харагдсан.

Алтан загас байсан бол тэ? Далайд нь буцааж тавихад хүслээ хэл гээд л. Би нь хүслээ хэлээд л. Ккк. Гялс монгол нисчихээд ирье л гэж хүсэх байх даа...

Хэдэн өдөр зугаатай байх нь

Олимп эхлээд хэд хоног баясах юмтай сайхан байх нь. Нээлтийг үзэж эх орныхоо, амьдарч буй газрынхаа тамирчдыг орж ирэхийг нь харан баясаж, зураг дарж нүүр номдоо оруулав.

Гэснээс энэ нээлт Америк Япон хоёр олоон жилийн өмнө хэрэлдсэн өдөр таардаг гэнэ. Ккк
Бага зулзага:
-Маргааш Америк Япон хоёр хэрэлдсэн өдөр. Атмын бөмбөг унаад, нар бүхлээрээ унаад ирэв үү гэлтэй айхтар халуун, гэрэл гялбасан гэсэн.
-Тийм үү? Хэн тэгж байна?
-Цэцэрлэгт тийм яриа хийсэн шд.
-Аан.

Албанаасаа тарж явахдаа ээждээ ярьсан зулзага минь.

Өглөө нь нээлт үзэж байхдаа зулзагынхаа яриаг санаад яг олимпын нээлттэй давхцаж байгаа юм байна гэж бодов.

Бас нэг чухал арга хэмжээтэй давхцаад. Тэр нь том зулзага үлээвэр хөгжмийн тэмцээнд сургуулиараа орж байгаа. Эхлээд мужийн нэрэмжит. Хэрэв алт аваад шалгарвал бүсийн хэмжээний тэмцээнд явна. Түрүү жил бас энэ тухай бичиж байсан даа. Алт авсан. Гэхдээ алт нь дотроо хоёр янз гээд л. Бүсийн тэмжээнд явах эрхтэй алт, эрхгүй алт гэж. Жаахан харамсалтай нь эрхгүй алт авсан. Гэхдээ л алт бол алт. Хэ хэ. Хэдэн жилийн дараах алт гэлээ дээ, хүүхдүүд өөрсдөө их л баяртай байсан.

Ирэх жил гэрээрээ үзэхээр явна даа. Өнгөрдөг жил, энэ жил тодорхой шалтгааны улмаас явсангүй. Ирэх жил заавал үзнэ гэж том зулзагатаа амлачихаад л сууж байна.

За тэр яахав, хоёр нутгийнхаа тамирчдад зөндөө их амжилт хүсье.

Хорхой шавьж

Япон хүүхдүүд хорхой шавьжинд ямар их дуртай гээч. Тэр дундаа эрэгтэй хүүхдүүд бүр ч. Бага зулзага бас дутахгүй, хорхой барьж гүйгээд миний дотор арзагануулчихна аа. Гэхдээ одоо бараг дасаад, хөөрхөн юм бэ гэх нь холгүй болов. Ккк

Сая номын сангаас дандаа хорхой шавьжны тухай ном зээлж авав.
-Дуртай юм чинь, та харин уншиж өгнө шүү.
-За.

Нэг ийм хорхой байна. Япон нэр нь данго мүши. Англиар wood louse гэдэг гэнэ. Модны бөөс? Ойн бөөс? Ёстой хэлж мэдэхгүй юм.

Өнөөх чинь ингээд бөөрөнхий болчихдог юм. Зараа шиг. Тийм болохоор хүүхдүүд сонирхоод барьж гүйгээд байдаг байх. Бага зулзага хаа нэгтээгээс олоод л ирчисэн, та үүнийг түр барьж байгаач гэж ирээд л надад өгнө. Хэхэ. Эд чинь бүр эр эмийг нь хүртэл мэдээд байх юм билээ. Элбэг ч гэж юүхэв, энэ хорхой.

За энэ нэг хорхойг бүр тэжээнэ гээч. Голцуу эрэгтэй хүүхэд тэжээж харагддаг юм. Зарим цэцэрлэг бас загас тэжээдэг шиг тэжээгээд, хүүхдүүд тэрийг нь ажиглаад, суралцаад? явдаг шиг. Японоор кабүтомүши. Англиар Japanese rhinoceros beetle. Латинаар Trypoxylus dichotomus .

Энэ гайхлыг күвагатамүши гэнэ. Бас л тэжээнэ. Англиар Stag beetle.

Энэ гурав бол төлөөлөл. Цаашлаад шоргоолж, эрвээхэй, цох хорхой гээд л явж өгнө. Тэжээхгүй ч барьж гүйгээд энийг хараа гээд л.

Номын сангаас зээлж авсан ном. Ганц хоёр нь л өөр, бусад нь ямар нэгэн байдлаар дандаа хорхой шавьж. Хорхойны нүүр, хоолоо оллоо доо гэх мэт гарчигтай. Тухайн хорхойны тухай танилцуулга, онцлог гэх мэт бүхий л зүйлийг сонирхолтой аргаар бичсэн нь их. Тийм ч болохоор хүүхдүүд багаасаа хорхой шавьжинд дуртай байдаг байх.

 

Манай Монгол хүүхдүүд шиг хөдөө гарч таван хошуу малтай харьцах гэх мэт ойлголт байхгүй учир ийнхүү хорхой шавьжаар дамжуулж хорвоотой танилцдаг болов уу?

 

Эсрэгээрээ Монгол хүүхдүүд аалз энэ тэр харахаараа уйлах нь холгүй байдаг юм билээ. Хэ хэ. Дээхэн нэлээд том хүүхэд шдээ, ирчихээд байрлаж байгаа айлынх нь 00-д аалзны тор байна яах вэ гэж ирээд л уйлагнаж утасдаж байсан юм даг. Ккк. Аалзны тор харчихаад уйлаад байхдаа яадаг юм, бла бла гэж загнаж орхисон. Одоо ихээ том болоод загнуулснаа бодоод уур нь хүрдэг байх даа. Ккк

 

Дээрх хорхойнуудын зургийг нетээс гуйж авлаа. Баярлалаа нет гуай, хүссэн болгоноо танаасаа л авчих юм даа.

Шавь хайж байна

Шинэ шавьтай болохгүй бол. Яасан гэхээр өнөөх эх оронд минь ажиллаж байгаад ирсэн шавь дахин шалгалт өгөөд Камбож явахаар тэнцчихсэн.

Жайка сайн дурын ажилд. Монголоос ирчихээд нэг хэсэг сэтгэл санаа нь тогтож өгөхгүй байсан юм. Хаашаа ч хамаагүй л дахиад явмаар байна гээд л. Тэгээд Жамайк явах гээд шалгаруултад орсон ч 2 дахь шатандаа тэнцээгүй юм.

Бууж өгөхгүй үзсээр байгаад Камбож явахаар болов. Би нь жаахан л гонсгор. 2-хон жил болоод л хариад ирнэ гэж бодсон ч.

Харьж ирэхээр нь буцаад Монгол руугаа урвуулах юм шүү.

Одоо юун монгол хэл л байгаа. Сүүлийн үед ч олигтой заагаагүй, би л япон хэл асуух нь ихсээд байсан юм. Буу халах л гэж долоо хоногт нэг уулздаг байлаа.

Ингэхэд эх хэлээ заана гэдэг чинь асар ярвигтай. Автоматаар цээжил ээ гэх үе зөндөө зөндөө. Ккк

Гол нь их сэтгэлтэй хүн. Монголд байхад нь тусалж байсан, уулзаж учирч байсан хүмүүстэйгээ эргээд холбоотой. Тэднийхээ захьсан зүйлийг хайж олоод явуулчихна. Японд явж байна гэхээр нь байгаа газарт нь очоод уулзчихна. Гэртээ уриад мужаа танилцуулчихна.

Намайгаа бага залуу, юм мэдэхгүй гэж голохгүй.

Хариу нь гардаг өдөр бидэн хоёрын уулзаж учирдаг өдөр таараад. Байсгээд л нетээ сөхөж хардаг гэж байгаа. 11 цагийн үед харсан чинь байна аа. Хувийн дугаараа хайлаа,
-Хүүе ээ, байна шдэ, таны минь дугаар.
-Нээрээ юу?
Шилээ зүүж ирээд л харав. Баяр хүргэж гар барив.Тэнцсэн баяраа тэмдэглэж тансаг үдийн хоол идэцгээв. Даалгасөөн. Ер нь уулзаж буу халах болгондоо л даалгадаг юм дөө. Ккк

Эдний энэ өөрийгөө өвөө, эмээ гэж голохгүй, хөгширлөө гэж сэтгэлээр унахгүй зүтгээд байдаг занд нь дуртай.

Маргаашнаас монгол хэл сурах бишээ надтай япон хэлээр буу халах шавь багш хайхаас. Хэ хэ.

Бичээчээ блогчидоо

Нэг мэдсэн би л ганцаараа бичээд байх юм. Бусад блогчид хаачив?

Бич л дээ та нар. Яасан их амардаг юм? Яасан их яасан их уддаг юм?

Би ганцаардаад байна. Та нарын бичлэгийг санаад байна. Уйдаад байна.

Нүүр номоос холд л доо. Бас тэр твиттерээ хаачих л даа.

Эндээ хүрээд ир...

Ирэхгүй бол би ч гэсэн бичихгүй таг боллоо шүү...

Хүүхдийн төлөөх арга хэмжээ

Хүүхдэд зориулсан арга хэмжээ. Найз хүүхэн охинтойгоо би бага зулзагатайгаа. Охид ийм модон тоглоомоор тоглоод ухаан алга, 2 ээж буу халаад ухаан алга.

Ингэж цугтаа тоглохоор ээжүүдэд их амар байдаг юм. Ээжүүд тайван гэгч нь буу халаад.

Энэ бас их хөөрхөн. Хооронд нь эвлүүлээд төрөл бүрийн л зүйл хийж болно.

Бага зулзага ийм дугуй юм л өрөөд байсан.

Модон хөгжим. Хүүхдүүд хамаг чадлаараа л балбаж харагдана лээ. Би бас балбаж үзсэн. Хэ хэ.

Хүүхдүүдээр таавар таалгаад, сонингоос үсэг хайлгуулаад, үнэгүй шаар тараагаад л манай энд ийм их хүн амьдардаг билүү гэж бодохоор л хөл хөдөлгөөнтэй байсан.

Авсаархан, аятайхан, өгөөжтэй арга хэмжээ их зохиох юм аа. Болж өгвөл бүгдэд нь л оролцоод, санаа аваад баймаар. Тэрийгээ эндээ бичээд, зураг хөрөг оруулаад, тэрийг нь уншигч олон минь ямар нэгэн байдлаар ахуй амьдралдаа, ажил хэрэгтээ хэрэгжүүлээд л тэ. Гоё уу? Гоё. Ккк

Бас ээжүүдэд зориулсан эрүүл мэндийн булан гэж байсан. Жинг нь үзнэ, дотоод өөхлөлтийг хэлж өгнө, ясны сийрэгжилтийг нь харж өгнө, нүүрний арьсны чийгшилтийг хэлж өгч байсан.

Мөн энд тэнд идэж уух зүйлийн худалдаа, амталгаа байсан. Ихэнх арга хэмжээнд идэж уух зүйл байна. Учир нь япончууд дандаа л идсэнээ ярьдаг улс болохоор. Ккк

Хүүхдийн хүмүүжлийн талаарх яриа болж байсан бас. Нэгэн мундаг хүн уригдаж ирээд, яриад л байсан. Зурагтаар гардаг хүн байсан болохоор хүмүүс пиг. Би ч тоосонгүй. Бага зулзагаа тоогоод завгүй хүн чинь...

Ингэхэд шинэ сар гарчихсан юм байна шд. Өнөөдөр л мэдлээ. Ккк. Халууныг даваад гарчихвал ч...

Тоор жимс

7 сарын сүүл 8 сарын эхээр болдог тоор жимс.

Уулынхан минь тарьдаг юм. Бид жил бүрийн өдийд боловсордог цагт нь очиж үнэгүй идэж эрхэлнэ. Яг л хөдөөний оюутан улсууд амралтаараа гэртээ харьж идэж уудаг шиг. Ккк

Энэ жимс их эмзэгээ. Чангахан барьвал хөхөрнө. Тэгэхээр худалдаанд гаргаж болохгүй. Тийм болохоор дэлгүүрт их үнэтэй байдаг юм.

Гэхдээ амт, үнэр гэж дэргэдэх хүндээ ч өгмөөргүй. Хэ хэ.

Өөрсдийн гэрээсээ шууд борлуулалтаа явуулна. Мэддэг хүмүүс нь жил бүр ирж худалдан авна. Ойрхон ганц нэг худалдааны газарт өгч борлуулдаг болж байгаа гэсэн. Бас утсаар захиалга аваад явуулна.

Их ажилтай эд минь. Нэг зүгээр суухгүй...

Шуналаа л дарцгаая

За энэ хүнийг мэдэхгүй хүн ховор биз ээ?  2012 онд од болсон хүн.

Нүүр номоор ч гэсэн нэг хэсэг явсан даа. Дэлхийн хамгийн ядуу ерөнхийлөгч гээд.  http://www.ikon.mn/n/eu7　Эндээс уншаарай.

Манай ажил ийм хоёр ном худалдаж аваад. Тэсгэлгүй зээлж уншиж байгаа нь энэ.

Энэ хүүхдэд зориулсан ном. Мүхико ерөнхийлөгчийн илтгэлийг 2012 онд тавьсан илтгэлийг нь хүүхэд уншаад ойлгохоор бага зэрэг хялбар үгийг сонгож бичсэн.

Энэ болохоор тавьсан илтгэлийг нь бүрэн эхээр нь орчуулж нийтэд хүргэсэн ном.

За гол санаа нь шуналаа л дараад авбал аз жаргал гээч өөрөө л хүрээд ирнэ гэнэ дээ.

Үнэн, үнэн.

Илтгэлийн эх хувь, орчуулга нь нет ертөнцөд их байгаа байх гэж бодож байна. Хүсвэл өөрсдөө хайгаад уншаарай. Нэгийг бодогдуулна шүү.

Завтайсан бол орчуулаад л та бүхэндээ хүргэмээр л байна.  Хэхэ. Хэлтэй устай хүмүүс бол эх хэлээр нь уншвал илүү л сэтгэлд хүрнэ тийм үү?

Уругвай улсын ерөнхийлөгч байсан хүн шүү дээ, нэмээд хэлэхэд. Ерөнхийлөгч хүн гэхэд ажилдаа явах машинаа өөрөө барьчихдаг, гал тогоондоо аягаа өөрөө угаачихдаг, улсаас нь гарганж өгдөг ордонд биш эхнэрийнхээ эзэмшлийн жижигхээн фермд амьдардаг. Цалингийнхаа 90 хувийг буяны үйлсэд болон намдаа хандивладаг, үлдсэнийг нь тэтгэвэрт гарахдаа байгуулна гэж боддог ядуу хүүхдүүдийг хүлээн авч хөдөө аж ахуйн боловсрол олгодог сургуульдаа зориулж хадгалдаг. Бие хамгаалагч гэж байхгүй, ноход нь түүний үнэнч бие хамгаалагч.

Ядуу гэдэг ойлголт нь ханахаа мэддэггүй хүсэл шуналыг хэлнэ ээ гэж...

Олон улсын тансаг ерөнхийлөгчүүд үлгэр жишээ аваад явчихмаар тэ. Хэ хэ.

Би ч угийн шуналгүй хүн дээ, хэхэ. Шуналаа улам л дарах хэрэгтэй юм байна даа гэж. Ккк

Гэснээс саяхан И-март гэдэг дэлгүүр нээгдээд бөөн юм болсон сурагтай тэ, хэхэ. Хол байгаа бидний чихэнд ч аль хэдийн хүрчихсэн шүү дээ. Гадныхан биднийг шоололдоод л, бид дотроо алалцаад л. Яаж байгаа юм бэ дээ, та нар минь.  Жаахан юм үзсэн юм шиг байцгаая л даа.

За энэ ч яахав, энэ эрхэм хүний илтгэлийг заавал олж уншаарай уншигч олон минь. Амжилт шүү.

Гэснээс ном танилцуулахдаа маш товч болчихоод байгаад өршөөнө биз ээ? Та нарын хүслийг бадруулж байгаад л орхичихож байгаа царай нь шүү. Хэ хэ. Биднийг бага байхад ээж минь гоё гоё номны тухай хальт дурдаад л дуусаа, өөрсдөө олж унш гэдэг байж билээ. Ээжийгээ дуурайж байгаа нь тэр. Ккк

Дахин шинэ цэс

Сая бүтэн сайнд ууланд өнжихдөө ийм гоё хоол хийж идлээ. Япон ээжтэйгээ хамтарч. Энд ирэхээрээ гэртээ тэр бүр хийж иддэггүй япон хоол их иднэ ээ. Ногоог нь түлхүү иднэ.

За ийм хулуу байна. Япон аав өөрөө тарьсан. Надад өгч явуулах гэсэн чинь арай болоогүй байна, болохоор нь өгнө өө гэсэн. Хэ хэ. Энэ өдөр болсон байснаас нь түүж хоол хийв.

Угаагаад зураг дээрх шиг хэрчээд доторх үрийг авч цэвэрлэнэ.

Дотор нь амталсан татсан мах хийж өгнө.

Хэрчиж тавьсан хулууныхаа ногоон иштэй дээд хэсгийг нь таг болгож дээр нь тавиад 20 минут жигнэж өгсөн. Зурган дээр байгаа чинжүүтэй махтай цуг жигнэчихсэн. Чинжүүтэй махан дээр бага зэргийн бяслаг тавьбал улам л амттай болно.

Шар хулуу олон байвал гэр бүлийнхээ хүний тоогоор хийвэл нэг хүн урдаа нэгийг тавиад л халбагаар ухаж иднэ. Бид олуулаа байсан болохоор дундуур нь хэрчиж хувааж идсэн тул  мах нь бутраад идэхэд жаахан л хэцүү байв.

Муу хүн идсэнээ л гэдэг юм одоо яая гэхэв. Хэ хэ. Япончууд тувт идэх юм л ярьдаг, тэгэхээр тэд бүгд муу хүн? Ккк

Сэрүүцэх баяр

Цэцэрлэгт тэмдэглэх "сэрүүцэх баяр"-ын сүүлчийнх нь. Бага, дунд сургуульд тэмдэглэдэггүй байх аа.

Ахлах бүлэг нь эндэхийнхээ уламжлалт бүжгийг олон хоногийн өмнөөс бэлдэж, арга хэмжээний нээлтэнд бүжиглэдэг юм. Оройд тарж ирээд хааяа бүжиглэж давтдаг байлаа, гэртээ.

Бүгд л хамаг гоё дээрээ тавьчихсан ирнэ. Зун өмсдөг үндэснийхээ хувцас юкатаг өмсөнө. Банди нар бол ерөнхийдөө богино өмд, богино ханцуйтай цамц өмсөнө. Охид бол сонголт ихтэй. Богино, урт, дэрвэгэр гээд. Охид бас толгойгоо их чимнэ ээ. Том том цэцгэн чимэглэл зүүнэ.

Бага зулзага минь аниагийнхаа өмсөж байсан юкатаг өмсөөд, үсээ хоёр боогоод, манай ажлын газрын нэг хүүхний өгсөн ягаан боолтыг зүүгээд, хөөрөөд л явав.

Замдаа бүдэрч унаад, бага зэрэг уйлсан. Азаар гар хөл нь шалбараагүй.
-Уйлсан минь мэдэгдэж байна уу? ээж ээ
-Нүдээ нухаад хэрэггүй шүү зулзага минь. Тэгвэл улайгаад бүр л улайна.
-За.

Цэцэрлэгтээ очоод, найзуудыгаа хараад, нээлтийн бүжгээ алдаагүй сайн хийх гэсэн зүйл давхцаад бүдэрч унаад өвдсөнөө мартчих шиг болсон. Хөөрхий минь.

Бүжгээ маш сайн хийсэн. Ээж аавууд бүгд л хүүхдийнхээ зургийг нь дараад, бичлэг хийгээд бас завгүй. Бусад бүлгийн ээж аавууд харин дуусахад нь сайхан нижигнэтэл алга ташиж өгөөд, аврагдсан. Хэ хэ. Тэгэхгүй бол алгаа ташмаар байдаг, хоёр гар завгүй байгаад байдаг.

За тэгээд нээлт дуусахаар чөлөөт арга хэмжээ эхлэнэ. Багш нарын, эцэг эхийн зөвлөлийн хариуцсан хүмүүсийн зүгээс зохион байгуулдаг хөгжөөнт тоглоом зэрэгт оролцоно.

Бага зулзага ангийнхаа хоёр бандитай. Хар цамцат тэр өдрийн найз бандиар тодорсон. Юун Такүма күн. Хэ хэ. Шаал өөр нэртэй банди байна лээ.

Сэрүүцэх баярын хаалтын буудлага. Дуусахаар нь хүүхдүүдэд бэлэг өгөөд, тарцгаана. Бэлэг нь зун цагт тохирсон, жижигхээн буудлага? байсан. Тэгж байгаад нэг орой гэрээрээ буудуулна.

Тараад бид уул явцгаасан. Уулын сонин сайхангаа бичнэ ээ.

Нэг иймэрхүү хагас бүтэн сайн үнэн завгүй өнгөрөх юм дөө.

Шинэ цэстэй болов

Сэтгэл гаргадаг өвөө найз нараасаа хаш? ногоо их аваад байгаа.

Оройн хоолондоо хийгээд хийгээд идэж барахгүй. Хэ хэ. Яагаад барахгүй байна гэхээр зулзагууд минь тийм ч дуртай биш. Тийм болохоор багахан хийдэг юм.

Саяхан нет-с амархаан хоол хийх арга гээд хайсан чинь түм бумаараа л гарч ирж байна.

Залхуу юм болохоороо хамгийн амархныг нь сонгов.

Яг энэ зургийн нетээс зээллээ шүү. Бас яг ингэж хэрчинэ шүү.

Дээр нь хиам эсвэл утсан хиам хэрчиж тавина. За ер нь юу ч байж болно дөө. Хүүхдийнхээ дуртай зүйлийг л хэрэглэхэд болох байх. Дараагаар нь бяслаг тавьж өгнө. Би бяслаг тавьсныхаа зургийг дарахаа мартсан байна. Тэгээд шарах шүүгээндээ хийж шарна. Нетийн заавар дээр 5-10 минут гэж байсан. Би 15 минут шарсан.

Бэлэн болсон байдал. Амттай байна гэж тал талаас нь шүүрч идсэн. Зураг дарахын хооронд. Одоо оройд ингэж хийж идээд байгаа. Тэгсэн өнөөх дуусч өгөхгүй муудчих гээд байсан ногоо минь нүд ирмэхийн зуур дуусдаг гэнэ ээ.

Өвөө нар луугаа утасддаг юм уу хаашаа юм? Ногоо дууслаа, та нар үтэр түргэн ирж хаш ногоогоор ханга гэж. Ккк

Шарахдаа шарах шүүгээнийхээ тавган дээр ийм цаас дэвсэж өгөөрэй. Тэгээд бага зэрэг тосолбол зүгээр санагдсан шүү.

Монгол сайт бас зөндөө байдаг юм билээ шд. Элдэв хоол хийх аргыг заасан. Хэ хэ. Сая л олж мэдэв гэхгүй юу. Ккк

Гэрийн эзэгтэй уншигчдадаа амжилт хүсье. Хоолоо ч хийгээд, блогоо ч уншаад, бас бичээд гялалзуулаад байгаарай. Бид хүчтэй шүү. Инээмсэглэв.

Ном ном ном

Умшаад л байгаа шүү. Гэм нь тухтай сууж унших зав тэр бүр олдохгүй, өдөрт тэдэн хуудас ч гэдэг юм уу? сүүлдээ бүр долоо хоногт тэдэн хуудас гэх нь холгүй байна.

Дөнгөж саяхан уншиж дууссан ном. 7 сард япон хэлний төвшин тогтоох шалгалт болдог доо. Бас 12 сард.

Би ихээ олон жилийн өмнө өгч байлаа. Сүүлд энэ шалгалтын бүтэц бага зэрэг өөрчлөгдөөд. Гадаад оюутнууд манай ажлаас их ном зээлж авч бэлдэнэ ээ. Тэнцээд тэнцээд л явчихна шүү дээ. Мундаг.

Би орж гарч байгаа номнуудыг харах бүртээ сөхөж харах юм сан гэж боддог ч амждаггүй байлаа. Зориг гаргаад зээлсэн ном энэ.

Ихэнхи нь мэддэг үг байсан ч, жишээ өгүүлбэртэй байсан тул, аан ийм тохиолдолд хэрэглэдэг байх нь гэж бататгав. 

1 дэх төвшний номыг зээлэх гэснээ хэт хүнддээд, дундаас нь залхуу хүрчих юм болов уу? гэж айгаад. Тэгсэн энэ 2 дахь төвшнийг уншиж дуусаад өртөө итгэлтэй 1 дэх төвшнийхийг зээлдэг байж гэж бодов. Хэ хэ.

Хэт хүнд ном барьж аваад, дундаас нь ядраад, халшраад орхичихдог сул талтай тул.

Англи, солонгос хэлээр орчуулга нь байх тул зарим нэг монгол хэлээрээ хэлж мэддэггүй үгээ англиас нь тольдож мэдэж авав. Хойшид энд тэнд таарвал огт хараагүй үг байна гэж хэлэхээргүй л болох шиг.

Гэхдээ гадаад хэл чинь өдөр тутам хэрэглэж, харж, уншиж байж сурдаг эд дээ. Гэж мэдээд байгээ хэрнээ л...

За япон хэл суралцаад дунд шатандаа явж байгаа хүмүүст их дажгүй ном санагдлаа.

Ганц нэг номны ард гарчихаад 1 дэх төвшний ном зээлж харна аа. Өөртөө амжилт. Мөн та бүхэндээ ч амжилт.

Хайр хүргээд байдаг юм шд ингээд

6 сард бага зулзагын цэцэрлэгт эндхийн хөл бөмбөгийн баг тамирчдыг төлөөлсөн хэсэг бүлэг тамирчид ирж, хамтдаа хөл бөмбөг тоглож, дасгал хийсэн гээд л захиа занаагаар мэдэгдээд байсан юм.

Зурагтаар тэдний тэдэн цагаас гарна гэж  зарлаад, бид үзэж амжаагүй юм л даа. Амжаагүй ч гэж дээ уртаашаа өргөөшөө 3-хан сувагтай болохоор үзье гэсэн ч чадахгүй.

Цахим хуудсан дээр нь хэд хоногийн дараа тавигдана гэсэн болов ч их удав аа. Өдөр бүр л орж харна, байхгүй шүү.

Гэнэт л Тэмүжин өвөөгөө саналаа. Монголтой холбоотой бүх л нэвтрүүлгийг двд-нд бичиж, надад өгөхийгөө өгдөгийг нь.

Утсаа шүүрч авав.
-Таныгаа санаад, таныхаа дуу хоолойг сонсмоор болоод.
-Ха ха, хэрэг зоригоо хэл дээ, хонгор минь. Өвөө нь ч бас чамайгаа санасан шүү.

Хэрэг зоригоо хэллээ. Давтан гарах өдөр судар цагийг нь хэлж өглөө.  За гэж байна хөөрхий минь.

Хэд хоногийн дараа утасдаж байна.
-За даалгаврыг чинь биелүүлсэн шүү, дарга аа. Тэгж байгаад аваачиж өгөмз. Немо хүүхэлдэйн киног бас бичсэн байгаа. 30 минутын зай үлдсэн. Монголтой холбоотой нэвтрүүлэг бичээд өгнө өө.
-Баярлалаа, өвөө минь. Тэсэн ядан хүлээж байя.
-Одоо миний хүсэлтийг аан гээд сонсож бай. 7 сарын 30, 31-ний хагас бүтэн сайнд японы соёлын өвийг хадгалах хэлстээс арга хэмжээтэй. Очиж сонирхоорой. Майл явуулсан байгаа шүү.
-За, олон хүнд тараагаад, олуулаа очиж үзэхийг бодно оо.

3 сард бидний хэсэг монголчуудыг дагуулж очиж үзэж байсан юм. Японы эртний хүүхэлдэйн? жүжиг. Хүүхэлдэй гэхээр хүүхдэд зориулсан хүүхэлдэй биш. За энэ талаар дараа тусад нь бичье, амжвал. 

Сэтгэл гаргаад байдагт нь хайр хүрээд явчихдаг юм. Хэ хэ.

Бас нэг хайр хүргэсэн өвөө байна. Ажил дээрээ сууж байсан чинь орж ирснээ
-Үзсэн үү?
гэсээр угаалгасан хэдэн зураг өгөв. Уутнаас нь гаргаад хартал бага зулзагын зураг. Өнөөх хөл бөмбөгийн тамирчидтай дуулж, дасгал хийсэн нэвтрүүлгийг нь үзэж суухдаа зураг дарж л дээ. Тэгээд тэрийгээ угаалгаад надад авчирж өгч байгаа нь тэр.

Сэтгэл хөдлөөд л явчихаж байгаа юм. Би юу ч хэлээгүй, гуйгаагүй шдээ гэж бодохоор л хайр хүрнэ биз дээ, энэ чинь одоо. 

Энэ өвөө минь байсгээд л сонгино гэх мэт ногоо авчирч өгдөг юм.
-Сонгино нь байгаа юу?
-Жаахан байгаа. （нэрэлхэв. ккк）
-Нэрэлхээд л, дуусчихсан биз дээ? Ойрын хугацаанд аваачиж өгнө өө.
-За тэгээрэй, баярлалаа.

Гэснээс бага зулзага өөрийгөө хараад хөөрч байна гэж юүхэв. Двд-гээ үзэхээр бүр л хөөрөх байх даа.

Ийм л сэтгэл гаргадаг өвөө найзуудтай даа би чинь.

Сонгино хурдан өгөөсэй... Хэ хэ.

Хэнтэй гэрлэх үү?

Бага зулзагынхаа паянгаас бичье ээ. Ойрд бичээгүй, нэг мэдсэн сургуульд орох дөхчихсөн байна.

3 настайдаа аавтайгаа гэрлэнэ.
4 настайдаа Коокитой гэрлэнэ.
5 настайдаа Такүматай гэрлэнэ.
6 настайдаа мэдэхгүй. Сургуульд орчихсон байна. Тэгээд л ангийнхаа нэг царайлгаагийн нэрийг хэлэх байх даа. Хэ хэ

За үүнийг анх аавдаа хийж өгнө гээд л бидэн хоёр нетээс харж байгаад л хийв. Зангиатай зүрх. Эрэгтэй хүнд бэлэглэхэд аятайхан эд гэж ихэд олзуурхсан.

Нэг харсан ард нь Такүма күн гээд биччихсэн байвал яах уу?
-Үр минь ээ? Аавдаа өгнө гээгүй билүү?
-Дахиад л хийчихнэ шдээ, чадах юм чинь.

Дахиж хийгээгүй ээ, залхуу нь хүрээд. Ккк

Ойрд ингэж цаасаар бүтээл туурвиад. Манайхаар нэг хөглөрөөд. Хаячихаж болохгүй. Хаячихсан байхыг харвал учиргүй уурлаад, буцаагаад гаргаад ирнэ. Хэ хэ. Тэр ч тэгэх байх даа тэ, хүний бүтээлийг хогийн сав руу хийчихээр ямар олиг байх вэ дэ?

Удахгүй гэрээр хөглөрөөд байгаа бүтээлийнх нь зургийг оруулна аа.

Авралын бүтээгдэхүүн боорцог мину

Яагаад авралын бүтээгдэхүүнээр тодоров оо гэхээр.

6 сард хань ижлийнхээ ажлын газрынхтай аялсан даа.

Тухайн үед нь баярласан талархсанаа илэрхийлэх нь мэдээж зүй ёсны хэрэг.  Нэлээд сүүлд нь, эсвэл дараахнаар нь, эсвэл санамсаргүй, санаатайгаар хэн нэгэнтэй нь таарвал заавал тухайн аялалын тухай дурдаж дахин баярласнаа илэрхийлнэ.

Энэ чинь л өнөө Японы 5S-ийн чинь нэг хэлбэр шүү дээ.

Тэгээд л бид монгол daugnuts буюу боорцогоо хийж дайлахаар болсон юм.

Наадах эсэх нь тодорхой бус байсан тул эртнээс л боорцог хайрах өдрөө товлочихоод, том сав суулга хангалттайгаар нь хорооныхоо гал тогоог зээлж хэрэглэхээр захиалга өгчихсөн байлаа.

Тэгсэн гэнэт наадах минь та минь ээ болоод явчихсан. Хэ хэ.

Хэрхэн наадсанаа бичсэн  тэ. Одоо хэрхэн боорцог хийснээ бичнэ. Ккк

Зарим нэг хүнд сонирхолгүй байж магад өө. Гэхдээ сүүлд би өөрөө уншихад сонирхолтой...

Их л сүр болсон шүү дээ. Байнга хийдэггүй болохоор тэрүүхэндээ л хөөрхөн сүр болоод явчихна.

3 янзын зуурмагаар зуурав. Усаар, сүүгээр, тарагаар.
Нүүр номоор бичлэг яваад байсныг дуурайж тарагаар зуурч үзэв. Зуурахдаа масло, тос зэргийг хийгээгүй болохоор хатуу болсон.  Зулгааж иднэ. Хэ хэ. Хатуу болсныгоо өөрсдөө идсэн. Цайнд хийгээд идэхээр гоё гэж ижий минь хэлсэн.

Багадаа хамаатныдаа очихдоо иддэг байсан боорцогны амт байсан. Хүүхэд насныхаа амттай таараад ганцаараа жаал хөөрөв. Байнга талх иддэг надад гэрийн боорцог гоё байдаг байж билээ.

Усаар, сүүгээр яг ижил хэмжээтэйг зуурч хайрсан. Хань ижил сүүгээр зуурсан нь дажгүй юм байна гээд ажлынх нь газрынханд баярласан шүү, талархсан шүү гээд өгөв. Бүгд л амттайг нь гайхаад байна гэсэн.

Мөн хөрш ганц нэг айлдаа амсуулав. Бага зулзагатай найз нэг эмээ өвөө байна. Ойрхон алга дарам газартай. Түүндээ их л олон юм тарих юм. Бага зулзага улаан лоольд дуртай гээд хэлчихсэн юм уу даа. Болсноос нь гээд л барьж ирээд байгаа. Ганц улаан лооль ч биш том том өргөст хэмх, хаш ногоо, хулуу өгнө.

Хариуд нь баярлалаа гэхээс өөр юмгүй, яах гэсэн юм бэ гэснээ хоёр гараа тосоод авна шүү дээ. Ккк

Тэгээд л ахиухан боорцог хайрч байгаад хэсэг улсуудад өгөх гэж сүр бадруулсан хэрэг.

Том зулзага бас найздаа өгсөн. Яагаав эртээд дадлага хийхэд нь гэрээрээ л очиж орлого оруулсан найзад нь баярлалаа гэж хэлээд өгөв.

Хааяадаа бас ногоо дайгаад байдаг нэг өвөөд өгөв.

Байнга ногоо өгдөг өвөөдөө өгч амжаагүй дуусчихсан. Тэгж байгаад хийж өгнө дөө.

Худалдаанаас ямар нэгэн амттан бариад очвол жаахан сүргүй юу тэ. Тэгж бодоод л боорцог минь намайгаа бодоорой гэж байгаад л хар үүрээр босч гурил зуурч, үдээс өмнө нь хайрч дуусаад, үдээс хойш нь наадсан нь тэр.

Ингэж л би чинь улсынхаа амтыг япон хүмүүст таниулж, аврагдсан юм аа. Хэхэ.

Японыг хотойтол наадав шд

Уншигч олон минь сайхан наадаж байгаа биз дээ. Ид дундаа ороод л явж байгаа биз дээ.

Миний наадам дуусаад ажилдаа. Халуун гэж юүхэв, урсаад л сайхан байна. Урссаныхаа хэрээр гуалиг болохгүй нь жаахан тиймхэн. Хэ хэ.

Амьдардаг хотод минь уртаашаа өргөөшөө 3 гэр бүл байна, монгол. Шинэ гэр бүл нэг нэмэгдсэн л дээ. Одоохондоо хүүхэд шуухадгүй, манай мужид ирээд нэг их удаагүй, ажил ажил, хичээл хичээл гэсэн хоёр байгаа болохоороо ирж амжаагүй. Нөхрийг нь танихгүй л дээ. Танилцаж амжаагүй л явна. Бас ганц бие нэг хүүхэн бий. Ажлаар монгол явчихсан ирж амжаагүй. Нэлээд зайтай нэг газар арлын бэр болчихсон нэг эгч бий. Хэл дуулгаж амжаагүй тул бас л ирж чадаагүй.

Монголчууд л болсон хойно яахав, наадах энэ тэр нь сайн мэдэгдэхгүй, чухам л ажилтайгаа гайхсан улс байснаа гэнэт нөгөөдөр нь наадам гэж байхад л хүүе хаая амьд уу? Наадацгаах уу? болов.

Наадамтайгаа хамгийн ойрхон амралтын өдөр болох 10-нд цуглав. Гэр гэртээ хуушуураа хийж ирцгээв. Нэг айл нь цуйван хийж ирэв.

Үдээс өмнө ганц нэг нь хувь хувьсгалын ажилтай тул үдээс хойш 2-т цуглана гэж яриад, 3-т цуглав. Хэхэ.

Цугласан цэцэрлэгт хүрээлэн маань харин их дажгүй, том, цэлийсэн сайхан зүлэгт талбайтай. Бага зулзага минь айлын бандитай ханатлаа л гүйж тоглов. Усан тоглоомын талбайтай, шалба нороод, нэг харсан нүцгэн шалдан гүйж харагдсан.

Гэм нь яг сайхан нарны илч буураад, аятайхан болж байтал 18 цагаас машины зогсоол нь хаах тул тарцгаагаарай гэдэг ая нь 17:50 гэж эхлээд л хангинаж өгсөн. Тэгээд аргагүйн эрхэнд тарцгаалаа.

Энэ жилийн наадам богинохон боловч чанартай сайхан наадам боллоо. Хэ хэ.

Бүтэн сайнаас хойш хуушуур идээд, одоо хуушуурнаасаа уйдах тийшээ. 11-нд нь илүү гарсан махаараа хуушуур хийж идээд, 12-нд нь өдрийн цайндаа үлдсэн хуушуураа идэх гээд сууж байна. Жин мин бол нэмээд талийж өгсөн байх. Айгаад жингээ үзэхгүй л байна.

Ирэх жилийн наадмаар нар сар гэрэлтсэн хуушуур хийж сурна аа. Нэг айл маань хийж ирсэн. Хааяа хийж идэхэд зүгээр санагдсан.

Өө тийм, тэр өдөр бас хар үүрээр босч боорцогны гурил зуурч, амрааж, боорцог хайрсан. Энэ тухайгаа тусад нь бичнэ ээ.

Маш олон хоногийнхоо амралтаа зөв боловсон, хоггүй сайхан наадаж амраарай. Би та бүхэндээ бяцхан атаархаастай ажилдаа орлоо шүү. Ккк

Түр баяртай.

Тогоо хэмнэцгээе

Би гэртээ хамгийн их тогоо хэмнэдэг нь. Ккк. Угаасаа ээжүүд л ингэж тогоо хэмнэдэг, гэрийнхнийгээ гэрлээ унтраа гэж үглэдэг байх тийм үү?

Бид ч бас багадаа тогоо хэмнэцгээе гэдэг уриатай байлаа. Төсвийнхний цалин хаанаа ч хүрэхгүй үед өөрсдөөсөө шалтгаалах хэмнэлтээ хийдэг байсан нь тэр.

Энэ японд ч айл өрхүүд тогондоо их хайр гамтай ханддаг юм билээ. Яг бидний амьдарч буй мужид айл өрхийн тогны төлбөрийн 2 хувилбар байна. Гэр бүлийн 1, гэр бүлийн 2 гэсэн хувилбартай.

Эхний гэр бүлийн 1 гэсэн хувилбар нь шөнийн 23 цагаас өглөөний 8 хүртэл тэдэн иен. Өглөөнийхөө  8 цагаас үдээс өмнөх 10 цаг хүртэл тэдэн иен. Үдээс өмнөх 10 цагаас үдээс хойш 17 цаг хүртэл тэдэн иен. 17-23 цаг хүртэл тэдэн иен.

Дараагийн гэр бүлийн 2 гэдэг хувилбарт манайх хамрагддаг юм билээ, саяхан олж мэдэв. Хэ хэ. Энэ дээрхээсээ ялгаатай нь 10-17 цаг нь арай жаахан үнэтэй. Учир нь өдөртөө гэрт нь хүн өнждөггүй тохиолдолд ийм байна гэсэн.

Эхний 1 хувилбар нь гэрт нь өдөрт хүн өнждөг тохиолдолд арай бага төлбөртэй. Жишээ нь эмээ өвөө нь, гэрийн эзэгтэй гэртээ байдаг бол. Ийм тохиолдолд өдрийн хоолоо хийх гэх мэтээр тог хэрэглэнэ дээ.

За тэгээд гэрийн эзэгтэй нар 23 цагаас хойш угаалгын машиндаа хувцсаа хийгээд орхичихдог, нэг бол өглөө 8-с өмнө угааж дуусдаг гэнэ. Би ч дуурайж эхэлсэн. Жаахан оройтож мэдээд, оройтож дуурайж байгаа ч.

Маргааш нь авч явах өдрийн хоолныхоо гол гол чанах, шарах зэргийгээ амжуулдаг гэнэ.

Цаг тааруулж орхиод, тогны мөнгө хамгийн бага байдаг шөнийн цагт амжуулдаг гэнэ. 

Гарч орохдоо цахилгаан хэрэгслүүдээ хөргөгчнөөс бусдыг нь арзеткаар нь унтраадаг гэнэ.

00-нх нь өрөө цонхтой бол өдөртөө гэрлээ асаадаггүй гэнэ.

Угаалтууртай, халаалттай суултуурынхаа тагийг хааж байх. Тэгвэл тэр суултууранд хэрэглэдэг тогоо 30 хувь хэмнэх боломжтой. Үүнийг би нэг албан газрын 00-д орохдоо уншиж байсан юм. Тэрнээс хойш бас нэг үглэдэг зүйлтэй болчихсон. Ккк.

За тэгээд япон ээжүүд, эхнэрүүд бас их л үглэдэг юм билээ, энэ тал дээр. Нөхрүүд нь голцуу загнуулж харагддаг юм. Ккк

Манайх бас адил. Охид бол ээжийн үглэхээс айгаад ерөнхийдөө унтраагаад сурчихсан. Мэдээж хааяадаа марталгүй яахав. Хүүхэд л болсон хойно. Харин энэ аав уу.
-Хаа явсан газраа гэрэл цацруулж явдаг буянтай хөөн.
гэж өөрийгөө өмөөрөхийг нь яана. Ккк
-Хүний газар хөлсөө урсгаж олсон мөнгөө дэмий зүйлд үрээд бла бла.
гэж би үглээд л. Хэ хэ.

Аавууд минь, эрчүүд минь тогоо хэмнэж сураарай. Наанаа айл өрхийн санхүүгийн асуудал төдий ч нарийн ярьвал байгаль орчин, цацраг энэ тэр гээд л хурц хурц асуудал дагалддаг юм шүү дээ.

Жич: Цаг хооронд тутмын цахилгааны төлбөрийг оруулсан бол харьцуулаад харахад дөхөм байлаа тэ. Даан ч гар дор мэдээлэл нь байдаггүй ээ. Уучлаарай.