Аялал 3

За хаагуур аялснаа бичих үү?  Осака хотоор. Өдөртөө хариад ирэх аялал тул олон газраар яваагүй. Үндсэндээ төлөөлөл болгоод хоёр л газраар орсон.

Үдээс өмнө, үдээс хойш гэж хуваагаад л. Яг өдөр нь нэг газар буулгасан. Цуглах цагийг нь хэлж өгөөд.

Тэгээд бултаараа тарж гэрээрээ, бүлгээрээ өдрийн хоол идэцгээсэн.

Үдээс өмнө нь Abeno Harukashttp://www.abenoharukas-300.jp/
гэдэг байшин ороод. 300 метрийн өндөртэй. 58, 59, 60 давхрууд нь гадаад дотоодын жуулчдад зориулан ашигладаг.  Өндрөөс Осака хотыг харж баясдаг гэх юм уу даа. Мэдээж төлбөртэй. Бэлэг дурсгалын тасагтай. Дэлгэрэнгүйг цахим хуудаснаас нь уншчихаарай.

За энэ 00 руу гүйгээд л ороход угтах байдал. Өндрөөс айдаг хүмүүст жаахан эвгүй байх. Ганц нэг хүмүүс гадагшаа харж чадахгүй сүр болоод л байсан. Хэ хэ.

Гар угаах угаалтуур. Толинд харсан ч гадаах харагдаад, өндрөөс айдаг хүмүүс гараа хурдхан гэгч нь угаачихаад л гүйгээд гарах жишээтэй.

Өндрөөс айдаг юм байж яах гэж гарч ирсийн гээд хэлээд тавчихмаар. Ккк

Дотор нь орж зургаа авахуулдаг. Наадаг зураг. Япон охидууд үүнд дуртай гэж юүхэв. Бид бас яаж дутахав. Том, бага зулзага тэргүүтэй 4 охин дотор нь шаагилдаж байгаа. Би хүлээх зуураа дарсан зураг. Хэ хэ.

Биднийг буулгаж хаясан гудамж. Осакад ирсэн хүмүүс заавал энэ зургийг дардаг гэхээр нь авсан. Хэдэн жилийн өмнө очихдоо ч дарж л байсан. Энэ удаад блогтоо оруулна гэж бодон бодон дарав.

Өдрийн хоол. Өөр бусад хоол байгаа л  даа. Төлөөлөл болгож дарсан зураг. Окономи яки гэдэг нэртэй. Би дуртай. Нет ахаас хайгаад үзчихээрэй, дэлгэрэнгүй мэдмээр байвал.

Үдээс хойш далайн аквариум орсон. Би хувь, хувьсгалаар хэд хэд орсон байсан болохоор орох газрын санал хүсэлтэнд оруулагүй байсан ч олонхийн саналаар Кайюүканhttp://www.kaiyukan.com/index.html далайн аквариум оров.

Бага зулзагаа даган баясаж, хувийн зурагчны үүргээ сайн биелүүллээ. Хэ хэ.

Жуулчдыг татдаг эндхийн гол баатар. Аварга халим.

Далайн муур? Зарим нэг загасыг нэрийг нь ч сайн мэдэхгүй юм өө.

За нэг иймэрхүү аялаад ирсэн. Хүн ихтэй газар ганц нэг өдөр бол даваад гарчихна. Хань ижил бидэн хоёр байдгийнхаа баруун хаяандаа харьж ирчихээд
-Хөөх ийм л сайхан чимээ аниргүй газар шүү. Монголдоо хариад ирсэн юм шиг л уужраад сайхан боллоо.
гэж ярилцав шд. Хэ хэ.

Ажлын байртай танилцах дадлага

Том зулзага дадлага хийх газрынхаа хүсэлтийг ээжтэйгээ зөвлөж байгаад л бичсэн.
1-хоолны газар, 2-цэцэрлэг, 3-эмнэлэг, 4-үсчин, 5, 6, 7-г санадаггүй ээ.

Тэгсэн аз нь таараад 1 дэх хүсэлт нь биелсэн.
-Азтай байна шүү дээ, миний охин.
-Сонгосон шалтгаан, зорилт энэ тэрээ сайн л бичсэн гэсэн үг.
гэн наддаа томров.

Mos burger гэдэг газар. Бид ч барагтай л ордойггүй газар л даа. Mcdonalds ч бараг орохгүй. Хааяа л авч иддэг юм.

Учир нь би чинь жинтэйгээ байлддаг хүн болохоор тийм таргалуулдаг газар орохгүй шүү дээ. Охидоо ч түргэн хоолны газар орж хэрэггүй гэж захьдаг.

Одоохондоо хэвийн жинтэй байна, эмэгтэй хүн жин нэмэхдээ хурдан, эрүүл саруул бие хаа бла бла гэж үглэнэ.

Тийм болохоор идье гэж нэхэхгүй. Энд тэнд гадуур хоолонд орохдоо хааяа шарсан төмс захиалнаа захиална, яаж зүгээр байхав. Хүүхэд л болсон хойно дуртай гэж.

За энэ оршил ч яахав. Гол сэдэв.

Өглөө 8:50-д бэлэн байх ёстой.  Дүрэмт хувцастайгаа явахгүй. Сургуулийнхаа тамирын богино өмд, подволктой явна. Сургуулийнхаа жижиг цүнхийг барьж явна.

Очоод Mos burger-ийнхээ дүрэмт хувцсыг өмсөнө.

За тэгээд л дадлага эхлэнэ.

Захиалгыг зөөнө. Ингэхдээ инээмсэглэхээ мартахгүй байх. Тавтай сайхан хооллоорой гэж хэлэхээ мартахгүй байх. Аяга таваг зөөнө, угаана гэх мэт. Кассан дээр харин ажиллуулдаггүй юм билээ. Арга ч үгүй биз. Хүүхэд юм чинь мөнгөний асуудалд орчихвол юун дадлага болох байлгүй тэ.

Бас нэг сүрхий санагдсан зүйл гэвэл явцын дунд нь анги даасан багш нь, бас бус багш нь очиж үйлчлүүлсэн гэнэ.

Зургийг нь аваад сургуулийнхаа цахим хуудсанд оруулсан байсан.

Нэг найзынх нь ээж нь эхэлж ганцаараа очсоноо дараа нь дүү нартай нь очсон л гэнэ. Бүр аав нь хүртэл очиж үйлчлүүлсэн юм байх.

Тэгэхээр нь ээж бас зүгээр байсангүй. Сүүлийнх нь өдөр хань ижилтэйгээ цаг болзоод өдрийн хоол идлээ шд.

Том зулзагынхаа буянаар бидэн хоёр нь болзож, хоёулхнаа өдрийн хоол идэв. Том зулзага тэрүүхэндээ жуумалзаад л байсан.

Бидэн хоёрын захиалсан өдрийн хоол. Аав нь том зулзагынх нь гараар зөөгдөж ирсэн гээд тэсгэлгүй нэг хазчихсан байдал. Хэ хэ.

Өө тийм, бас дадлагын сүүлийн өдөр хамтдаа дадлага хийсэн хоёрт өдрийн хоолонд өөрсдөөр нь хийлгэсэн бургер өгсөн гэсэн. Бөөн л баяр байсан. Ккк. Түүнээс өглөө бүр өдрийн хоолоо өөрсдөө авч явдаг юм. Сүүлийн өдөр л хоол хэрэггүй, өгнө гэсэн гээд хоосон явсан юм.

За нэг иймэрхүү. Дараа очиж иднэ шүү ээж ээ л гэсэн? Би ч одоохондоо за гэчихсэн байгаа. Хэзээ явахыг бүү мэд.

Дунд сургуулийн сонингоос

Том зулзага дунд сургуулийн 2-р анги гэдгийг мэдэж байгаа тийм ээ. Монголоор тооцвол долдугаар анги.

Түрүү жилийн нэгэн бичлэгт дунд сургуулийн 2-р ангийхан ажлын байртай танилцах дадлага хийдэг гэж байсан даа.

Тэгсэн энэ удаад том охины ээлж ирэв.  Цаг хугацаа гэж хурдан юм аа.

За тэгээд өнгөрдөг долоо хоногийн ажлын 4 өдөр нь ажлын байртай танилцах дадлага гэж явагдсан.

Бараг 2 сар гарангийн өмнө сурагчдаас хүсэлтийг нь тусгай бэлдсэн хүснэгт бүхий цаасан дээр бөглүүлж, хурааж авна.

1-7 хүртэлх хүсэлтээ жагсааж бичнэ. 1-т сонгож бичсэн ажил мэргэжлийнхээ тухай шалтгаан, зорилт зэргээ өөрийн үгээр тайлбарлаж бичдэг юм билээ. Яагаад энэ мэргэжлийг сонгож очиж дадлага хиймээр байгаагаа.

Гэхдээ тухайн хүүхэд 1-т сонгож бичсэн ажлын байранд очиж дадлага хийнэ гэж байхгүй. Учир нь олох хүүхэд сонгоод тухайн газар нь хүн ихтэй. Ямар нэгэн хүндэтгэх шалтгаанаар энэ удаад сурагчид хүлээн авах боломжгүй гэсэн тохиолдолд 2 дахь, 3 дахь, бүр 7 дахь хүсэлтийнх нь дагуу томилох ч явдал байдаг гэсэн.

Ажил мэргжлийн бас эрэлт, сонирхолтой байдал  зэргээс хамаардаг гэсэн.

Сурагчдын дунд хамгийн эрэлттэй  нь хоолны газрууд. Дараагаар нь цэцэрлэг. Тэгээд хүсний дэлгүүр, үсчин гоо сайхан гэх мэт газрууд ордог гэж сонссон.

Яагаад гэхээр өглөөнөөс орой хүртэл хичээлээр бөмбөгдүүлдэг хүүхдүүд, цөөхөн хоног ч болов багшийн үглээ зэргээс хол, бодож санах зүйлгүй өнгөрөөх сайхан боломж гэсэн.

Жишээ нь хоолны газар нь дадлагын сүүлчийн өдөр өдрийн хоолоор дайлах гэх мэт үйлчилгээ үзүүлдэг болохоор хүүхэд л болсон хойно дуртай байдаг бололтой.

Цэцэрлэг бол ойлгомжтой тийм үү. Хөөрхөн хөөрхөн бяцхан жаалуудтай өдөржингөө л тоглоно. Хэхэ. Буцаад цэцэрэлэгтээ явах юмсан гэдэг гэсэн. Ккк

Би л болсон хойно бас эдний мундагийг гайхаад амжсөөн.

Яасан гэхээр? Дадлагынх нь газар тодорхой болсон тохиолдолд алхаад явчихаж болохоор газар бол сурагчид алхаад л явна.

Гэрээс нь 3 км-с хол зайтай бол нийтийн унаа ашиглаж болдог гэнэ. Энэ нь бүр сургуулиас нь, боловсролын газраас нь шийдээд өгчихсөн байлдаг гэнэ. Нийтийн унааных нь мөнгийг хотын захиргаа нь гаргаж өгдөг гэнэ шүү.

Сүрхий байна уу? Ингэж л цэцэрлэг, сургууль, боловсролын газар, хотын захиргаа нь хоорондоо нягт холбоотой, хамтарч ажилладаг байх нь.

Мөн тухайн сургууль байрлах дүүрэгт үйл ажиллагаа явуулдаг газар сурагчид дадлага хийдэг юм байна. Аж ахуйн нэгжүүд ч идэвхитэй оролцдог юм байна.

Нэг ажигласан зүйл үйлчилгээний байгууллагууд их байсан. Сурагчид үйлчлүүлэгчидтэй харьцана гэсэн үг тийм үү? Энгийн үед өөрөө үйлчлүүлэгч нь байдаг бол энэ дадлагын хугацаанд үйлчлүүлэгчидтэй харьцаж сурна, хэцүүхэн ааштай, соёлгүй  үйлчлүүлэгчтэй харьцах ямар хэцүү байдгийг мэдэж авна, эргээд өөрөө соёлтой үйлчлүүлэгч байхыг эрмэлзэнэ. Гээд л давуу тал ихтэй.

2 зулзагынхаа ачаар их л зүйл мэдэж авах юм бас их л зүйлд суралцах юм даа гэж.

Дараагийн бичлэгт том зулзага хаана дадлага хийсэн тухай бичнээ.

Шагар сонгино

Толь бичгээс хайж хайж энэ үгийг олж авч байсан юм. Хэлбэр нь сармис шиг л дээ.

Үүнийг даршлаад карийтай будаатай голцуу иддэг. Гэхдээ өдөр бүр 5 ширхэгийг идэж байвал цусны эргэлтэд сайн, цус шингэрүүлдэг гэж ярьдаг юм.

Нэлээд олон жилийн өмнө хүнээс үнэгүй аваад хоёр ч жил дарааллан дарж байлаа. Сүүлийн хэдэн жил дараагүй, энэ жилээс даршилахаар шийдээд байгаа нь энэ.

Манай мужийн нэг бренд бүтээгдэхүүн. Хуурай элсэрхэг хөрсөнд тарьдаг. Цэцэг нь нил ягаан өнгөтэй. Тэрийгээ бас аялал жуулчлалын нэг хэлбэр болгоод, хүмүүсийг урин дуудаад байна. Зураг дарахад, нүдээ баясгахад, сэтгэлээ баясгахад ид тохиромжтой цаг улирал нь шүү гээд л мэдээгээр, сонин хэвлэлээр зарлана.

6 сар гарангуут хүнсний бүх дэлгүүрүүдэд худалдаалагдана. Ногоон чавгатай уралдаад л зарагдана шүү дээ.

Айлын гадаа зүгээр л нэг модноос ургачихдаггүй болохоор үнэгүй олдох нь ховор. Хэ хэ. Бас үүнийг тариалдаг танил, найз нөхөд байдаггүй. Яаж тийм найзтай болох вэ? Ккк.

Үнэгүй ногоон чавга шуналтаж дарсан хүн чинь үнэтэй, өөрөө худалдаж авч хийх зүйлдээ жаахан хойрго хандаад, 2 кг-ыг л худалдаж авсан. Ккк. Дарах цуугаа бас өөрсдөө худалдаж авна шүү дээ. Тэгэхээр бас л хөөрхөн мөнгө зарцуулдаг юм. Дээрээс нь саваа бэлдэнэ гээд л.

Чамлахаар чанга атгаад бага гэлтгүй жил бүр дарж байна аа. Эрүүл мэндэд ч сайн... Амттай байх болог гэж өрөөе. Нээрээ 3 долоо хоногоос идэж болно, бараг дөхөж байгаа байх. Намайг бичлэг хийх гэж явсаар байтал.

Ийм ягаан цэцэгтэй. Талбай дүүрэн ургасныг нь харахад бас л нүд баясам юм билээ. Гэхдээ зурагтаар л харж байсан. Ирэх жил очиж цэцгэнд төөрсөн нь гэдэг зураг татуулна аа.

Хурааж авсны дараагаар нэг иймэрхүү. 

Угааж цэвэрлээд даршилсан байдал. Тусгай цуу байдаг юм. Тэгээд ганц нэг чинжүү хийгээд л болно. 3 долоо хоног дарна.

Зургийг нет ахаас татаж орууллаа. Баярлалаа нет минь. Үргэлж мэдээллээр хангаж байдагт талархдаг шүү. Ккк

Гэнэтийн бэлэг 2

Энэ гэнэтийн бэлэг бас л их сайхан. Хүндэлж явдаг найз сэнпай-с ирсэн.

Уг нь насаар үе тэнгийнх л дээ.

Урд нь ажиллаж байсан газарт миний өмнө ажиллаж, улсынхаа нэрийг өндөрт  өргөж явсан ажлын сэнпай.

Нэг ажлыг ээлжлэн хийж явсных бас их яриа сэтгэл нийлнэ.

Бас л сайн охин, сайн найз, сайн хань, сайн ээж, сайннайз сэнпай-даа.

Номонд дуртай болохоор чинь гээд л сэтгэлийнхээ үгийг бичээд илгээсэн найздаа баярлалаа. Аз жаргал хүсье.

Нүүр номоос олж харчихаад, ойрд манай үүгээр хүн ирэхгүй юм байх даа, захиж унших юмсан гэж бодож байсан ном гээч.

Халуун боргол хийж аваад тухлан сууж амтархан уншина аа.

Нээрээ би энэ номыг эх хэлээр нь уншиж байгаагүй шд. Хэлэхэд ч ичмээр. Оюутан байхдаа нэг барьж авч байсан юм. Их л хүнд хэцүү үгтэй санагдаад, надад ахдаад.

Тэгэхэд ангийн маань ганц нэг мундаг охидууд уншаад, дипломын ажлаа болгож бичээд ч байлуу? Мундаг мундаг.

Эхлээд монголоор нь уншчихаад дараа нь л эх хэлээр нь уншихаас. Хэ хэ. Тэгвэл амархан санагдаж магад тэ.

За өөрөө өөртөө амжилт. Та бүхэндээ амжилт...

Гэнэтийн бэлэг

Та нар минь ч бас гэнэтийн бэлэгт дуртай л биз дээ.

Саяхан хоёр ч найзаасаа гэнэтийн бэлэг хүлээж аваад. Нас явж намба суугаад тэр юм уу? Тэднийхээ сэтгэлийн үгтэй сайхан бэлгийг хараад нулимс цийлэгнээд л...

Маш сайхан мэдрэмж.

За энэ Токио хотод суралцаж төгсөөд эх орондоо харих гэж буй найзын минь дүүгээс ирсэн.

Багад нь л гэрээр нь орж гарч байхдаа таардаг, уулздаг байлаа. Удалгүй би ч энд ирээд, уулзалдаагүй олон жил болж байгаа ч сэнпай коохай гэдэг үүднээсээ их сэтгэл нийлдэг юм.

Зөв бодолтой, зөв хүмүүжилтэй сайн охин, сайн дүү, сайн найз, сайн коохай, сайн хань, сайн ээж.

Бидэн хоёр нь уулзалдах гээд чадсангүй. Гэхдээ заавал дахин Японоор ирж, манайхаар айлчлаарай гэж хүсье. 

Бэлгэнд ирсэн наалтаа хаана наах вэ гэж ярилцаад, бага зулзага цэцэрлэгийнхээ харилцах дэвтэрт нэгийг наав.

Би машиныхаа толинд нэгийг наав. Хэ хэ. Байнга харж дурсах гэж тэр. Үлдсэнийг нь тэгж байгаад гоё гоё газар олж наана даа.

За тэр захиа юу? Цэвэрхэн, жижигхэн, нямбай бичигтэй, сэтгэлийн үгтэй захиа. Миний тусалсан гэж юу байхав, харь газар сэтгэл зүрхээрээ хань болж чадсандаа өөрөөрөө хальт бахархав. Хэ хэ.

Хамгийн гол нь коохай маань өөрөө л маш сайн хичээсний үр дүн шүү дээ гэж магтмаар, бахархмаар байна.  Цаашдынх нь ажил үйлсэд өндрөөс өндөр амжилт шүү.

Ижий аав, хамаатан садан, найз нөхдөөсөө хол, тэдэндээ хань, тус дэм болж чаддаггүйдээ сэтгэл гонсойх үе байдаг юм.

Үе үе энэ захиаг гаргаж ирж тайвширлыг олж байхюм шүү. Хэдийгээр эх орон элгэн саднаасаа хол ч, бага ч гэсэн хүмүүст нөлөөлөөд, сэтгэлийн дэм өгөөд явах юм шүү гэж.

За их уянгын халилтай бичлэг хийчих шиг боллоо.

Дараагийн бичлэгт нэгэн найзынхаа сэтгэлийн бэлгийг танилцуулна аа. Түр баяртай.

Жич: Коохай гэдэг нь доод курсийнх гэсэн утгайтай. 

Сонгуулийн эргэн тойронд

Олон юм ярихгүй ээ, бичихгүй ээ.

Хамгийн хөөрхөн нь миний аав.

Яасан гэхээр? Аавтайгаа утсаар ярьж байлаа. Яриа явсаар сонгуулийн тойрог энэ тэр болов. Тэгсэн аав

-Анужингийн уулзалтанд очоод. Охины минь төгссөн  сургуулийг төгссөн. Японд сурч ажиллаж байсан, охинтой минь адилхан харагдаад нулимс унагав. Бас гар барив.

гэнэ ээ. Тойрогт нь Анужин, Жавхлан тэргүүтэй хэсэг хүмүүс хоорондоо өрсөлдөх юм байна.

Муу аав минь царай муутай муу охиныгоо Монголыг шуугиулж буй сайхан бүсгүйтэй адилтгаж хараад элгээ дэвтээж суух.

Гол өөд нэг юм өгсөөд л явчихсан. Утсаар ярьж дууссаныхаа дараа хань ижилдээ ерөөсөө аавдаа очиж үнэрлүүлчихээд ирье гэж тунив. Хань ижил
-Хань нь үнэрлээд өгөх үү?

Манайхан нэгнийгээ жаахан гайгүй явахаар нь л ар өврөөс нь элдвээр хэлээд байх юм тэ. Яахнав дээ, бид чинь цөөхүүлээ шүү дээ.

Би ч өөрөө амсаад гарсан бэрхшээл болохоор элдвээр хэлүүлээд байдаг хүмүүсийг өмөөрөх янзтай байдаг юм. Ялангуяа эмэгтэйчүүдийг.

Хадуурахгүй шүү. Хэ хэ.

Одооноос Анужин сэнпай-нхаа гоо сайхныг зорилгоо болгоод, хүний сайн сайхныг түрүүлж олж хараад, суралцаад, үлгэр жишээ аваад явна аа. Өөртөө амжилт, мөн уншигч та бүхэндээ ч амжилт хүсье.

Сэнпай-дээд курсийн гэсэн утгатай.

Аялал 2

Компанийн аялал бичлэгийн үргэлжлэл.

Уламжлал ёсоороо зохион байгуулалтынх нь тухай бичнэ ээ. 

Өглөө эртлэн босоод нүүр гараа угааж нөгөө хувцсаа өмсцгөөгөөд гарав.

Компани дээр нь цуглаад. Том оврын автобусанд суугаад хөдлөв.

За эндээс эдний олуулаа ямар нэгэн арга хэмжээ зохиогоод сурчихсан нь, дадчихсан нь эхлэнэ.

Ахлаж яваа хэлтсийн дарга бол тэр чигээрээ л бөөн туршлага. Хүмүүсийг хөгжөөх, инээлгэх, яриулах зэргийг чадварлаг хийх юм өө.

Уух зүйл, амттан зэргийг бэлдэж, мөн хөгжөөнт тоглоом бэлдэж. Хамгийн дажгүй санагдсан нь таавар. Очоод үзэх газрынхаа, байгууламжийнхаа тухай таавар бэлдээд ирж.

Би нь яг урд өдөр нь хальт харж байсан тулдаа ганц нэг асуултыг таав.

Ингэж таахдаа буудаж болохоор. Бөөрөнхий дүрс болон Х тэмдэглэлээтэй карт тарааж өгөөд, асуултанд зөв гэж бодсон бол бөөрөнхий, буруу гэж бодсон бол Х-г гаргахад л болно.

Шагнал нь бага насны хүүхдүүдэд амттан, ганц нэг дурсгалын зүйл. Томчуудад 1000 иений худалдаа хийх эрхийн бичиг. Гэр бүлээрээ олуулаа явсан улсууд бол түүж өгөх юм билээ.

Бага зулзага ээжийгээ дагаж хариултаа гаргаад л байснаа нэг асуултанд бүдрээд буруу хэлсэн чинь уурлаад бөөн л юм болов. Ккк

Явцын дунд караокэ зохиов. Яг би дуулах болчихдог юм даа. Намайгаа солгойг мэддэг хань ижил өмнөөс минь дуулж өгөв. Баярласан шүү.

Нээрээ дуулж чаддаггүй хүмүүс иймэрхүү үед л аягүй эвгүй байдалд орох юм аа тэ.

Уг нь солгой хоолой гэж байдаггүй гэсэн шд. Багаас нь эвлэгхэн дуулдаг болгоод өгдөг гэсэн. Энэ японд яг тэгдэг юм билээ.

Цэцэрлэг сургуулийн дууны хичээл ёстой гоё оо. Би явбал дуучих болох байх шүү аягүй бол.

Шагналд амташсан би ч хань ижилдээ "би ирэх хагас сайных нь 2-р хэсгийхэнд нь ороод явчаад ирье" гэж цаашлуулав.

Ирэх жил бас хаа нэгтээ явна гэсэн. Заавал явнааа. Очих газрынхаа тухай судлаад, бүх тааврыг нь зөв таагаад бүх шагналыг нь цуглуулна аа. Хэ хэ.

Бууж суух цаг, цуглах хөдлөх цагаа яг таг баримтлах юм дөө.

Өө тийм. Бас нэг сүрхий санагдсан зүйл нь аялалд оролцсон бүх хүмүүсийг даатгалд хамруулж байж энэ аялалд оролцож байгаа тухай ахлаж буй хэлтсийн дарга автобус хөдлөхөөс өмнө  танилцуулсан.

Дараагийн бичлэгт яг зург хөрөгтэй бичлэг оруулна аа. Түр баяртай.

Аавынхаа өдрөөр

Гэрийн гурван бүсгүй нь аавынхаа өдрөөр яах уу? ийх үү? гэж ярилцаж байгаад л сайхан хоол хийгээд, сайхан шар айраг задлаад, сайхан үнсээд, баярлуулахаар тохиролцов.

Том зулзага дугуйландаа явав. Ээж хоолоо бэлдэв. Бага зулзага өнгийн цаасаар элдэв зүйлс хийв. Аав ойрхон дэлгүүр гарахаар явав.

Сайхан хоолондоо төмсний хучмал хийв. Том зулзага дуртай юм л даа. Хэ хэ. Далимдуулаад өөрийнхөө дуртай хоолоо идэх гэсэн зулзагын санаа хөөрхөн.

Угтаа бол аав нь цуйванд дуртай л даа. Ажиглаад байх нь ээ энэ эрчүүд ер нь цуйванд дуртай байх шүү тэ.

Төмсөө арилгаад сууж байхдаа хайртай аавдаа очиж хоолыг нь хийж өгөх юмсан даа гэж бодогдсоноо нуух юун. Их л залуугаараа наашаа зүглээд, одоо хэр нь хариагүй л яваа муу охиндоо би ч.

Хааяадаа
-Охиныгоо харьтал биеэ сайн бодоод урт удаан наслаад байж байдаг юм шүү гэж захьдаг юм.
-Тэгнэ ээ, охин үр минь.

Нулимс цийлэгнээд ирлээ. Яах уу? Би чинь аав амьтай аавын охин шүү дээ. Хааяадаа хань ижилдээ тунихаараа аавыгаа саначихлаа, үнсүүлчихээд ирье гээд л хошуугаа цорвойлгоно гэж байгаа.

Ганцаараа байхдаа энэ дууг сонсож нулимсаа цийлэгнүүлнэ гэж байгаа.
https://youtu.be/zOuDd7MX5OE

Хорвоогийн бүх аавуудад баярын мэнд хүргэе.

Болоогүй ээ, энэ өдрийн паян.

Өдөр нь таньдаг өвөө утасдаад танай мужид явж байна аа. Уулзах уу? учрах уу? Би ч уулзаж учрах дуртай юм болохоороо үгүй гэж хэлж чадсангүй. Худлаа наанаа л юун цагаа олж ирдэг юм гэж хань ижилдээ үглээстэй. Хэ хэ.

-Би уучихсан чинь машин барьж болохгүй, ирээд аваадхаач?
-За.
гээд л хань ижил бид хоёр гарлаа. Тэгсэн эндхийн бас нэг таньдаг өвөөтэй хамт явж байдаг юм даа.

-Юу вэ? Хорвоо ертөнц чинь ямар жижигхээн болчихоо вэ? Яаж таньдаг юм бэ та хоёр биенийгээ?
-Их сургуулийн дээд доод курсынх байсан юм аа. Өнөөдөр ажил явдалд оролцоод. Тэгээд монгол хүнтэй уулзана гэсэн чинь таньдаг болцгоогоод. Нэг л үг хэлэхэд л та хоёрыг таниад явчих юм аа.

Гэж өнөөх холоос ирсэн өвөө инээсэн. За тэгээд гэртээ авчраад төмсний хучмалаараа дайлаад, шар айргаа ууцгаалаа.

Энэ япон хүмүүс ер нь айлд хоосон ирэхгүй шүү.
-Уучлаарай, би нутгаасаа бэлэг авч ирж чадаагүй, дэлгүүр ормоор байна гэсээр байгаад, хоёр зулзагат минь зайрмаг, өөрөө ууна гээд шар айраг авсан. Хэ хэ. Үгүй ээ манайд байгаа гэж хэлээд дийлээгүй. Зөрүүд өвөө шүү. Хэ хэ.

Ингээд аавынхаа өдрийг 2 эр хүнтэй ууж идэж тэмдэглэлээ.

Тэгсэн япон хүмүүс эртэч юм болохоороо эртээ гэгч нь босоод манай гадаах цэцэг энэ тэрийг янзалж бариад тавьчихсан байх юм. Хэ хэ.

Гэснээс энэ аавуудын өдөр нь Америк орноос гаралтай гэнэ. Сарнай цэцэг өгдөг гэж уншсан. Гэхдээ зарим нэг орон өөрсдийн гэсэн аавуудын өдөртэй юм байна.

Манайд цэргийн баяраар л аавыгаа баярлуулдаг тэ. Цэрэгт яваагүй аав байвал яах уу? Хэ хэ. Хөөрхий муу аав нарт нэг өдөр гаргаад баярлуулдаг болбол тэ. Даанч далимдуулаад архидалт нь улам ихсэх юм болов уу? Яршиг яршиг гэж бодлоо.

Элдэв баярыг энэ япончууд шиг архигүй тэмдэглэдээд сурчихвал алсдаа бидэнд өөрсдөд минь л хэрэгтэй юм байгаам.

За үглэхээсээ өмнө дуусгая. Түр баяртай.

Компанийн аялал

Хань ижлийн ажлын газрынхан хоёр хуваагдаж аялаад.

Ингэхдээ гэр бүлийнхэн нь явах уу? гэж санал асуулга явуулаад. Бид яах уу гэж гэж явахаар болов.

Тэгсэн гэр бүлээ дагуулаад явж байгаа хүн цөөхөн л байна лээ. Одоо яая гэхэв.

Эхний ээлжинд хувиарлагдсан байв. Олон хүн явах тул том оврын автобус хөлөглөөд л явав.

Охидтой минь үеийн охидууд ганц нэг байсан. Гэхдээ л анхнаасаа танил биш болохоор нэг их сүртэй найзалж энэ тэр болсонгүй.

Бүгд л нэг тийм төвийг сахьсан. Хэ хэ.

Нэлээд дээхэн бол ингэж ажлаараа аялалд явахад их л дуртай, тэсэн ядан хүлээдэг байсан гэнэ. Ихэнх албан газрынхан.

Тэгсэн яасан, өнөө үед цаг үе өөрчлөгдөөд. Өдөр бүр хардаг царайнуудтайгаа хагас бүтэн сайнд ч уулзалдах хэрэг үү? Ядаргаа ядаргаа гэдэг болсон гэнэ шүү.

Гэхдээ бүх газрууд тийм биш байх л даа.

Цуг ажиллагсдын дунд фракц энэ тэр гэж байна даа, тэгээд бодохнээ нээрээ л жаахан дургүй улсуудынхаа царайг өөрийн гэсэн цаг болох амралтынхаа өдрөөр харна гэдэг бас л хэцүү байх тиймээ. Хэ хэ.

Өдөр бүр ажил ажил гэж яваад, гэр бүлдээ гаргах цаг их бага байдаг япончууд хагас бүтэн сайныг гэртээ, үр хүүхэддээ зориулна гэдэг юм билээ. 

Мөн баяр ёслолоор манайхан шиг шоудахгүй ээ. Тэрүүхэндээ гэр бүлээрээ тэмдэглэнэ. Мэдээж дунд нь ганц нэг шоунд дуртай хүмүүс байна аа байна.

За тэгээд төв газрынхныг сайн мэдэхгүй, бодвол арай өөр байдаг байж магад. Би чинь хөдөөний хөөн гэж.

Ер нь ажиглаад байхнээ энэ япончууд чинь наанаа нэг л их сайхан инээсэн, мэхийсэн, Дүүриймаадсан улс шүү дээ. Яг дунд нь ороод ажиллаад ирэхээр бас жаахан цэвдэг тал даа.

За за оршил их урт боллоо. Дараагийн бичлэгт яг хаагуур аялснаа зураг хөрөгтэй орууламз. Түр баяртай.

Гоё дуу 2

Үргэлжлэл шүү.

https://youtu.be/0OtzAVkGZAw

Эндхийн Араши гэдэг хамтлаг дуулсан юм байна. 5 залуу байдаг юм. Охидууд үхдэг гэсэн. Хэхэ. Эгч бас ганц нэгийг нь таалчихна аа, болоогүй. Ккк

За тэгээд энэ дуунуудын аяыг үлээвэр найралынхан чинь маш чадварлаг хөгжимдөхөөр үзэж буй би хүртэл маш чадварлаг хүлээж авдаг юм билээ.

Дараа санан санан бусад дуунаас нь оруулна аа.

8 сард нэг тэмцээнтэй, хагас бүтэн сайнгүй л дугуйландаа явж, ядарсан хүн байна. Ээж нь худлаа л наанаа миний зулзага ядрав уу? гэчихээд, дотроо бол өмхийрч ногооролгүй ингээд гарч ороод явж байвал аштайв дээ гэж бодоостой. Хэхэ.

Гэртээ өнжихөөрөө бид чинь болж л өгвөл өмхийрч ногоорчих гээд байх юм. Ядаж байхад борооны улирал эхэлчихсэн, бороо л ороод байна. Өмхийрч ногоорохгүй гээд л аль болох л орж гарах ажид төлөвлөнө шүү дээ...

90-хэн минутанд сурлагаа сайжруулах 2

Яахав хэд хэдэн аргыг тайлбарлаад бичсэн байна л даа. Зарим нэгээс нь сонирхуулахад ийм байна.

• Хамгийн шалгарсан, шилдэг арга нь бараг бүх хичээлээ чанга дуугаар унших. Жишээ нь түүхийн хичээл, англи хэлнийхээ хичээл. Бүр цаашлаад тооныхоо хичээлийг хүртэл. Ингэж чанга дуугаар унших нь тархины тогтоох үйл явцыг 20-30 хувь нэмэгдүүлдэг. Нэг цаг хичээл хийхээр суувал эхний 5 минугыг чанга дуугаар унших уншлагын цаг болгон хэвшүүлэх.  

• Хичээл хийх аргачлалаа нэг бүрчлэн төлөвлөх. Англи хичээлийг тэдэн цаг, нийгмийн хичээлийг тэдэн цаг гэх мэт. Өнөөдөр энэ номыг тэдэн хуудас уншина ч гэдэг юм уу? Ямартай ч их л нарийн цаг нартай төлөвлөгөө гарган, түүнийхээ дагуу хичээлээ хийх.

• Нэг номыг барьж аван хичээл хийх гэж байгаа бол түүнийгээ гурван удаа давтан хийх. Мэдээж ингэх явцдаа тест авах гэх мэтээр өөрийгөө шалгаад явах.

Хүн гээч амьтан чинь мартахын одонд төрсөн байдаг гэнэ. Цээжилчихлээ гэж үзээд 20 минутын дараа гэхэд 42 хувийг нь, 1 цагийн дараа 56 хувийг нь, 1 өдрийн дараагаар 74 хувийг нь, 1 долоо хоногийн дараагаар 77 хувийг нь, 1 сарын дараагаар 79 хувийг нь мартдаг гэнэ дээ.

Гэхдээ тэртэй мартчих юм чинь цээжилж яадаг юм гэж бодолгүй өдөр бүр л цээжилж, давтаж байх нь зөв байх. Энэ бол миний үг шүү. Хэ хэ.

За тэгээд энэ номд нэг англи үгийг цээжлэхэд тэдэн минут зарна, долоо хоногт үржүүлэхээр тэдэн цаг болно гээд их л дэлгэрэнгүй тайлбарлаж бичсэн байсан.

• Хичээлдээ сайжрахын тулд эхлээд хэцүү, өөрийн дургүй хичээлээсээ барьж авах биш, аль болох дуртай хичээлээсээ эхлэх.

• Нийгэм, хими физикийн хичээл нь дүнгээ ахиулахад дөхөм хичээлүүд байдаг.

• Англи хэлэндээ сайн байхын тулд эх хэлэндээ сайн байх. Эх хэлэндээ сайн байх нь тооны хичээлд ч хэрэгтэй. Жишээ нь өгүүлбэртэй бодлогынхоо өгүүлбэрийг сайн ойлгохгүй бол томъёогоо гаргахад хэцүү болоод л явчихна.

• Төсөөлж ургуулан бодох нь тогтоох чадварыг нэмэгдүүлнэ. Цээжлэх гэж байгаа үгнүүдээ хооронд нь хамаатуулж цээжлэх.

• Өглөөд бага зэрэг эрт босох. Маргаашийнхаа бэлтгэлийг бэлдчихээд унтах. Өмсөх хувцсаа хүртэл бэлдэж тавих. Тэгээд өглөөд 5 минут хичээл хийх? давтах цаг гаргах. Өглөөд 5-хан минут хичээл хийхийн ашиг гэж байна уу? гэж эргэлзэж магад. 5 минутанд 5 үг цээжлэнэ гэж боддоо. Ажлын 5 өдөр гэж үзэхээр долоо хоногт 25 үг. Жилд 52 долоо хоног гэж тооцохоор жилдээ 1300 үг цээжлэнэ. Дунд сургуулийн 1дүгээр анги манайхаар 7 дугаар ангид цээжлэх ёстой 1200 үгнээс даруй 100-р илүү үг цээжилсэн байгаа биз? Гэж бодохоор өглөөний 5 минут бол богино хугацаа биш байгаа биз? 2-хон минут ч байсан болно.

Гээд л зөндөө зүйл бичээстэй байсан. Толгойд үлдсэнээ бичлээ шүү. Хэ хэ. Одоо үед  ч иймэрхүү зөвлөгөө их байдаг болжээ. Намайг сурагч байхад ээж минь өглөөд эрт босч байгалийн нарны гэрэлд хичээлээ давт гэж үглэдэг байсан нь л шилдэг арга юм байна дөө гэж.

Гоё дуу

Том зулзагынхаа ачаар гоё гоё дуу, ая олж сонслоо. Их л олон дунд, ахлах сургуулийн тоглосон аянуудыг дараа нь завтай өдрөө багаар багаар ютүб-с олж сонсож байгаа. Гадны ч ая байна, япон хүний ч ая байна.
https://youtu.be/i-Ic9DgWBRA

Энэ хаяг руу ороод сонсоорой, хүмүүсээ. Урдных шиг оруулж болохгүй юм, нэг бол би чадахгүй байна уу? Бүү мэд.

Хажуугаар нь монгол дуугаа бас сонсдог шүү. Таг япон болж байна аа гэж хааяа хэлүүлэх тохиолдол байдаг л юм. Хэ хэ.

Хань ижил бол байнга л монгол дуу сонсоно. Ер нь энэ эрчүүд эх оронтойгоо элэг зүрхнээсээ л уяатай байдаг юм билээ. Ккк.

Гоё хайрцаг ба яс зууна аа

Чихэр хайрцганд хийж өгөөд байдаг бандийн ээж эртээд бас ийм хайрцаг хийж өгсөн. Мэдээж хоосонгүй. 2 ширхэг чихэртэй.

Мөн ийм 4 ширхэг сарнайтай хайрцаг өгсөн. Маш хөөрхөн санагдав. Том цаасаар хийж болдог гэсэн. Дараа заалгая гэж бодоод байгаа. Цаасаа бэлдэж очоод.

Манайхаар л нэг цаасан урлалууд. Хаяж чадахгүй. Хайран санагдаад. Хөөрхөн санагдаад. Хийж сурмаар санагдаад. Чадахгүй болохоороо дэмий л баахан харж гөлрөөд.

Номын сангаас хэдэн ном зээлж ирсэн чинь сайн ойлгож өгөхгүй, чадахгүй болохоороо бага зулзагатайгаа шаал өөр зүйл хийчихдэг гэж байгаа. Хэ хэ.

За энэ сарнайг савнаас нь гаргасан байдал. Эргүүлж тойруулаад хараад байх нь ээ, бас л их хөдөлмөр шаардах эд шиг байна лээ. Урдны бичлэгийн ажисай цэцгээс ч хэцүү, бүр маш их хэцүү санагдав. Нартай сайхан өдөр хадаг барьж очоод заалгана гэж хатуу шийдсэн. Хэ хэ.

Яагаад заалгана гэж хатуу шийдсэн гэхээр? Бэлгэний боолтон дээр нэг иймэрхүү цэцгийг худалдаж аваад л наадаг даа. Харин үүнийг хийгээд сурчихвал заавал тэр цэцгийг худалдаж авах шаардлагагүй болно гэсэн үг.

Өөрөө нугалж хийгээд, наагаад л хавааск. Бас нэгэн хэмнэлт. Явсан нохой яс зууна гэдэг шиг зулзагаа тосож авахдаа хүртэл яс зуучих гээд айлын хүүхэд ийм айхтар байна уу? Ккккккк

Та нарт зааж өгөх үү? Яах уу?. Хадаг яндар барьж ирвэл зааж өгч магад л юм. Хэ хэ.

6 сарын цэцэг

Урдны жилүүдэд ажисай ба Hydrangea macrophylla цэцгийн зургийг оруулж байж. Энэ жил ч бас орууллаа.

Энэ цэцгийг харж баясмаар байвал энэ л ажисай гэдэг нэртэй цэцэрлэгт ирдэг юм. Цэцгийнхээ нэрээр нэрлэсэн бяцхаан цэцэгт хүрээлэн. Өөр цэцэг ч тариастай байна. Жил ирэх тусам мэддэг хүмүүсийн тоо нэмэгдээд, хүн олшроод байгаа. Урд том зулзага төгөлдөр хуурт явдаг байхад ээж дүү хоёр хүлээнгээ тоглодог байсан юм.

Ойроос харахад дэлбээ нь ийм.

Энэ цэцэг хөрсөн дэх ус төрөгчийн хэмжээнээс шалтгаалаад өнгө нь өөрчлөгддөг гэсэн. Цайвар ягаан, нил яагаан, ийм бүдэг ягаан, усан цэнхэр гээд л өнгө нь их гоё.

Дуурайгаад цаасаар нугалж хийгээд байна. Эд чинь айхтар улс. Хэ хэ. Тэгээд хийх аргачлалыг нь орууллаа шүү.

Манайхаар дүүрэн л энэ цэцгийг хийсэн улс. Хажуугаар нь бас бус бүтээл туурвиад л.

Одоогоор 3 ширхэг ийм цэцгийн хажуугаар энэ зураг дээрх зүйлүүдийг хийсэн байна даа. Орой нь аниа нь тарж ирээд тогоруу, нэг хайрцаг нэмж хийгээд байсан. Хаяж болохгүй нэг хэсэгтээ хөглөрөнө дөө гэж. Гялгар уутанд хийчихээд барьж гүйгээд их л нандигнаад байна лээ, бага зулзага.

Хийх арга нь ойлгомжгүй байвал хэлээрэй. Хэхэ. Арай өөр дэлгэрэнгүй арга хайж өгнө өө. За амжилт хүсье бүгдэд нь.

Шүдний үзлэг

Бага зулзагын цэцэрлэгт шүдний үзлэг болсон. Өглөө нь цайгаа уучихаад гарахдаа шүдээ угааж угааж явсан. Хэ хэ.

Эмч үзээд
-Сайн байна, хорхойтой шүд алга.
гэж магтсан гэсээр орой ээжийгээ харангуут л холоос орилсон.
-Тийм үү? Мундаг шдээ, зулзага чинь.

Хэдэн өдрийн дараагаар албан ёсоор бичиг ирнэ, цэцэрлэгээс нь. Хорхойтой шүд алга байна. Хойшид ч энэ эрчээрээ шүдийг нь сайн угаалгаж байгаарай гэсэн бичиг.

Энэ хуудасны дээд хэсэгт шүд нь эрүүл байвал бөглөх жижигхээн зайтай. Ихэнхи хэсгийг нь хорхойтой шүдний тухай заавар зөвлөгөө эзлэнэ. Тийм тийм шүд тэгж тэгж хорхойтсон байна. Зав зайгаараа шүдний эмнэлэгт хандаж эмчлүүлээрэй, үзлэг хийсэн тэр эмч, гээд гар хөлийн үсэг нь он сар өдөртөйгөө бичээстэй байна. Мөн энэ хуудсыг авч очоорой гэсэн байдаг юм билээ.

Азаар хоёр зулзага минь энэ бичгийг барин шүдний эмнэлэг орж байгаагүй.

Наана нь аав гэж шүдний эмчээс илүүтэйгээр үзээд хараад, зулзагуудыг минь дагуулаад яваадхаачээ, гуйж байна гэж үглэдэг нь. Хэ хэ

Та нар минь ч гэсэн бүр багаас нь шүдээ угаахад нь туслаад, хэвшүүлээрэй. Тэгвэл ямартай ч уйлж унжаад, цааргалаад байдаггүй юм билээ.

Энд бүр тэдэн сартайгаас нь аманд нь зуулгаж хэвшил болгодог сойз? зардаг юм билээ. 3 хос. Нэг нь яг сойз биш. хуванцар, сойзны хэлбэртэй. Түүгээр аманд зуулгаж, хааяадаа шүдийг нь үрж шүд угааж буй мэт үйлдэлд дасгана. Хоёр дахь нь бага зэрэг үстэй, сойз руу дөхөж очно. Гурав дахь нь зөөлөн сойз.

Бид анх үүнийг бага зулзагатаа авч өгөөд, их үр дүнтэй юм шиг санагдсан тул хааяа монгол дахь найз нөхөд, хамаатан садан төрөхөд нь бэлэглэдэг юм.

Сойзны тухай гэнэт саналаа. Монголд зарагдаж буй сойз аймаар урт? том тэ. Том зулзага хараад гайхаад л байсан. Хэ хэ. Энд жижиг сойз их зарагдана. Ийм жижиг нь сайн байдаг гэж сонсож байсан.  Шүдээ нэг бүрчлэн угаахад хамгийн тохирмжтой гэж.

Гэхдээ хааяадаа том зулзага залхуураад угаахгүй унтаж загнуулдаг болохоос.

Бүгдэд нь амжилт.

Шунал ба том ногоон чавга

Хүний шунал аа гэж. Жижиг ногоон чавгаараа жимсний дарс хийсэн дээ. Одоо томоор нь хийх гэж байна. Том нь иймэрхүү. За энэ томыг нь хань ижил түүж ирсэн. Дунд зэрэг юм байна, дэлгүүрт үүнээс том харагдана лээ. Хамгийн томоор нь бас хийнэ гэж дайрах вий дээ. Хэ хэ.

3 шилийг дарах гээд л сууж байна даа. Ийм л шуналтай хүн дээ би. Гол нь өөрөө бүгдийг нь уухгүй л дээ. Хүн дайлаад л дуусна шүү дээ.

Нэг шилэнд нь охиддоо жүүс хийхээр болов. Улаан дарсчин ээж аавтай яана даа? Охид минь. Ккк.

Хийх аргачлал нь жижиг жимсээр хийхтэй яг адил. Том болохоор сав ч дорхноо дүүрээд, хийхэд урамтай.

Нэг нээлт хийсэн шд би чинь. Монголоос ирсэн цагаан архинд дарах ёстой салахын аргагүй сайхан амттай болдог юм билээ. Зарим нэг япон хүмүүс дуурайж хийгээд, эргээд надаасаа цагаан архи нэхээд байна. Ккк.

3 жилийн өмнөөс ингэж цагаан архиар хийгээд, найзуудыгаа дайлаад, маш өндөр үнэлгээ аваад байгаа.

Тусгай лекорных нь оронд цагаан архи хийнэ гэсэн үг. Зарим нэг япон хүмүүс хямд вискигээр хийдэг гэсэн. Хийж үзээгүй л байна. Дараа хийж үзнэ гэж бодоод л байгаа. 

Монголоос архи бэлгэнд ирэхэд хэрэггүй дээ гэдэг байсан бол одоо ч ахиухан ахиухан гэх нь л холгүй болов. Хэ хэ.

Гэхдээ цагаан архиа хань ижил захиж байна, би номоо захина гэчихнэ ээ болоогүй. Зальтай байна уу? 

Энэ жил олооон жил хадгалсан 2 ширхэг цагаан архиараа хийлээ.

Гэснээс энд ирээд удсан болоод ч тэр үү цагаан архийг ууж чадахаа байсан байна лээ. Урд нь нэг их уудаг байсан хүн шиг. Хоолойгоор давдаг байсан чинь давахаа байсан гэх үү?

Харин зөөлөн чанарын дарс, виног хааяадаа нэг уух ч сайхан шүү тийм ээ.

Эх үрсийн баярын мэндээ.

Хэ хэ. Их л орой хүргэлээ, уучлаарай. Ногоон чавгатайгаа ноцолдож байгаад мартсан байна шд.

Нүүр номдоо хоггүй баярлаарай гэж дээр үеийн нэгэн мэдээг оруулсан юм байна. Монголд сайн дурын япончуудыг хог түүж буй тухай.

Хогтойгоо л баярласан гэсэн тэ? Юу ч гэмээр юм бэ дээ, хэзээ соёлжих вэ?

Энд хааяа Хятадын тухай гардаг юм. Нус цэр, шүлсээ гудамжинд хаяж байгаа тухай, автобусанд чихэлдэж ордог тухай, хогоо энд тэнд хаядаг тухай.

Соёлгүйг нь л гайхаад сүр болно шүү дээ. Би ч дуугай л байдаг даа.

Харин машингүй өдөр гээд хүүхдүүд шавиагаа ханатал дугуйгаа унах нь унаад, алхах нь алхсан гэсэн тэ.

Бид яаж тэмдэглэсэн бэ гэрээ, цуйван хийж идсэн. Зайрмаг идсэн охид. Чавганыхаа дарснаас нэг нэг хундагыг уусан, хань ижил бидэн хоёр.

Эндээс төв рүү явсан сүмо залууд цуйван хийж идээд гэсэн чинь
-Яасан гоёын? Эгчийн цуйванг идмээр л байна шүү гэсэн. Хэ хэ. Бид ингэж тэмдэглэлт өдрөөр монгол хоолоо хийж иддэг юм шд. Ккк

Бас саяхан УБ хотод минь марафон гүйлтийн тэмцээн болоод найз нөхөд минь оролцоод, түрүүлж бариад, баяраа хуваалцсан байсан.

Гудамжин дахь хогны тухайд бидний сэтгэлээс л шалтгаалах. Гол нь биднээс сэтгэл үнэртэхгүй байна л даа, тийм үү?

Зуны концерт

Дунд сургуулийнхан ойрд түмэн завгүй байгаа. Мужийн бүх дунд сургуулиудын хоорондын тэмцээн уралдаан эхэлчисэн.
Бүх л дугуйлан секцийнхэн хоорондоо өрсөлдөнө гэсэн үг. Тэгээд муждаа шалгархаараа бүсийн нэрэмжит, бүсээсээ шалгархаараа улсынх гээд л явж өгдөг гэсэн.

Том зулзагын сургуулийн хариуцсан ажилтан нь цаг тухай бүрд нь нийтлээд, мэдээллээд явдаг юм билээ. Их амар санагдсан.

Том зулзага тамирын дугуйлан биш ч бас л завгүй. 6 сарын 5-ны бүтэн сайнд бүх дунд ахлах сургуулийнхан оролцсон үлээвэр найрал хөгжмийнхний концерттой. Өнгөрдөг жил бас болсон. Үзсэн, таалагдсан, гайхсан, биширсэн, бахархсан.

Япончуудын энэ уйгагүй зан л улс эх орныг нь өдийн зэрэгтэй байлгадаг байх гэж бодов. Ахлах ангийнхан бол мэргэжлийнх гэмээр тоглодог юм билээ. Дунд сургуулийнхан ч наддаа бол мэргэжлийнх байсан. Хань ижил л жаахан алдчихлаа энэ тэр гээд л байсан. Би ямар олж сонсох биш. Хэ хэ

Энэ жил ганцаараа үзнэ. Тасалбар нь 500 иен. Их боломжийн. Түүнээс энд сонгодог энэ тэрийн тасалбар бас л үнэтэй шүү дээ.

Хань ижил бага зулзага хоёр хөдөө явсан. Агаарт сайхан байна, бага зулзага аавыгаа тоох ч үгүй тоглоод гүйгээд байна гэсэн.

Том зулзага ээж хоёр өдөр хоолонд орж булагнах гээд л байж байна. Ээж нь зулзагыгаа дугуйлангаасаа тарж ирэхийг нь хүлээнгээ энэ бичлэгээ бичиж сууна. Ккк.

Энэ концертны үеэр зураг дарж болохгүй, чанга чанга ярьж болохгүй. Том зулзага бүр дахин дахин хэлээд сануулаад байсан, түрүү жил. Бид ч айгаад нэг ч зураг дараагүй. Хэ хэ.

Гэм нь өдөр бүр сургууль руугаа явах нь ядаргаатай байх шиг байна.
-Яагаад өдөр бүр сургууль явдаг байна аа? Ядаргаатай юм.
гэж үглэсэн л хүн байгаа. Гэхдээ тэгээд явахаас өөр аргагүй л болох юм даа.

Японд хүүхдүүдийг хэт ядраагаад байх шиг байдаг юм. Өглөөнөөс орой болтол сургууль дээрээ. Тэгээд л ижимэ гээч бие биенийгээ дээрэлхэх үзэгдэл хурцтай явагдаад байдаг гэж хувьдаа боддог. Тэгээд энэ тухайгаа хамаагүй энд тэнд яриа хийхдээ хэлээд л явчихдаг юм. Хэ хэ.

Хадуурахаасаа өмнө өндөрлье дөө.

Жимс 3

Гэнэт гарчигаа хараад сонин санагдав. Яагаад байгалийн  жимс гээд нэрлэчихсэн юм бол? Таримал жимс гэдгийн эсрэг утгаар хэрэглэх гэсэн санаа юм болов уу?  Жимс гэдэг гарчиг өглөө тэгээд. Хэхэ

За яахав та нар минь ч өөрсдийнхөө ойлгосноор ойлгоод явчихаарай.

Гол сэдэв. Энэ ногоон чавга? гээч жимсийг түүх гэж яваад л дунд нь өөр жимс түүгээд байсан юм. Модных нь зургийг дараагүй байна аа. Цаг бага байсан тул зураг дарах сөхөөгүй байсан байх. Учир нь бага зулзагаа цагт нь амжиж авахгүй бол гэдэг зүйл толгойд хадгалаастай.

Өвөөгийн гэр манайхаас нэлээд зайтай. Машинаар 40 минут орчим явна.

Урд нь дандаа хань ижил машин бариад очдог байсан болохоор замаа огт тогтоогоогүй би эртхэн гараад очив оо. Тэгсэн эмгэн өвгөн хоёр эзгүй байна. Утасдаад, би түүж байх уу? гээд нэг их мэддэг хүн болоод гэрээс нь жаахан зайтай байдаг нэг модон доор очоод л түүж гарав.

Нэлээд дээхэн очиж түүж байхад тийм л дүр зураг байсан шиг санагдаад, тоосон ч шинжгүй түүж байсан чинь өнөө хоёр чинь ирчихсэн орилж байна аа.

-Хүүе, наад мод чинь биш ээ. Нааш ир ээ.
-Өө, биш билүү? Одоо яана аа?
-За яахав, модных нь эзнийг танина, үнэн учраа хэлээд аваачаад өгчихье.
-Тэгье тэгье.

Өвөө надаараа тоглоод
-Чавганы хулгайч болохоо шахлаа даа чи минь. Ха ха.
-Тэглээ шд, балай юм.

За тэгээд энэ жимс нь том жижиг хоёр янз байна. Өвөөгийн мод жижиг жимстэй нь. Бид анх энэ жимсээр дарс хийж байлаа. Том жимсээ бодвол дарсаа уусныхаа дараа жимсийг нь идхэд гоё амттай байдаг юм. Том нь жаахан гашуундуу амттай болчихоод байдаг.

Бас болоогүй ээ, Тэмүжин өвөө зэрэг өвөө нартаа эрхлээд том жимснээс нь олоод авчихдаг гэж байгаа. Үүнийг чинь дэлгүүрээс авбал бас л хөөрхөн үнэтэй шүү дээ. 1 кг-р хийх биш, нэлээд хэдэн кг-р хийдэг болохоор.

Мөсөн чихэр, дарах ликороо харин худалдаж авна. Сүүлийн хоёр жил бэлгэнд авсан цагаан архиараа хийдэг болсон. Илүү амттай болоод байх шиг санагдаад байгаа.

2010 оны 7 сарын, 2013 оны 6 сарын бичлэгүүдэд гүйлсны дарс гэсэн гарчигтай бичиж байж. Гүйлс гэхээр хүмүүс сайн мэдэхгүй байх шиг. Би ч өөрөөр гүйлс гэж сайн мэдэхгүй л дээ. Хэ хэ. Ногоон чавга гэвэл зүгээр юм уу гэж хэлсэн байна бас. Яг алинаар нь нэрлэхээ мэдэхгүй л байна. Японоор нь үмэ гэдэг юм.

Манайхаар айлчилж ирвэл дайлна шүү. Хэ хэ. Ирсэн найзууд бол бүгд л ам сайтай байдаг юм. Өөрсдөө хааяадаа нэг нэг хундагыг уучихна.

Жүүс нь ч сайхан амттай. Бид худалдааны жүүс барагтай л авдаггүй, хааяа зочид ирэхээр л худалдаж авна. Учир нь манай чавганы жүүс жаахан исгэлэндүү амттай байдаг юм болов уу? Зарим айлын хүүхдүүд уухгүй байгаад байдаг юм. Тэгээд л зочидоо хүндлээд жүүс худалдаж авна даа. Охид минь бол гэрийнхээ, өөрсдөө хийсэн чавганыхаа жүүсэд л дуртай.

Зураг 1. Түүж ирчихээд  угаагаад тавчихсан байгаа нь. Хатахаар нь орой? дээрх хар хар ишнийх нь угийг авч арилгана.

Зураг 2. Мөсөн чихэр, лекороо холиод дарсан байгаа нь. Улаан тагтай нь хийж тавиад хэдэг цаг болоход л мөсөн чихэр нь ингээд хайлчихаж. Ногоон тагтай нь дөнгөж хийгээд байгаа нь. Сайн харвал мөсөн чихэр нь харагдаж байна.

Зураг 3. Бага зулзага ээждээ тусалж байгаа нь. Нялцгай, муудсан зэргийг нь түүж өгч байгаа нь гээд урлагийн бүтээл туурвисан нь энэ. Зураг дар гэж даруулсны дараа шууд туслах эрч хүч нь буураад тоглоод явчихсан. Сүүлд бага зэрэг бас тусалсан юм байна.

Энэ удаад том зулзага бараг бүгдийг нь хийж өгсөн. Хэ хэ. Ээж наана нь ам нь хөдлөөд л явлаа.

Хүний шунал гэж барагдах биш. Том жимсийг нь үнэгүй олж ирээд дахиад жүүс хийнэ шүү гээд ярилцаад байгаа. Охиддоо.

3 сарын дараагаас ууж болдог ч дарс чинь удах тусмаа амттай болдог гээ биз дээ? Түрүү жилийнх маань дуусаагүй тул, хадгална даа.

Би анх энэ жимсэнд дурлсан нь тэртээ олон жилийн өмнө. Таньдаг өвөө 7 билүү 8 жил дарсан гээд нэг лонхыг надад бэлэглэсэн юм. Тэгээд л шууд дурлаад, дараа жилээс нь өөрөө хийж эхэлсэн. Одоо жил алгасалгүй л хийнэ гэж үзнэ дээ. Улаан дарсчин байна уу? Хэ хэ.

Хөөх, урт бичлэг болж. Ойрд ийм урт бичлэг оруулаагүй шиг санаад байна. За дарс амттай болог...

Байгалийн жимс 2

Чавгаа түүхээр очихдоо бас зүгээр байгаагүй ээ. Өвөө нэг жимс үзүүлэх үү? Энийг багадаа л иддэг байсан. Одоо ч тоож идэх хүнгүй болжээ гэсэн.

Би ч үнэгүй юманд нугасгүй юм болохоороо уухайн тас зөвшөөрөв.

Түүхий дээрээ час улаан юм билээ. Амт бол дажгүй. Жаахан элсэн чихэр ч юм уу? зөгийн бал ч юм уу? хольчихвол салахын аргагүй л амттай болох юм билээ.

Нэг хөгжилтэй нь энэ жимсийг түүчихээд бууж явахдаа бүдэрч унаад түүсэн жаахан жимсээ дараад, гялгар уут нь ягаан өнгөөр будагдчихсан. Миний гарын алга шалбарсан. Дээр бүдэрч унахдаа шалбалсан газраа дахиад л шалбачихлаа. Бас тохой шалбараад.

Бага зулзага сүр бадруулж шархны лент нааж өгсөн. Эртээдийхийг бодвол арайн хөнгөн шархдлаа энэ удаад. Хэ хэ. Уг нь час өдөр биш л юмсан.

Чавга түүхдээ бас жаахан паагттай. Дараагийн бичлэгт...

Жич: Жимсний нэр нь японоороо күвано ми. Монголоор ялам жимс гэнэ. Аглиар mulberry. Шинэ модны болон жимсний нэртэй болов.

Навчыг нь хүр хорхой иддэг гэнэ. Дээхэн үед япон торго алдартай байх үед хүр хорхойг тэжээж, ялам мод ч эрэлттэй байсан гэнэ.

Химийн арга хэрэглэдэг? болсноор үнэ ч хямдарч, ялам модны тариалалт эрс багассан гэж өвөө тайлбарлаж өгсөн.

Оймс

Дандаа л хүнд оймс нэхдэг байсан бол энэ удаад ширээ сандалдаа оймс нэхлээ. Хэ хэ.

Хань ижил харчихаад унага шиг гэсэн. Шалныхаа өнгөн хэсгийг халцрахаас сэргийлж байгаа нь энэ. Гоё санаа байгаа биз дээ?

Яг яагаад нэхэх болсон бэ гэхээр? Найз хятад хүүхний ээж нь диваныхаа хөлд нэхсэн байсан юм. Хятдын солонгос үндэстэн. Охиныдоо айлчилж ирсэн хугацаандаа уйдаад гэчихсэн, янз бүрийн л зүйл хийж өгөөд байх шиг байна лээ.

Тэгээд л би санаа аваад, өөрийхөө гэрт ч бас нэхээд углачихвал хөөрхөн юм байна гэж бодоод нэхсэн нь энэ.

Суусан газраасаа шороо атгаж байна уу? Ха ха.

Сандалнууддаа бас нэхээд эхэлчихсэн. Бага зулзага бид хоёр л хөөрхөн болжээ тэ? гэж гайхаад л байгаа. Дараа зочид юу гэж үнэлэх нь үү?

Ноосон утас биш шүү. Даавуун утсаар жаахан хатуухан, мөн яг тааруулаад нэхвэл доошоо унжаад байхгүй юм билээ.

Та нар минь суусан газраасаа шороо атгаад, шинэ санаа оноо олоод хэрэгжүүлээрэй. Амжилт.

Байгалийн жимс

Чавганы?-ны дарс хийх гээд бэлтгэл ажлаа базааж байна. Хамгийн эхлээд жимсаа түүж ирнэ. Бүтэн сайн өдөр таньдаг өвөөгийн модноос түүхээр тохирсон байсан юм. Гэм нь айхтар бороо ороод хойшлогдов.

Нэгэнт очсон юм чинь гээд яаж зүгээр байхав. Тээр жил нэг модноос сонирхоод түүж байсан жимс хажууханд нь харагдахаар нь хань ижил, бага зулзага бид 3 шүхэр бариад л түүлээ. Бага зэрэг норохыг үл хайхрав. Хэ хэ.

Япон нэр нь гүми. Толь бичигнээс хайгаад олоогүй. Гэхдээ чидун жимс гэж гарч ирээд. Олив биз дээ? Нэг төрөл юм болов уу?

Жаахан исгэлэндүү амттай. Япон хүүхдүүд, хүмүүс тоож иддэггүй юм билээ. Дээр үед бол иддэг байсан гэсэн. Одоо ч хүнсний дэлгүүрүүдээр нь төрөл бүрийн амтлаг жимс байдаг болохоор тэр байх.

Хань ижил бид хоёр болохоор монголд исгэлэн ч гэсэн байгалийнхаа жимсийг түүж иддэг байснаа дурсан дурсан байж амтархан идэв. Хоёр зулзага нэг их дурлаж идээгүй ч идсээн идсэн.

Энэ японд хөдөөнийх айлууд ихэвчлэн хувийн модтой. Гэрээсээ зайдуу нь ч байна, гэрийнхээ хажууд ч байна. Ихэвчлэн ямар нэгэн жимсний мод байх нь элбэг.

Анх нэг айлын гадаа алимны мод, алим нь намайг идээрэй гэсэн шиг час улайгаад л унжиж байхад тэсэлгүй нэхэж идэж байлаа. Ккк Зураг хөргөө татуулаад л. Юм болгон нь шинэлэг байж дээ. Одоо ерөнхийдөө дөжрөх талдаа. Хэ хэ.

Сонин хүмүүс шүү

Япончуудаа гэж. Хүнд хоёр ширхэг чихэр өгөх гэж л сэтгэл гаргах юм.

Бага зулзагын ангийн нэг банди байдаг юм. Бид хааяа гэртээ харих замынхаа гуравны нэгийг хамтдаа алхана. Тэр бандийн ээж үе үе хатуу чихэр барьж ирнэ. Бага зулзага дуртай гэж юүхэв. Би ч хатуу чихэр барагтаа өгдөггүй болохоор чимээгүй л байдаг юм.

Ингэж чихрээ өгөхдөө надаа гээрэй, алгаа тосоорой гэж байгаад өгөхгүй ээ. Цаасаар хийсэн хөөрхөн хөөрхөн хайрцганд хийж өгнө. Би чихэрнээс нь илүүтэйгээр оригами буюу өнгийн цаасаар хийсэн хайрцганд нь нүд тусаад, дуртай хоёр гардаж авна. Хэ хэ.

 Тогоруу. Ингээл дотор нь ганц хоёр чихэр хийсэн байсан.

Нэг ийм хөөрхөн хайрцаг. Гурван чихэр хийсэн байв.

Онгойлгохоор нэг иймэрхүү. Нэг чихэрийг нь бага зулзага гялс ам руугаа хийсэн байлаа.

Тагийг нь дээш нь харуулж тавьсан байдал.
Цавуу хэрэглээгүй. Нэг нэгээрээ сална. Хэрэв салгахгүй бат бөх хайрцаг хиймээр байвал нааж болно.

Хийж сурмаар л эдийн нэг байлаа. Хааяа хүнд үсний боолт энэ тэрээ бэлэглэхдээ дотор нь хийвэл гоё юм байна гэж бодсон.

Дураараа өвөө шүү

Тэмүжин өвөө маань хааяадаа жаахан дураараа аашилна шүү.

Нэг өдөр утасдаад
-Монголыг сонирхсон хоёр хүн байна аа. Монгол хоол идүүлмээр байгаа тул хагас сайн өдөр танайд дагуулаад очно шүү. Бууз хуушуур идүүлмээр байна.
-Хүүе л дээ, бүр цаг магаа тохирчихсон юм уу?
-Тийм ээ тийм. Би түрүүлж очоод хамтдаа хүнсээ цуглуулна аа. Болгоогоорой.

Ийм л дураараа өвөө шүү дээ. Хань ижил сонсчихоод наанаа л худлаа чадахгүй гэж хэл гээд л, ккк. Эрт тараарай л гэж захилаа, хань ижилдээ.

2-лаа эмэгтэй гэсэн. Аягүй бол таньдаг хүн байж таарч энэ тэр. Хэхэ. Жижигхэн газар шүү дээ манай эндэх чинь.

Далимд нь сайхан монгол хоолоо хийж идэх нь. Ойрд жаахан зав муутай, монгол хоол хийж идэж амжихгүй байсан юм. Дандаа будаа ч заримдаа залхмаар юм аа тэ. Япончууд бол ихэнх нь өглөө өдөр орой будаа шүү дээ. Манайхныг өглөө, өдөр, орой мах иддэг гэсэн тэ гэхээр нь танайхан өглөө, өдөр, орой будаа иддэгтэй чинь адил гэж хэдэрлэдэг юм. Хэ хэ.

Эртээд бас Монгол явмаар байна гэсэн нэг эмээ, нэг хүүхэн манайхаар айлчилсан. Хүүхэн нь 2 настай бандитайгаа явна гэсэн. Банди нь хөдөлгөөнтэй гэж юүхэв. Ээж нь дагаад л гүйх юм билээ, тэгээд ч тэрүү гаулиг гэж юүхэв. Би хоёр хоног дагаад гүйчихвэл ч гуалигмаа болох байх шүү гээд бодоод амжсан гэж...

Ойрд элчингийнхний, консулынхны ажлыг хийгээд байгаа юм шиг санагдаад байгаа шд. Ккк. Тиймэрхүү том газруудаар танилтай хүмүүс байвал та нар ажлаа хийгээч ээ гээд уламжлаад өгөөрэй. Хэ хэ.

Танилтай хүн талын чинээ гээд л улс эх орноо төлөөлөөд Дүүриймаадхаас даа. Сураагүй юм биш тэ.

Нээрээ эртээд хорооны хэдэн хүмүүст эх орныхоо тухай ярьсан гэсэн дээ. Цалингаараа машиныхаа татварыг төлсөн. Үе үе ингэж халтуур хийх гоё шүү. Өрхийн төсөвт нэмэртэй байдаг юм.

Гэснээс баахан татварын бичиг ирээд. 5 сарын 31-нээс өмнө тушаах ёстой. Бүсээ чангалаад л зүтгэнэ дээ.

За япончуудыг дайлах монгол хоол минь амттайг байг... Түр баяртай.

Улсаа сурталчлав

Өнгөрдөг бүтэн сайнд амьдардаг хотоосоо жаахан зайтай нэг хотод очиж улс эх орноо сурталчлаад ирлээ.

Цэнхэр дээлээ өмсөөд л дүүриймаадаж өгөв шд. 5 ханатай гэр байдаг юм. Гэрт орж ирсэн хүмүүст гэрээ тайлбарлаад, асуусан асуултанд нь хариулаад, урд нь хийж бэлтгэсэн байсан номын хавчуургаа бэлэглээд гаргав.

Далбаагаа тайлбарласан номын хавчуурганы зураг оруулж байсан даа. Түрүү жилийн нэгэн бичлэгт. Сая очдог газрын хүмүүст тарааж байгаагүй болохоор хүмүүс их дуртай байсан. Хэдхээн үлдсэн гэж бодохоор хүмүүс их ирсэн. Жаахан хүүхдүүд ч их байсан. Бага сургуулийн сурах бичигт монгол гэрийн тухай байдаг юм. Сургуулийн насны хүүхдүүд их сонирхож байсан.

15 жилийн өмнө Монголд очиж 2 долоо хоносон. Дурсамжтай сайхан явсан гэсэн хүүхэн ирсэн.
-Одоо дахиад нэг яваад ирвэл тэ, өөр болсон доо.
-Харин тийм ээ. 

Монголд 2 жил ажилласан шавь маань цуг явсан. Гитараа бариад л монгол дуу дуулсан гэж байгаа. Энх улирал, Миний аав адуучин, Халуун элгэн нутаг гэсэн дууг дуулсан. Би ч солгой юм болохоороо хажууд нь амаа хөдөлгөөд л зогсож байлаа. Хэ хэ.

Бас цэнхэр дээлээр хосолсон нэгэн монгол бүсгүй хамт байсан. Ажиллаж амьдардаг юм. Бас л мундаг хүн.

Улаан дээлээ өмсөх гэснээ энэ удаад хятад улсын сурталчилгаа хамт нэг өдөр явагдсан тул цэнхэр дээлээ өмсөхөөр бид хоёр ярилцаж тохиролцсон. Шавь усан ногоон дээлтэй. Ингээд л бид 3 чинь тал нутгийн өнгө, мөнх хөх тэнгэрийнхээ өнгөөр гоёцгоолоо шд гэж өөрсдийгөө баясгаад авсан. Хэ хэ.

Зарим нэг өвөө их сонин асуулт асуух юм. Монголд долоо хоног 1 дэх өдрөөс эхэлдэг үү? гэсэн. Эдний хуанли дээр бүтэн сайн өдрөөс эхлээд бичигдсэн байдаг юм. Энэ тухай огтхон ч анзаарч байгаагүй тул жаахан самгардсан. Хэ хэ. Даваа гарагаас эхлэнэ гээд хэлчихсэн. Зөв биз дээ? Монгол хуанли дээрээс хараад хэлээд өгөөрэй. Хичээнгүйлэн хүсье.

Бусдаар ч гайгүй хөгжилтэй л өнгөрлөө.

Хятадууд чанасан банш хийж тараасан. Уртаас урт дугаар үүссэн байсан. Эд бас үнэгүй юманд дуртай, дээрээс нь идэх юманд дуртай. Ямар нэгэн арга хэмжээ зохиохдоо заавал нэг иймэрхүү идэж уух зүйл тараасан, худалдсан булан гаргадаг юм. Учир нь хүмүүс их цуглана.

Өнөөдөр үдээс хойш бас нэгэн цуглаан дээр очиж яриа хийнэ. Одоо гарлаа. Нүүр гараа угааж, нөгөө хувцасаа өмсөөд л. Хотын хороодын төлөөлөгчид 50-60 хүний өмнө гарч ярина. Хамаг хөлс урсах байх даа, дээлээ өмсөхөөр бүр их халууцна. Одоо яая гэхэв, эх орноо л сурталчилж байвал миний тэр халууцах ч яамай байнаа тэ.

Амжилт хүсье өөртөө.

Лаяк цуглуулсан нь

Саяхан ийм бүтээл туурвиад.

Шинэ бүтээл. Уг нь амархан. Гэхдээ надад өөрт жаахан л таалагдахгүй байгаа. Хэ хэ.

Яг юу нь таалагдахгүй байгаа вэ гэвэл резинээ энэ нэхсэн туузтайгаа холбох аргаа нэг л сайн олохгүй байгаа.

Хүмүүст бол таалагдсан. Бага зулзага гоёыг нь гайхсаар байгаад жижиг боолтыг нь өөрийн болгосон.

Маргааш нь цэцэрлэгтээ явахдаа зүүж яваад тэрүүгээр нэг гайхуулсан гэсэн. Хэ хэ.

Миний ээж нэхсэн, гоё байгаа биз дээ гэж.

Би нүүр номдоо энэ зургийг оруулж лаяк цуглуулсан. Хэхэ.

Цагаан өнгийг нэхсэн чинь бага зулзага надаа гэж гуйгаад л байгаа. Би зарна гэсэн чинь өөрт  байгаа хэдэн зоосоо барьж гүйгээд, хэдээр зарах юм? гэсэн.

Аав нь өгчихөөч ээ, миний үрд. Би мөнгийг нь төлчихнө, гэсэн. Ккк

Гэр дотроо наймаалцаад л баяжчих бололтой, би.

Давуу тал нь утас маш бага орно. Цаг ч бага зурцуулах юм билээ. Гол нь одоо өөрийн болгож гартаа оруулах.

90-хэн минутанд сурлагаа сайжруулах уу?

За нэг ийм ном олоод уншиж байна. "90-хэн минутанд сурлагаа сайжруулах хичээлийн арга барил" гэдэг ном.

Нэг бариад л дуустал нь суудаг байсан цаг үе ч сайхан байжээ. Одоо болохоор яаж байна? Яг дэлгээд суухаар л хажуу хавирганаас шулганаж гүйж ирцгээгээд байх юм том жижиггүй. Ккк.

Үртэй хүний жаргал аа гэж.

Уншаад дөнгөж эхэлж байгаа тул тийм ийм гээд хэлэх зүйл одоогоор алга.

Техник хөгжөөд, бас бус зүйл хөгжөөд, шинэ арга барил гарч  ирээд байхад сурах явцын тухай, сурах арга барилыг сайжруулчих тухай яг тийм гэсэн онол ч гэх юм уу дэвшил гарч ирэхгүй байна. Яагаад? гээд л явж байна.

Ахлах сургуульд элсэн орохоор бэлдэж буй сурагчдад зориулсан ном. Энд чинь ахлах сургуульд орох гэж их дээд сургуульд элсэн орохын дайтай л юм болдог гэсэн.

Оноогоор нь жагсаана. Тухайн сурагчын орох хүсэлтэй байгаа ахлах сургуулийг нь асууж байгаад л бэлддэг гэсэн байх аа.

Ирэх жил том зулзага дунд сургуултийн 3-р ангид орж байж л энэ тухай мэдээд, мэдрээд, блогтоо бичээд явах байх.

Тэр болтол та нар минь тэвчээртэй хүлээгээд, үе үе манайхаар шагайгаад яваарай. Би бас блогоо тэвчээртэй, уйгагүй бичээд явахыг хичээнэ ээ. хэ хэ.

Наана нь энэ номоо дуусгаад хэрэгтэй гэсэн зөвлөгөөг нь танилцууламз.

Ихэр охид зурсан нь

Бага зулзага дүү нэхдэг болов. Охин дүүтэй болмоор байна л гэсэн. Гэрээр дүүрэн хэл ам нь дийлдэхгүй шаагилдаад л, хань ижил ганцаараа эр, хэцүү байх байхдаа гэж. Ккк

Нэг хагас сайн өдөрл зураг зурж байна гээ д шулганаад л байсан чинь үүнийг зурсан байсан.

Тэгээд ихэр жаалууд, үснийх нь боолтоор л ялгана гэж тайлбарласан. Хэ хэ. 

Заримдаа ялгааг ол гэдэг зураг зурдаг юм. Гоё болсноос нь зураг оруулна аа.

Заримдаа  ном зурна. Ээж нь бэлэгшээгээд л зураг дарна.  Эмээ өвөөд нь явуулна. Өөрөө ч бүтээлийх нь зургийг дарахад дуртай. Зураг аваач ээ гээд л бариад ирнэ. Хэ хэ.

Хүүхдийн цагаахан хөөрхөн, гэнэн ертөнц. Харах тусам л хайр хүрэх юм.

Багшаа заагаад өгөөч

Жинхнээсээ энэ сарын ном шүү. Өөртөө зориулж уншсан ном. Хэ хэ.

Япон хэлний тухай. Багш сурагчдын асуулт хариулт хэлбэрээр бичигдсэн. Сурагчдын зүгээс япон хэлний ойлгомжгүй зүйлүүдийг багш нь тайлбарлаж өгнө.

Та нарт минь ч гэсэн хэрэг болж магад гээд зургийг нь оруулчихлаа. Хэхэ. Номын сангаас зээлээд уншаарай.

Би чинь чухам л япон хэл сураад байгаа, ярьдаг болчихлоо гээд л байгаа хэрнээ түүхийгээрээ л байна дөө гэж.

За за монгол хэлээ хэл шинжлэл талаас нь ч сайн мэдэхгүй хүн япон хэлийг төгс мэдэх гэж хичээгээд хэрэг байна уу ч гэж бодох. Хэ хэ

Хааяа ингэж сэтгэлээр унах үе байна аа байна.

Гэхдээ гайгүй ээ, түр зуурынх. Удахгүй гайгүй болчихно. Тэгээд л боолтоо ч нэхмээр байна, номоо ч уншмаар байна гээд л эхлэнэ шүү дээ. Ккк

Чингэлэг

Энэ сарын ном. Ойрд ном унших зав жаахан маруухан байна. Хичээлийн шинэ жил эхлээд 1 сар өнгөрч байна. Ерөнхийдөө жигдрээд эхэлсэн.

Өөрийгөө хөгжүүлэх түмэн хүсэлтэй ч өрөөлийг хөгжүүлэх хүсэл минь дийлээд байна. Хэ хэ. Өрөөлийг гэдэг нь гэр бүлийн гишүүд шүү дээ. Ха ха.

Оройд бага зулзагатаа ном уншиж өгнө. Тэрийг тооцвол ч би жилийн 365 хоног худалч хүнд нэг ч өдөр алгасахгүй ном уншиж байна шд. Худлаа худлаа, энэ олон хоногийн 65 хоногт нь аав нь, аниа нь уншиж өгдөг юм байна аа. Тэд нарынхаа хүч хөдөлмөрийг бас үнэлж магтахгүй бол тийм ээ.

Тэгээд санаандгүй чингэлэг гэдэг ном уншиж байсан чинь монгол гэр гараад ирдэг гэнэ ээ. Бага зулзагын баярлаж байгаа гэж.

Яг тэр улс гэж бичээгүй байсан ч яах аргагүй "гэр" байсан тул ингэж баярласан хэрэг.

Агуулга нь хөөрхөөн. Өвөө чингэлэг, шинэков чингэлэг гээд л олон чингэлэгүүд япондоо ачаа ачаад, боомтод хүргэгдээд тэндээсээ усанд онгоцонд ачигдаад бараагаа буулгах улс руугаа зорьдог тухай. Тэднийг маш олон хүмүүс тэсэн ядан хүлээж байдаг, тэдний үүрэг маш том гэдгийг хүүхдүүдэд ойлгуулах.

Монгол гэр бүхий газарт нь үзэг бал, зурагт ном хүргэгдэж ирнэ. Хүүхдүүд түүнийг тэсэн ядан хүлээж байв.

Машины сэлбэг буугаагүй нь яамай гэж бодлоо шд. Хэ хэ. Ингэж бодсон нь бас нэг учиртай. Ккк

Хавтасны зургийг хараад бага зулзага тоох болов уу гэж бодож байснаа нуух юун. Заавал эрэгтэй хүүхэд л машин тэрэг гэж байх ёстой биш гэж бодон зориг гаргаад сонгосон юм. Оносон байгаа биз?

Охин хүүхэд гээд л хүүхэлдэй, гүнж, цэцэг хуартай ном сонгочих гээд байдаг талтай тийм ээ?

Жич: Контейнер гэж засаж хэлж өгсөн уншигчдаа баярлалаа. Гэнэт "чингэлэг" гэдэг монгол үгээ санаад монголоороо бичлээ.

Төрөл бүрийн амттан

Японд муж болгон нь өөрийн гэсэн амттантай. Тухайн мужийн нэрийн бүтээгдэхүүн. Ганц ч биш, хэд хэд бий.

Япон үндэсний амттангаас авахуулаад орчин үеийн амттан гээд л арвин баялагтай.

Япон хүмүүс ийш тийшээ явахдаа заавал тухайн газрын амттан гээд авч ирнэ. Сая амралтаараа тийшээ яваад ирлээ. Тийм газар үзлээ. Нутгийн идээ амс гээд л. Ажлын газрын хүнийхээ тоог гаргаж байгаад л олон ширхэгтэйгээс нь авна. Хувийн журмаар өгөх гэж байгаа бол тухайн хүний юунд дуртайг нь мэддэг тул архи дарс, жимч жимсгэнэ, жигнэмэг өгнө.

Манай ажлынхан ийш тийшээ явахдаа бас л авчирч тавина. Үдээс хойш 3 цагийн үед амттан иддэг цаг гээд амттан байвал задлаад иднэ. Авчирсан хүн нь өөрөө бариад даргаасаа эхлээд тарааж өгнө. Явсан газрынхаа сонингоос хальт дуулгана.

Хэрэв ийм амттангаар тасарсан байвал өөр өөрсдөө дуртай амттанаа шүүгээндээ хийчихсэн байдаг юм билээ. Тэгээд л пс-гээ ширтэнгээ ганцаараа л идчихнэ. Хувааж муваана гэсэн ойлголт байхгүй. Хэ хэ.

Би тэр япон үндэснийх нь амттанд нэг их дуртай биш. Манайхан мэддэг тул авчирч ирэх нь цөөхөн. Хэрэв авчирсан тохиолдолд өө яана аа уучлаарай, энэнээс өөр гоё амттан хайж явах зав гараагүй ээ гэнэ. Хөөрхөн. Хэ хэ.

Хариуд нь өө зүгээр зүгээр сэтгэл тань сайхан шүү, баярлалаа гээд л өнгөрнө.

Нэг хэсэг гуалиг болох минь гээд тангараг тавиад л тараасан амттанаа гэртээ авч ирээд байсан чинь хань ижил гайхаад, чиний бүдүүрээд байгаа шалтгаан чинь энэ байсан байна шд. Дандаа ингэж наддаа авчирч ирж бай.

Одоо байхгүй ээ, чимээгүйхэн шиг өөрөө идчихээд, заримдаа л хоёр зулзагатаа барьж ирээд байгаа. Хэ хэ. Ингээд л гуалиг болж чадахгүй байгаа юм даа гэж...

Хааяа даа манайхаар үйлчлүүлдэг гадаад оюутнууд нутгийнхаа идээнээс авчирч өгнө. Хятад оюутан их байдаг тул хятад гэхээр бас дотроо жаахан сэжиглээстэй, тун багыг амсана шүү дээ. Хүн гээч амьтан бас л муухай байгаа юм шүү тэ.

Бразилчууд борголоосоо их бэлэглэнэ. Австрали их нялуун амттай том том шоколат бэлэглэнэ. Хятадууд цай бэлэглэнэ. Тайваньчууд дотроо хан боргоцойтой боов бэлэглэнэ. Тэрэнд том зулзага бид хоёр дуртай гэж юүхэв. Урд нь хамт ажилладаг байсан тайвань хүүхнээ нутаг буцаад ирэх болгонд нь тусдаа захьдаг байж билээ. Ойрд идсэнгүй, бүр амтагдчихлаа. Солонгосчууд давсалсан далайн байцаагаа авчирч өгнө. Бас л дуртай. Сүүлийн үед дэлгүүрүүдээр зарагддаг болсон. Худалдаж аваад идчихдэг болсон амар. Монголчууд уу? Сүүлийн үед алтан говь билүү шоколат авчирдаг болсон. Хааяа монгол явсан япон хүмүүс хаан сүүтэй цай авчирч өгдөг юм.

Энэ Токио явж ирсэн хүн авчирсан. Токио банана гэдэг амттан. Дотроо бананатай. Ийм зүрхтэй байдаг юм байна .

Муурны дүрст жигнэмэг. Хаанахых билээ дээ, харж амжаагүй идчихсэн. Хайрцаг нь хөөрхөн бөөрөнхий хайрцаг байсан. Ажил дээрээ хадгалчихсан байгаа. Харж байгаад хэлнэ ээ. Хэ хэ.

Иватэ гэдэг мужийн амттан. Том зулзагын зургийн дугуйлангийн багш нь алтан долоо хоногоор тийшээ явахдаа авчирсан. Төрсөн нутаг нь гэсэн. Ийм бор аягатай гурвалжин будааны гоймонтой хоолоороо алдартай гэсэн байх аа.

Өөр зөндөө л сонин содон хэлбэртэй, зурагтай, амттай, савлагаатай амттан бий. Идэж үзэхээрээ зураг авч оруулж байна аа хойшид. Яахав муу хүн идсэнээ гэж. Гэхдээ япончууд тувт явсан газрынхаа хоол ундыг ярьдаг юм. Тэгэхээр япончууд бүгд муу хүн? Ккк

Бага байхад Завхан нутгаас ирсэн хамаатнууд маань цагаан дээлт гэдэг хатуу чихэр өгдөг байж билээ. Дуртай байлаа шүү дээ. Гэхдээ л аарууландаа нугасгүй ээ. Япончууд л идэж чаддагүй болохоос. Гэртээ бид хатуу ааруул хүлхэж өгнө шүү дээ. Харин үйлдвэрийн хорхой аарууланд дургүй, чихэртэй болохоо тэр юм болов уу? Ямартай ч гэрийнхэн маань иддэггүй. Гашуун аарууландаа л үнэнч...

Бага сургуульд орох бэлтгэл

Бага зулзага ирэх жилийн 4 сард нэг дүгээр ангид элсэн орох юм. Хаа байсан байгаа биз?

Тэгсэн цэцэрлэгээс нь бичиг ирж. Хотын захиргаанаас ирэх жил сургуульд орох хүүхэдтэй айлд ийм бичиг хүргүүлдэг юм байна.

Агуулга нь таны хүүхэд чинь 5 нас хүрлээ. Удахгүй сургуульд элсэн орно. Нүүр дүүрэн инээмсэглэлээр, баяр хөөртэйгөөр сургуульд элсэн орохын тулд ...

Сургуульд элсэн орохтой холбоотой төрөл бүрийн зөвлөгөө өгнө. Жишээ нь найзуудтайгаа хамт тоглохдоо жаахан тааруухан. Хэл ярианы хөгжил, ойлгохдоо удаан юм шиг санагдаад байвал. Хойшид олон найзуудтай болоод цугтаа хичээллээд явж чадах болов уу? Сургуульд элсэн орсны дараагаар ямар ямар дэмжлэг байдаг вэ? Бага сургуулийн орчин болон боловсролын агуулгын тухай мэдмээр байвал.

Мэргэжлийн хүнээс үнэгүй зөвлөгөө өгөх болно.

Гэсэн нэг хуудас бичиг ирсэн. Доор нь хотын захиргааны ямар хэлтэс болох тухай, холбоо барих утас, факсны дугаар гэх мэт зүйлийг нарийн тодорхой бичжээ.

Мөн хавсралт хуудас 1-т: ажлын тэд дэх өдрүүдэд тэдэн цагаас хүлээж авна гээд хариуцсан ажилтны нэр усыг бичжээ.

Хавсралт хуудас 2-т: 5 настай хүүхдүүдийн хийж чаддаг зүйл, тэдний онцлог зэргийг бичсэн байна.

Хавсралт хуудас 3-т: захиалгын хуудас. Бөглөөд цэцэрлэгт нь хүргүүлнэ. Цэцэрлэг нь цааш уламжлана.

Нэг иймэрхүү. Том зулзагыг сургуульд ороход бас ингэж байсан байх даа. Сайн санахгүй байна. Хэрэв ингэж бичиг цаас ирж байсан бол блогтоо бичиж танилцуулсан ч байж магад. Бичээгүй орхигдуулсан ч байж магад.

Хотын захиргаа, цэцэрлэг, бага дунд сургууль нь хоорондоо нягт холбоотой ажиллах юм тэ.

Цаашид  ч яг ямар бэлтгэл ажил хийгдээд явдаг тухай цаг бүрт нь бичээд явна аа.

Ойрд эрхлээд байгаа бага зулзагаа эрхлээд байна, яах вэ? гэж зөвлөгөө авдаг юм билүү? Хэ хэ.

Ээжийн баяр

За өчигдөр ээжүүдийн баяр болов.

Японд байгаа бид чинь заримдаа  хоёр улсын баярыг тэмдэглэчихээд байх юм даа. 6 сарын 1-нд эх үрсийн баяр шдээ, хань ижлээ гээд л шаналгана даа. Хэ хэ.

Бага зулзага өглөө нь захиа өгөв ээждээ. Зураг зурдаг том цаасан дээрээ хирагана үсгээр том том бичсэн захиа. Зарим нэг үсэг нь буруу харчихсан. Хайр хүрмээр. Ккк

Захиаг орчуулж өгөх үү? "Ээж дээ. Өнөөдөр ээжүүдийн баяр. Зөндөө бэлэг өгмөөр байгаа ч тийм бэлэг байхгүй тул уучлаарай. Гэхдээ миний төрсөн өдрөөр танаас зөндөө бэлэг авдаг байж ээжүүдийн баяраар бэлэг өгч чадахгүй байгаа нь сонин юм аа тэ. Уучлаарай. Гэхдээ ээждээ мааааш их хайртай шүү."

Гэж бичээд доор нь гэр бүлийнхээ гишүүдийг зурсан байв. Аавыхаа үсийг хэдхээн ширхэг үс зурсан байсан чинь аав нь гомдоллож байж арзгар үс зуруулав. Хэ хэ.

Том зулзага дугуйлангаасаа харьж ирэхдээ нэг ширхэг сарнай барьчихсан орж ирсэн. Хөөрхөн гэж. Хайр хүрмээр.

Үр зулзага бминь ээ, сарнай авах мөнгөтэй явсан билүү? Замд чинь дэлгүүр байдаг билүү? гэж асуугаад л хайр ундраад байв шд.

За дэлгүүр хоршоо бол нил цэцгээр дүүрсэн байв. Ихэвчлэн лиш цэцэг англиар бол carnation гэдэг цэцэг өгдөг. Энэ заншил нь Америкаас гаралтай гэнэ. 1914 онд Wilson ерөнхийлөгч ээждээ энэ цэцгийг талархал болгон бэлэглэсэн явдлаас үүдэлтэй гэнэ. Тэгээд 5 сарын хоёр дахь долоо хоногийг ээжүүдийн өдөр болгон тэмдэглэдэг болсон гэнэ шүү.

Мэдээж жил бүр адил цэцэг бэлэглээд байх нь сонирхолгүй тул сарнай гэх мэт өөр өөр цэцэг ч бэлэглэдэг гэнэ.

Ингэж авсан цэцгээ ихэвчлэн гэрийнхээ гадаах цэцэрлэгтээ, тасалгаандаа гээд л тавиад арчлаад, ургуулаад явдаг юм билээ. Эд нээрээ цэцгэнд их дуртай. Маш олон цэцгийн нэр мэддэг юм билээ.

Энэ удаад зүгээр ч нэг ээжийн баярыг тэмдэгсэнгүй. Лиш цэцэг гэдэг нэртэй боллоо. Зөв эсэхийг нь сайн мэдэхгүй. Carnation цэцгийн монгол нэрийг үнэн зөвөөр нь мэддэг хүн байвал хэлж өгөөрэй. Хичээнгүйлэн хүсэв...

Ийм цэцэг байдаг юм билээ. Ягаан өнгийх ч байна.

Дээрээс нь харахад нэг ийм. Бас ер нь энэ цэцэгнүүд чинь тус бүрдээ өөрийн гэсэн үгтэй, агуулгатай байдаг юм билээ. Дээрээс нь нэг төрлийн цэцэг байлаа гэхэд өнгөнөөсөө хамаараад илэрхийлэх утга нь хүртэл өөр өөр байдаг гэсэн.

Яагаав? манай бэр цэцэг, цагаан уул цэцэг шиг дор бүрнээ утгатай.

Та бүхэн нет гэдэг айхтар зүйлээс хайгаад мэдээд аваарай. Би нь бас хайж, тогтоохыг хичээмз.

Жич: Ягаан башир цэцэг гэж бичсэн байсан чинь Лиш цэцэг шүү гэж уншигч маань хэлж өгсөн тул засав. Баярлалаа.  

Уулын ногоо

Алтан долоо хоногоороо баахан уулын ногоо идэх шив дээ.

5 сард нахиалдаг ногоонуудыг уулаасаа түүж иддэг юм уулын хэд маань. Зулзаган хулснаас аваад л бас бус нэрийг нь сайн мэдэхгүй ногоо.

Манайхны хавар цагт яргуй иддэг шиг, таван салаа түүдэг шиг л.

Чанаад, гуриланд? өнхрүүлж байгаад шарж иднэ. Би нь нугасгүй гэж. Тэрийгээ бага зэрэг давс цацаад нэг бол майонез түрхээд идэх ч сайхан шүү.

Нэг цэцгийн ишийг нь бас энэ зураг дээрх шиг шарж идээд байсан. Нэрийг нь цээжлээгүй байна аа. Бас сармисны гол гэх юм уу иш гэх юм уу сайн мэдэхгүй байна л даа, тэрийг иддэг юм билээ.

Таван салаа. Хандалж үсээ угаах гэж байгаа. Хэ хэ. Хань ижил бага зулзага хоёр ишнээс нь салгаж цэвэрлэж байгаа гээд гараа хатгаад, өнөөх нь бэржигнээд л байна гэсэн. Хатаасан чинь хөнгөхөөн цөөхөн юм болсон.

Тогоотой өрөм. Хань ижил сүү хөөрүүлээд өрөм хийсэн байхгүй юу. Даанч гоё зузаан өрөм тогтоогүй. Нимгэхээн өрөм? л тогтсон. Үлдсэн сүүгээр нь тараг бүрээд одоо уугаад л сайхан байна. Чихэргүй тараг цаанаа л гоё шүү.

За нэг иймэрхүү л амарлаа. Энэ удаад гостууруулах ундаанаас хол байсөөн. Огт уугаагүй гэж бол хэлэхгүй ээ, амссан. Хэ хэ

Элс ба далай

Алтан долоо хоног эхэлчихсэн, жаргалаа эдлээд байж байна өө. 8 өрөө байрандаа төөрөөд жаргаж үхэх нь ээ гэж нэг баян хүн хэлсэн гэсэн. Тэрэн шиг л. Ккк

Ингэж бичиж эхлээд орхисон байна. Даанч амралт нь дуусаад, ажил алба эхэлчихсээн. Лазантрий хөдлөөстэй.

4 сарын 29-нд амралтын өдөр. Ингэж миний алтан долоо хоног эхэлсэн юм. Даанч гэрийн бусад гишүүд байхгүй ээ. Ажил, сургууль, цэцэрлэг гээд алба нь дуусахгүй.

Залгаад хагас бүтэн сайн. Нэгдэхэд би нь ажилгүй байдаг тул мягмар, лхагва, пүрэв гараг амралт таараад. Үндсэн хуулийн өдөр, хүүхдийн баяр, "ногоо"-ны өдөр гэсэн баяр дарааллаад болдог юм.

За энэ хагас бүтэн сайнд таарвал нөхөөд ажлын өдөр амарна. Тэгэхээр их олон хоногийн амралт болно доо. Япон хүмүүс ашгүй минь гээд л гуяа алгадаад л гадаад руу аялах нь аялаад, ижий аавындаа цуглах нь цуглаад, улс эх орныхоо өнцөг булан луу аялдаг юм.

Манайд япон найз эгч хоёр бандитайгаа ирсэн. Эрэгтэй хүүхдийн хөдөлгөөнийг ээ, дийлэхгүй юм билээ. Бас япон хүүхдүүд эрт унтаад эрт босоод сэрчихдэг болохоор эгчид жаахан ядаргаатай байлаа. Хэ хэ.

Өглөөний 7 цаг гэхэд аль хэдийн босоод гадаах цэцэрлэгт тоглоод гүйж байх. Би чинь өглөөний хүн биш шүү дээ. Нэг хэсэг өглөөний хүн болноо энэ тэр гээд блогоороо нэг зарлаж л байсан санагдаад байна. Монголын хууль гурав хоног болчихсон. Ичмээр л дээ.

За тэгээд хот дотор  минь хамгийн ойрхон байдаг элсэн манхан оров. Хоёр банди нь тэмээ унав. Бид монголдоо харихаараа үнэгүй уначихнаа гээд унаагүй. Хэхэ. Төлбөртэй шүү дээ тэр чинь.

Далайн эрэг орж сүр хүчийг нь гайхав. Өнөөх хоёр гайхал чинь өмд энэ тэрээ норгоод. Гэхдээ сольж барилгүй өмссөн чигтээ хатаасан, халуун ч байсан ашгүй. Ккк.

Бага зулзага хясаа түүж тоглосон. Би нь сайхан алхсан. Гэм нь өнөөх алхалт хэмжигчээ мартааский. Хэ хэ.

Япон тэнгисийн эрэг дээр янаг хоёр зугаална гэдэг зураг. Хэ хэ.

Элс өөд авирч байгаа нь бага зулзага. Элс нь доошоо гулсаад, мацах гэж хэрэндээ л хичээсээн.

Би ч өнөөх хоёр гайхлын нэгээр нь татуулж байж элсэн манханаа гатлав шд.

Идэж уусан зураг дараагийн бичлэгт...

Гостов

Эртээд дарс шимнэ гээд  хөөрөөд байсан даа. Шимсээн шимсэн.

Гэм нь яасан байх нь уу? Гостоод. Хэ хэ. Дан улаан дарсаар дагнаад, хэтрүүлсэн бололтой. Хэсэгтээ дарс уумаар байна шдээ гэхээргүй л боллоо.

Гэртээ ирээд, шүдээ угааснаа санаж байгаа, нүүрээ угааснаа санаж байгаа. Тэгээд цаашаа санахгүй.

Хань ижил надаараа тоглоод, агсан тавиад бид 3-ыг хана руу шахаж гарыг минь өргөөж зогсоолгоод гээд байгаа. Ха ха.

Бага зулзага ээждээ ном уншиж өгсөн гэсэн. Дундаас нь унтаад өгөхөөр нь тэгээд уншихаа больсон. Одоо ч гэсэн гостуу юу ээж ээ? гэсэн. Хэ хэ.
-Үгүй үгүй, зүгээр. Алив ээж нь номыг нь уншиж өгөх үү?
гэж аймаар томоотой ээжийнхээ дүрд эргэн оров. Ккк.

За энэ хамгийн түрүүнд дарга хундаганы үг хэлэх үед захиалсан дарс. Хажуугийнх нь хулууны шөл. Аяга нь хөөрхөн санагдаад зураг дарсан. Жаахан зайнаас харахаар яст мэлхий шиг харагдаад байсан юм. Энэ зурагт тэгж гараагүй байна.

Энэ нэлээд хойхно бяслагтай будаа идэнгээ шимсэн дарс. Энэ удаагийн орсон газар маань нэлээд тансаг. Хүн болгонд ирж байгаа тавагнууд өөр өөр байсан.

Төгсгөлийн хундаганы дарс. Хажуугийнх нь зайрмаг. Хар гүнжидтай зайрмаг. Амттай байсан. Хэд хэдэн төрлийн зайрмаг ирсэн. Гүнжидтэйг идэж үзээгүй байсан тул зориуд сонгож идсэн, гоё л юм билээ.

Багш гэрт ирэх

Энэ тухай бичнэ гээд л мартаад яваад байлаа. Санан санан бичив.

Бага, дунд сургуульд хичээлийн шинэ жил эхэлсний дараагаар анги даасан багш нь сурагчдынхаа гэрт очиж, хаягийг нь шалгадаг? юм билээ.

Тэдний тэдэн цагт очно гээд бичиг ирүүлнэ. Ажлын өдөр, сурагчдыг эрт тараана. Хичээл тарсны дараагаар багш нар нь даасан ангийнхаа сурагчдын ар гэрээр явна. Ажлын өдөр таардаг тул эцэг эх нь гэртээ байх нь ховор. Эзгүй байх тохиолдолд шуудангийнх нь хайрцганд зурвас үлдээнэ. "Ирээд явлаа. Хүүхдийнхээ талаар болон, хичээлийн талаар, сургуулийн талаар гээд асуух зүйл байвал хэзээд ч хамаагүй, утсаар ч хамаагүй асуугаарай. Анги даасан багш тэр" гээд гарын үсэгтэй зурвас.

Би нь ч ажилтай таардаг тул нэг их таарч байгаагүй. Бага сургуульд байхад нэг л багштай таарч байсан.

Ингэж гэрээр ирэхдээ гэрт нь ордоггүй юм билээ. Жаахан асуудалтай сурагч, нэг ээж аав нь асууух зүйл ихтэй бол гэрт нь орж буу халдаг гэсэн.

Бас гадаад хүмүүс сайн мэдэхгүй тул гэртээ оруулаад дайлаад цайлаад явчихдаг гэсэн. Зарим нэг багш нь хэрэгт дуртай? сониуч зантай? бол гадаад сурагчдынхаа гэрт орж хардаг гэсэн.

Би нэг ч оруулж байгаагүй. Хэ хэ. 

Гол зорилго нь яг хаяган дээрээ амьдарч байна уу? Эсвэл эмээ өвөөгийнхөө гэрээс явдаг байх нь уу? Бага ангийн сурагч бол гэртээ харьж ирэхэд нь ээж нь ч юм уу, эмээ нь ч юм уу байдаг байх нь уу? Нэг бол түлхүүрийн хүүхэд байх нь уу? гэдгийг багш нь мэдэж авах гэсэн.

Түлхүүрийн хүүхэд гэдэг нь түлхүүрээ цүнхлээд, нэг бол хүзүүнээсээ зүүгээд, хичээлээсээ тарж ирэхэд нь тосож авах хүнгүй, ээж аавыгаа тартал гэртээ ганцаараа байдаг хүүхдийг хэлнэ.

Том зулзага ч бага ангидаа түлхүүрийн хүүхэд байсан. Анги ахих тусам тарах цаг нь оройтоод. Одоо бол өглөө 7 хагас гэж гарч яваад орой 7 гэж ирнэ. Их л ядарсан хүн орж ирнэ дээ. Яагаав нүүр номоор гэрийнхээ үүдэнд цүнхээ үүрсэн чигтээ унаад өгсөн охины зураг яваад байсан даа, яг л тэрэн шиг. Хэ хэ.